తెలుగుదేశం పార్టీ చరిత్ర
కళగానీ, కళాకారుడు గానీ ప్రజల కోసమే:
సామాన్య రైతు బిడ్డ స్థాయి నుండి కోట్లాది మంది అభిమానులు వెండితెర వేలుపుగా పూజించే తెలుగు సినీరంగ అగ్రశ్రేణి కథానాయకుడి స్థాయి వరకు పట్టుదల, క్రమశిక్షణ, నిరంతర శ్రమలకు మారుపేరుగా ఎదిగారు శ్రీ నందమూరి తారక రామారావు గారు. రాముడిగా, కృష్ణుడిగా, శ్రీనివాసునిగా పలు పౌరాణిక పాత్రల్లో ఎన్టీఆర్ సినిమా తెరపై చేసిన మాయాజాలం ఆయన్ను అభిమానుల దృష్టిలో నడిచే దేవుడిని చేసింది
సినీ పరిశ్రమలో ఉన్నప్పటి నుంచి కూడా తెలుగువారికి ఎప్పుడు ఏ ఆపద కలిగినా... దేశానికి ఎప్పుడు ఏ అవసరం కలిగినా... సహా కళాకారులందరినీ కూడగట్టుకుని కళా ప్రదర్శనలిచ్చి, జోలె పట్టి వీధుల్లో తిరుగుతూ విరాళాలు సేకరించి కేంద్ర, రాష్ట్ర ప్రభుత్వాలకు అందించేవారు ఎన్టీఆర్. కళగానీ, కళాకారుడు గానీ ప్రజల కోసమే అని ఎన్టీఆర్ భావన.
- 1952లో రాయలసీమలో కరువు సంభవిస్తే... తోటి నటీ నటులతో నెల రోజుల పాటు పలు చోట్ల ప్రదర్శనలిచ్చి, వీదుల్లో జోలెపట్టి లక్షా 50 వేల రూపాయలు సేకరించి రామకృష్ణ మిషన్ ద్వారా సహాయ కార్యక్రమాలకు అందజేశారు.
- 1962లో భారత్ - చైనాల మద్య జరిగిన యుద్ద సహాయార్థం... 10 లక్షల రూపాయలు సేకరించి జాతీయ రక్షణ నిధికి అందేలా నాటి ముఖ్యమంత్రి నీలం సంజీవరెడ్డి గారికి అందజేశారు.
- విజయవాడ, కృష్ణలంక అగ్నిబాధితుల సహాయార్థం ప్రజలనుండి విరాళాలు సేకరించి NTR దాతృత్వ సంస్థ పేరున లక్ష రూపాయలు 24-6-1964 నాడు నాటి ఆంధ్రప్రదేశ్ ముఖ్యమంత్రి కాసు బ్రహ్మానంద రెడ్డి గారికి అందజేశారు
- 1965లో పోలీసు కానిస్టేబుళ్ల రక్షణ నిధికి 3 లక్షల రూపాయలను అందజేశారు
- 1965 భారత-పాకిస్తాన్ యుద్ధ సహాయార్థం, జాతీయ రక్షణ నిధికి ఊరూరా తన సహచర నటులతో కలిసి ప్రదర్శనలిచ్చి విరాళాలు సేకరించిన ఎన్టీఆర్... 16 డిసెంబర్ 1965న హైదరాబాద్ లాల్ బహదూర్ స్టేడియంలో నాటి ముఖ్యమంత్రి కాసు బ్రహ్మానంద రెడ్డి గారి చేతుల మీదుగా... నాటి ప్రధాని లాల్ బహదూర్ శాస్త్రి గారికి అందజేయడం జరిగింది.
- 1969లో కోస్తా తుఫాను బాధితుల సహాయార్థం రూ.5 లక్షల పైన విరాళాలను సేకరించి ఇచ్చారు.
