యువగళం పాదయాత్ర..అరుదైన జ్ఞాపకం

అమరావతి (చైతన్యరథం): యువగళం పాదయాత్ర తనకు జీవితకాలం గుర్తుండిపోయే అరుదైన జ్ఞాపకమని రాష్ట్ర విద్య, ఐటీశాఖల మంత్రి నారా లోకేష్‌ అన్నారు. యువగళం పాదయాత్ర ప్రారంభించి సోమవారానికి రెండేళ్లు పూర్తయిన సందర్భంగా ఎక్స్‌లో మంత్రి లోకేష్‌ స్పందించారు. నియంతృత్వాన్ని, నిర్బంధాలను దాటుకొని రాష్ట్రంలోని 11 ఉమ్మడి జిల్లాలు, 97 నియోజకవర్గాలు, 2,097 గ్రామాల మీదుగా 226 రోజులపాటు 3132 కి.మీ. మేర సాగిన చారిత్రాత్మక యువగళం పాదయాత్ర మొదలై సోమవారానికి రెండేళ్లు. నాటి పాలకులు పాదయాత్ర ఆపడానికి చెయ్యని ప్రయత్నం లేదు. మైక్‌ వెహికల్‌ సీజ్‌ చెయ్యడం దగ్గర నుండి వాలంటీర్లును అరెస్టు చేయడం వరకూ అనేక విధాలుగా ఇబ్బందులు పెట్టారు. నాటి పాలకులు ఎన్ని అడ్డంకులు పెట్టినా ప్రజలు చూపించిన ప్రేమ నన్ను మరింత దృఢంగా మార్చింది. పాదయాత్ర ప్రతి అడుగులో ప్రజల కష్టాలు చూసాను, ఆ రోజు చూసిన కన్నీటి గాథలు నేటికీ నాకు గుర్తున్నాయి. ఇచ్చిన ప్రతి హామీ గుర్తుంది. ప్రజల ఆకాంక్షకు తగ్గట్టుగా ప్రజా ప్రభుత్వం పనిచేస్తుంది. హామీలు అన్నింటినీ క్రమ పద్ధతిలో అమలు చేస్తున్నాం. యువగళం పాదయాత్రలో ప్రత్యక్షంగా- పరోక్షంగా భాగమైన ప్రతి ఒక్కరికీ, నన్ను ఆదరించిన ప్రజలకు ప్రత్యేక ధన్యవాదాలు అంటూ మంత్రి లోకేష్‌ పోస్ట్‌ చేశారు.