- 1972లో భారతదేశ వ్యాప్తంగా చాలా చోట్ల ప్రజలు కరువు కాటకాలతో అల్లాడుతుంటే... తోటి కళాకారులతో కలిసి 28-10-1972 నుండి 2-11-1972 వరకు నాటక ప్రదర్శనలు, విరాళాల ద్వారా 7 లక్షల రూపాయల పైన సేకరించి... అప్పటి ప్రధానమంత్రి ఇందిరాగాంధీ గారికి 2-2-1973న అందజేశారు
- 19 నవంబర్ 1977 తేదీన సంభవించిన దివిసీమ ఉప్పెనలో వేల మంది ప్రాణాలు కోల్పోయారు. లక్షల మంది నిరాశ్రయులయ్యారు. అప్పుడు కూడా 15 లక్షల రూపాయల విరాళాలు సేకరించి రామకృష్ణ మిషన్ ద్వారా బాధితులకు సహాయం అందించారు.
తెలుగుదేశం పార్టీ ఆవిర్భావం : 9 నెలల్లోనే అధికారం
నాటి దివిసీమ సహాయ కార్యక్రమాలలో పాల్గొంటున్న సమయంలోనే నిరుపేదల కన్నీళ్లు, కష్టాలు చూసి చలించిపోయారు ఎన్టీఆర్. మూడు దశాబ్దాలుగా తనను నటుడిగా ఆదరించి, వెండితెర వేలుపుగా పూజించి... విశ్వవిఖ్యాతుని చేసిన ప్రజలకు, ఏదైనా మంచి చేసి వారి ఋణం తీర్చుకోవాలని నిర్ణయించుకున్నారు.
అదే సమయంలో ఢిల్లీ పెద్దల అహంకారపు చెరలో తెలుగువారి ఆత్మగౌరవం అవమానాలు ఎదుర్కోవడం చూసి ఆ తెలుగు పౌరుషం రగిలిపోయింది. ఒక తెలుగుబిడ్డగా తెలుగువాడి తేజం ఏంటో ప్రపంచానికి చూపించాలంటే... తన రాజకీయ రంగ ప్రవేశం అనివార్యం అని భావించారు ఎన్టీఆర్.
- ఫలితంగా 1982 మార్చి 29న మద్యాహ్నం 2.30 లకు హైదరాబాద్, న్యూ ఎమ్మెల్యే క్వార్టర్స్ లో సభ జరిపి 'తెలుగుదేశం' పార్టీని ప్రకటించారు. "నేను తెలుగువాడిని, నాది తెలుగుదేశం పార్టీ, నా పార్టీ తెలుగు ప్రజల ఆత్మగౌరవం కోసం" అంటూ చారిత్రాత్మక ఘట్టానికి ఊపిరి పోశారు.
- ఏప్రిల్ 11, 1982న తెలుగుదేశం పార్టీ మొదటి బహిరంగ సమావేశం హైదరాబాద్, నిజాం కాలేజ్ గ్రౌండ్ లో జరిగింది.
- మంగళ ప్రదమైన పసుపు రంగుపైన కార్మిక శక్తికి సంకేతమైన ఎర్రని చక్రం, రైతుకి చిహ్నమైన ఆకుపచ్చని నాగలితో పేదల పరిస్థితులను ప్రతిబింభించే తెల్లనైన కుటీరంతో తెలుగుదేశం పతాకాన్ని స్వయంగా తన చేతులతో గీసి రూపొందించారు ఎన్టీఆర్.
- మే 28, 1982న తిరుపతిలో ఏర్పాటు చేసిన భారీ బహిరంగ సభ యావత్ భారతావని దృష్టిని ఆకర్షించింది, ఎన్టీఆర్ ఒక అఖండ శక్తిగా అవతరించగలరని దేశానికి అర్థమయ్యింది.
- జూన్ 14,1982 : తెలుగునాట ప్రతి సామాన్యుడిలో రాజకీయ చైతన్యం కలిగించడానికి చైతన్య రథమెక్కి ప్రచార యాత్రకు కదిలారు ఎన్టీఆర్. కొడుకు హరికృష్ణే రథసారథి. రాత్రి లేదు పగలు లేదు. నటుడిగా తాను సంపాదించిన ఐశ్వర్యం, కీర్తి, వైభవం అన్నిటినీ మరిచి... సామాన్యుడి కోసం నడిరోడ్డుపై నిలిచాడు నందమూరి తారకరాముడు. ఆ రోడ్డే ఆయనకు ఇల్లయ్యింది. తల్లి అయ్యింది. చెట్టు నీడే పడకగది అయ్యింది.
- మొదటి ప్రచార యాత్ర 20 రోజుల పాటు తెలంగాణలో సాగింది. జూన్ 20న రాయలసీమలో అడుగు పెట్టి... ఆపైన జులై 1 నుండి 5 వరకు కోస్తాంధ్ర జిల్లాల్లో పర్యటించారు ఎన్టీఆర్.
- అక్టోబర్ 3, 1982 న రెండవ ప్రచార యాత్రను ప్రారంభించారు ఎన్టీఆర్.
- నవంబర్ 26, 1982 వరకు 55 రోజుల పాటు జరిగిన ఈ 25 వేల కిలోమీటర్ల ప్రచార యాత్ర నభూతో- నభవిష్యతి. అవిశ్రాంతంగా పర్యటిస్తూ దాదాపుగా 600 సభల్లో ప్రసంగించారు.
- డిసెంబర్ 16, 1982న మళ్ళీ మొదలైన ఎన్నికల ప్రచార యాత్ర... జనవరి 3, 1983 వరకు నిర్విరామంగా కొనసాగింది. డిసెంబర్ 1982లో ఎన్నికల ప్రచారం సందర్భంగా 72 గంటల పాటు నిద్రాహారాలు మాని నిర్విరామంగా ప్రచారం సాగించి ఎన్టీఆర్ సృష్టించిన చరిత్రను డిసెంబర్ 21 రాత్రి BBC తన వార్తా ప్రసారంలో ప్రపంచానికి చూపించింది. "ప్రపంచంలో ఇంతవరకూ ఎవ్వరూ ఇంత తక్కువ సమయంలో ఇన్ని చోట్ల, ఇన్ని లక్షల ప్రజల్ని ఉద్దేశించి ప్రసంగించ లేదు" అని ఎన్టీఆర్ ని కొనియాడింది. తొలిసారిగా తెలుగువారి ఉనికి, తెలుగు ఖ్యాతి ప్రపంచవ్యాప్తంగా వెలుగులోకి వచ్చింది.
- పసివాడినుండి పండు ముదుసలుల వరకు ఎన్టీఆర్ ను "అన్నగారు" అంటూ సంభోదించారు. అది ఆయనకు దేవుడిచ్చిన వరం.
- "చెయ్యెత్తి జై కొట్టు తెలుగోడా... గతమెంతో ఘనకీర్తి కలవోడా... " అంటూ చైతన్యరథం కదిలి వస్తుంటే జనం పులకరించి పూనకమెత్తారు.
- జనవరి 5, 1983న జరిగిన ఆంధ్రప్రదేశ్ అసెంబ్లీ ఎన్నికల్లో... కొత్తవారైనప్పటికీ తెలుగుదేశం పార్టీ అభ్యర్థులు మహా మహా ఉద్దండులను సహితం మట్టి కరిపించి విజయం సాధించారు. వీరిలో ఇంజనీర్లు, డాక్టర్లు, లాయర్లు ఉండటం విశేషం. మహిళలని, బడుగు వర్గాల వారిని, వెనుకబడిన వర్గాల వారినీ గెలిపించి వారికి రాజకీయ భవిష్యత్తును ఇచ్చిన పార్టీ తెలుగుదేశం.
- 292 స్థానాలకు గాను 202 స్థానాల్లో తెలుగుదేశం పార్టీ గెలిచింది. 60 స్థానాల్లో ప్రత్యర్థి పార్టీ కాంగ్రెస్ గెలిచింది.
- "తెలుగుదేశం పిలుస్తోంది రా... కదలిరా!" అని అన్నగారు పిలిచిన పిలుపు ప్రభంజనమై... ఆ హోరుగాలిలో బానిస రాజకీయం తుడిచిపెట్టుకుపోయింది. పార్టీగా ఆవిర్భవించిన 9 నెలల కాలంలోనే తెలుగు భాషా సంస్కృతులకు అంతర్జాతీయ ప్రాభవం తీసుకొచ్చిన తెలుగుదేశం పార్టీ అధికారంలోకి వచ్చింది.
- జనవరి 9, 1983: ఆంధ్రప్రదేశ్ రాష్ట్ర 10వ ముఖ్యమంత్రిగా, తనను ఎన్నుకున్న లక్షలాది మంది ప్రజల సమక్షంలో హైదరాబాద్ లాల్ బహదూర్ స్టేడియంలో ... ఎన్టీఆర్ తన 15 మంది మంత్రివర్గంతో ప్రమాణ స్వీకారం చేశారు. అప్పటివరకు ఎన్నికైన ఒక ప్రజానేత బహిరంగ ప్రమాణ స్వీకారం చేయడం భారత దేశంలోనే కాదు ప్రపంచంలోని ప్రజాస్వామ్య చరిత్రలోనే ప్రప్రథమం.
- తెలుగు ప్రజల్లో రాజకీయ చైతన్యం నింపిన పార్టీ... యువతను, విద్యావంతులను, ఆడపడుచులను, వెనుకబడిన వర్గాల వారిని నాయకులుగా, మంత్రులుగా చేసిన తెలుగుదేశం పార్టీ.. నాటి నుండి అప్రతిహతంగా... నాలుగు దశాబ్దాలుగా జనజీవితంతో కలిసి ప్రయాణిస్తోంది.
తెలుగునాట సంక్షేమ పాలన ఆరంభం :
నిబద్ధత, నిజాయితీ, నిర్భీతి, నిక్కచ్చితనం కలబోసిన ఎన్టీఆర్... తెలుగుదేశం పార్టీని కేవలం ఒక రాజకీయ పార్టీగా కాకుండా ఒక సాంఘిక విప్లవం తేవడానికి ఉద్దేశించిన ఉద్యమంగా మార్చారు.
ఆడపిల్లలకు ఆస్తిలో హక్కు, పేదవాడి కడుపు నింపే రెండు రూపాయలకు కిలోబియ్యం, సగం ధరకే చేనేత వస్త్రాలు, రైతన్నకు సబ్సిడీపై విద్యుత్, పేదవాడికి పక్కా ఇల్లు... ఇలా ఎన్నో పథకాలతో దేశంలోనే ప్రజలకు సంక్షేమ పాలనను అందించిన మొదటి పార్టీగా తెలుగుదేశం ప్రజల గుండెల్లో నిలిచింది
- ఏప్రిల్ 19, 1982: ఆంధ్రప్రదేశ్, తమిళనాడుల మధ్య తెలుగు గంగ ఒప్పందం
- ఏప్రిల్ 27, 1983: వెలుగోడు వద్ద తెలుగుగంగ ప్రాజెక్టుకు శంకుస్థాపన
- మే 28, 1983: విజయవాడలో తెలుగుదేశం పార్టీ మొదటి మహానాడు. జాతీయ స్థాయి నేతలతో విజయవాడలో ఎంజిఆర్ అద్యక్షతన సమావేశం ఏర్పాటు చేశారు ఎన్టీఆర్.
- జులై 6, 1983 కర్నూలు జిల్లా పాణ్యంలోని ఇందిరా కాలనీలో కిలో 2 రూ.ల బియ్యం పంపిణీ పథకం ప్రారంభం
1984 ఆగస్టు సంక్షోభం:
- ఆగస్టు 16, 1984: ప్రజాదరణ మెండుగా కలిగిన ఎన్టీఆర్ ను రాజకీయంగా ఎదుర్కోలేకపోయిన ఢిల్లీ పెద్దలు కుట్ర పన్ని, అప్రజాస్వామికంగా ఎన్టీఆర్ ను పదవీచ్యుతుని చేసారు. నాదెండ్ల భాస్కరరావు రూపంలో ఎదురైన 1984 ఆగస్ట్ సంక్షోభం ఎన్టీఆర్ పోరాట పటిమకు నిదర్శనమైతే... అదే సందర్భంలో ఎన్టీఆర్ కు అండగా నిలిచిన ఒక సమర్థ యువ నాయకత్వం తెలుగుదేశం పార్టీకి వరమై అందింది. ఆ నాయకత్వం పేరే నారా చంద్రబాబు నాయుడు. ఎన్టీఆర్ బల నిరూపణ జరిగి, తిరిగి ఆయన ముఖ్యమంత్రి స్థానంలో కూర్చునే వరకు చంద్రబాబు గారు చూపిన సమయస్ఫూర్తి, పట్టుదల, యుక్తి ఎన్టీఆర్ ను ఆకర్షించాయి. చంద్రబాబు నాయుడు గారి శ్రమను గుర్తించి ఆయనను 1985లో తెలుగుదేశం పార్టీ ప్రధాన కార్యదర్శిని చేసారు ఎన్టీఆర్. అప్పటి నుండి నేటి వరకు ఎన్టీఆర్ స్థాపించిన తెలుగుదేశం పార్టీని, తనదైన శైలిలో తీర్చిదిద్ది... ఎన్నో సంచలనాలకు కేంద్రబిందువుగా పార్టీని నిలిపారు చంద్రబాబు గారు.
- 15 సెప్టెంబర్, 1984: బలనిరూపణలో నెగ్గిన ఎన్టీఆర్ ముఖ్యమంత్రిగా మరో మారు అధికారాన్ని చేపట్టారు
- నవంబర్ 1984 : 60 ఏళ్ళు పైబడిన భూమిలేని రైతులకు, రైతు కూలీలకు 'తెలుగు వ్యవసాయ కార్మిక సాదర సంక్షేమం' పథకం పేరిట నెలకు రూ.30 పింఛను పథకం ప్రారంభం
- నవంబర్ 23, 1984: శాసనసభ రద్దు
- డిసెంబర్ 27, 1984 : ప్రధాని ఇందిరా గాంధీ హత్య కారణంగా లోక్ సభకు మధ్యంతర ఎన్నికలు. ఆంధ్రప్రదేశ్ లో ఎన్నికలు జరిగిన 40 సీట్లకు గాను 30 సీట్లు గెలుచుకుని... పార్లమెంట్‌లో ప్రతిపక్ష హోదా పొంది... ఆ ఘనత సాధించిన తొలి ప్రాంతీయ పార్టీగా చరిత్ర సృష్టించిన తెలుగుదేశం
- మార్చి 5, 1985 : ఆంధ్రప్రదేశ్ రాష్ట్ర శాసనసభ మధ్యంతర ఎన్నికల్లో పోటీ చేసిన 250 సీట్లకు 202 సీట్లు గెలుచుకుని తెలుగుదేశం పార్టీ ఘన విజయం
- మార్చి 9, 1985: జనం సాక్షిగా సికింద్రాబాద్ పెరేడ్ గ్రౌండ్స్ లో మూడవసారి ముఖ్యమంత్రిగా ఎన్టీఆర్ ప్రమాణ స్వీకారం
- ఏప్రిల్ 6, 1985 : తిరుమలలో నిత్యాన్నదాన మహత్కార్యానికి శ్రీకారం
- సెప్టెంబర్ 1985 : దేశంలోనే మొదటిసారిగా తండ్రి ఆస్తిలో స్త్రీలకు సమాన హక్కు కల్పిస్తూ చట్టం చేసిన ఎన్టీఆర్
- ఏప్రిల్ 18, 1986 : దేశంలో మొదటిసారిగా రూ.165 కోట్లతో 1,70,000 నిరుపేద కుటుంబాలకు 'నీడ' పథకం కింద శాశ్వత గృహాలు కట్టించిన ఎన్టీఆర్
- డిసెంబర్ 1989 : ఆంధ్రప్రదేశ్ శాసనసభ ఎన్నికల్లో అధికారాన్ని కోల్పోయిన తెలుగుదేశం పార్టీ
- డిసెంబర్ 1994 : ఆంధ్రప్రదేశ్ శాసనసభ ఎన్నికల్లో పోటీ చేసిన 251 స్థానాలకు గాను 216 స్థానాలు గెలుచుకుని అత్యధిక మెజారిటీతో అధికారాన్ని చేజిక్కించుకున్న తెలుగుదేశం పార్టీ
- డిసెంబర్ 12, 1994 : ఆంధ్రప్రదేశ్ ముఖ్యమంత్రిగా ఎన్టీఆర్ నాలుగోసారి ప్రమాణ స్వీకారం
- సెప్టెంబర్ 1, 1995 : ఆంధ్రప్రదేశ్ ముఖ్యమంత్రి బాధ్యతలు చేపట్టిన నారా చంద్రబాబు నాయుడు గారు
- జనవరి 18, 1996 : తెలుగింటి రామన్న, తెలుగుతల్లి ప్రియపుత్రుడు, కళామతల్లి ముద్దుబిడ్డడు,పేదల పాలిటి పెన్నిధి నందమూరి తారకరాముడు అస్తమయం
చంద్రన్న పాలనా శకం:
- ఎన్టీఆర్ తర్వాత చంద్రబాబు పాలనతో మొదలయ్యింది మరో సంచలన శకం. "కదలి సాగుదాం మనం జన్మభూమికి... తల్లి పాల ఋణం కొంత తీర్చడానికి" అంటూ ప్రజలను పాలనలో భాగస్వాములను చేర్చారు చంద్రబాబు. ప్రజల వద్దకు పాలన వచ్చింది.
- ప్రభుత్వ ఉద్యోగాలు, విద్య, ఉపాధి రంగాలలో స్త్రీలకు 331/3 శాతం రిజర్వేషన్ కల్పించారు. సంస్కరణల ద్వారా ఆర్థిక పునర్నిర్మాణం చేసారు. విద్యుత్ సంస్కరణలు, డ్వాక్రా సంఘాల ఏర్పాటు, బీసీలకు 33 శాతం రిజర్వేషన్ చంద్రబాబు పాలనా సంచలనాలు. శాసనసభకు మొదటి దళిత మహిళా స్పీకర్. భారత లోక్ సభకు మొదటి దళిత స్పీకర్ ను అందించడం చంద్రబాబు సమతా స్ఫూర్తికి నిదర్శనం.
- విజన్ 2020 అంటూ 20 ఏళ్ళ ముందే ఇప్పుడు మనకేం కావాలో... ఇప్పుడు మనమేం ఎంజాయ్ చేస్తున్నామో వాటన్నిటికీ రూపునిచ్చారు నారా చంద్రబాబు నాయుడు గారు. నాలెడ్జ్ ఎకానమీని అభివృద్ధి చేయడం కోసం అమెరికా వీధుల్లో 14 రోజులు ఫైళ్లు పట్టుకుని తిరిగారు
- హైదరాబాద్ లో 1998లో ప్రారంభమైన హైటెక్‌సిటి ఒక అంతర్జాతీయ సంచలనం.
- జంట నగరాల రాజధానికి సైబర్ సిటీని చేర్చడం మాత్రమే కాదు ఔటర్ రింగ్ రోడ్డుకు ఒక రూట్ మ్యాప్ ఇచ్చింది, శంషాబాద్ గ్రీన్ ఫీల్డ్ విమానాశ్రయం తెచ్చింది కూడా చంద్రబాబే. ఈ-సేవా సెంటర్లే కాదు... రైతు బజార్లను తెచ్చింది కూడా చంద్రబాబే.
- 2002లో 32వ జాతీయ క్రీడలను, 2003లో మొదటి ఆఫ్రో-ఆసియన్ గేమ్స్ ను నిర్వహించి తన పాలనా స్థాయిని, సమర్థతను నిరూపించుకున్నారు.
- ఎన్టీఆర్ రూపంలో పేదలకు పట్టెడన్నం, కట్టుకోడానికి బట్ట, తలదాచుకోడానికి పక్కా ఇల్లు అందిస్తే... చంద్రబాబు రూపంలో సామాన్యుడి కలలకు రెక్కలు తొడిగి ఆకాశాన్ని అందుకునే అవకాశాలను అందించింది తెలుగుదేశం.
- ప్రజలకు ఏం కావాలో సమకూర్చుతూనే... మరోపక్క ప్రజలకు అక్కరలేని ఫ్యాక్షనిజం, మత ఘర్షణలు, రౌడీయిజం, నక్సలిజం వంటి వాటిపై ఉక్కుపాదం మోపి అణిచేసారు చంద్రబాబు.
- ఆ ఫలితంగా పగబట్టిన అరాచక శక్తులు 2003 అక్టోబరు 1న తిరుపతి బ్రహ్మొత్సవాలకు వెళుతున్న చంద్రబాబు గారి కాన్వాయి పై అలిపిరి వద్ద క్లేమోర్ మైన్ లు పేల్చి హత్యాయత్నం చేశారు. వెంకన్న సంకల్పమేమో కానీ... అంతటి ఘోరం నుంచి చిన్నపాటి గాయాలతో బయటపడ్డారు చంద్రబాబు.
- 2004లో పార్టీ పరాజయాన్ని పొంది విపక్ష స్థానంలో ఉన్నప్పటికీ ప్రజల క్షేమాన్ని మరచిపోలేదు తెలుగుదేశం. బాబ్లీ ప్రాజెక్టు రూపంలో తెలుగు రైతుకు అన్యాయం జరుగుతుంటే ఒంటరిగా సరిహద్దులు దాటి మరీ పోరాడింది. బాబ్లీ ప్రాజెక్టు నిర్మాణంపై 2005లో చేపట్టిన నిరసనలకు గాను చంద్రబాబు సహా 23 మంది తెలుగుదేశం నేతలపై నమోదైన కేసును గత నెలలోనే కోర్టు కొట్టివేసింది. మహారాష్ట్ర పోలీసుల దౌర్జన్యానికి ఎదురెళ్ళి ప్రాణాలకు తెగించి పోరాడిన చంద్రబాబు తెగువ అనితర సాధ్యం. తెలుగు ప్రజల కోసం తన జీవితంలో తొలిసారి జైలుకు వెళ్లారు చంద్రబాబు.
- అలాగే అన్నదాత కోసం ఆనాడు 8 రోజులపాటు నిరాహారదీక్ష చేసారు చంద్రబాబు. ప్రజాసమస్యలు తెలుసుకోవడం కోసం... అక్టోబర్ 2, 2012 నుండి ఏప్రిల్ 27, 2013 వరకు ''వస్తున్నా మీ కోసం' అంటూ పాదయాత్ర చేపట్టి... 63 సంవత్సరాల వయసులో 208 రోజులపాటు, 2,817 కి.మీల దూరం నడిచారు చంద్రబాబు. పార్టీ పెట్టిన కొత్తలో ఎన్టీఆర్ చైతన్య రథయాత్ర తర్వాత... ప్రజల నుంచి అంతటి అపూర్వ స్పందన చంద్రబాబు పాదయాత్రకు లభించింది. ఎక్కడికక్కడ తెలుగుదేశం శ్రేణుల్లో కదనోత్సాహాన్ని నింపింది.
- ఉత్తరాఖండ్ వరదల్లో చిక్కుకున్న తెలుగువారిని ప్రభుత్వం పట్టించుకోకపోతే చంద్రబాబు స్వయంగా వెళ్లి బాధితులను ప్రత్యేక విమానంలో సురక్షితంగా వెంటబెట్టుకు రావడం ఒక అపూర్వ ఘట్టం.
- 2004 నుండి 2014 వరకు జరిగిన పాలనా విధ్వంసం కారణంగా... రూ.16వేల కోట్ల లోటు బడ్జెట్ తో రాజధాని కూడా లేని ఆంధ్రప్రదేశ్ ఏర్పడింది. అలాంటి నవ్యాంధ్రను తలెత్తుకునేలా తీర్చిద్దిద్దమని ఆంధ్రులు చంద్రబాబుకు బాధ్యత అప్పచెప్పారు.
- కొద్దిరోజులకే విశాఖపై హుదుద్ తుఫాను భీకర దాడిచేసింది. అయితేనేం తుఫానుకు ఎదురెళ్లి ప్రజలకు తోడుగా నిలిచాడు చంద్రబాబు. ఆ ధీరత్వానికి, బాధ్యత నిర్వహణకి, కర్తవ్య దీక్షకి తుఫాను కూడా చిన్నబోయింది. తానూ సృష్టించిన భీభత్సాన్ని, చేసిన విధ్వంసాన్ని వరం రోజుల్లోపే సరిదిద్దిన సమర్థుడిని చూసి హుద్ హుద్ తలవంచింది.
- అవరోధాలనే అవకాశాలుగా మలుచుకునే నేర్పరితనం చంద్రబాబు సొంతం. అందుకే రాజధాని లేని నవ్యాంధ్రకు ప్రపంచ స్థాయి రాజధాని నగరాన్ని అందించడానికి ప్రజా రాజధాని అమరావతిని నిర్మించడానికి పూనుకున్నారు చంద్రబాబు. ఆయన మీది నమ్మకంతో అడగ్గానే రాజధాని కోసం 33 వేల ఎకరాలను ప్రజలు ఇవ్వడం నభూతో నభవిష్యతి. సచివాలయం, హై కోర్టు నిర్మాణాలు రికార్డు స్థాయిలో జరిగాయి
- చంద్రబాబు మార్కు అభివృద్ధికర పాలనతో ఆంధ్రప్రదేశ్ అన్ని రంగాలలోనూ గర్వంగా తలెత్తుకునే స్థాయికి చేరింది. కియా, హీరో, సెల్కాన్ వంటి ఎన్నో కంపెనీలు ఏపీకి వరుసకట్టాయి.
- ఇక పోలవరం ప్రాజెక్టు నిర్మాణాన్ని దాదాపు తుది దశకు తీసుకురావడం, పట్టిసీమ పూర్తి... ఇలాంటివన్నీ చంద్రబాబుకు తప్ప అనితరసాధ్యం.
- ప్రతిపక్షంలో ఉన్నా అధికారంలో ఉన్నా ప్రజల పక్షమైన తెలుగుదేశం పార్టీకి విశ్రాంతి అనేది లేదు. సమసమాజం నిర్మించబడి, పేదరికం లేని ఆనందకరమైన జీవితం ప్రతి తెలుగువాడికి అందించే వరకు జీవనదిలా, నిత్య చైతన్య ప్రవాహంలా చరిత్రను తనలో ఇముడ్చుకుంటూ ముందుకు పోతుంది తెలుగుదేశం. పసుపు అంటే ప్రజలకు శుభాన్ని ఇచ్చేది. పసుపు దళం అంటే ప్రజలకు భరోసా ఇచ్చేది. తెలుగుదేశం అంటే అప్రతిహత శక్తి ప్రసారిణి.
