అమరావతి (చైతన్యరథం): రాష్ట్రంలో పూర్తిగా ధ్వంసమైన రాష్ట్ర, జిల్లా ప్రధాన రహదారులు, ఇతర రహదారులకు సంబంధించి మరమ్మతులను త్వరితగతిన పూర్తి చేయడమే లక్ష్యంగా రాష్ట్ర ప్రభుత్వం నిధులు కేటాయిస్తోందని రోడ్లు , భవనాలు, పెట్టుబడులు, మౌలిక సదుపాయాల శాఖల మంత్రి బీసీ జనార్థన్ రెడ్డి తెలిపారు. ముఖ్యమంత్రి చంద్రబాబు సూచనల మేరకు సంక్రాంతి నాటికి గుంతల రహిత రహదారులే లక్ష్యంగా మరమ్మతు పనులను వేగవంతం చేసేందుకు 3 జీవోలను సైతం విడుదల చేసినట్లు మంత్రి తెలిపారు. అదే సమయంలో వేగంగా రోడ్ల మరమ్మతులను పూర్తి చేయడానికి 7 రోజుల వ్యవధిలో షార్ట్ టర్మ్ టెండర్లు కూడా ఆహ్వానిస్తున్నట్లు తెలిపారు. రాష్ట్రంలో రోడ్లను గుంతల రహిత రహదారులుగా మార్చడానికి, అదే విధంగా రాష్ట్ర హైవేలు, జిల్లా ప్రధాన రహదారుల వెంబడి పెరిగిన ముళ్ల కంపలను తొలగించడానికి మొత్తంగా రూ. 210 కోట్లు ఇప్పటికే కేటాయించామన్నారు. దీనికి సంబంధించి ఇప్పటికే 1839 పనులకు గానూ రూ.198.84 కోట్లు కేటాయించగా, మిగిలిన రూ.11.16 కోట్లకు సంబంధించిన పనులు మరో దశలో చేపడాతమన్నారు.
రూ. 198.84 కోట్లలో రాష్ట్ర హైవే పనులకు సంబంధించి రూ. 50.46 కోట్లు, జిల్లా ప్రధాన రహదారులకు సంబంధించి రూ.148.38 కోట్లు కేటాయించామన్నారు. మొత్తం 1839 పనుల్లో 687 మైనర్ మరమ్మతులు, 473 తీవ్రమైన గుంతలు, 679 ముళ్ల కంపలకు సంబంధించిన పనులు ఉన్నాయన్నారు. అలాగే జిల్లా ప్రధాన రహదారులు, రాష్ట్ర హైవేలకు డిజాస్టర్ మేనేజ్మెంట్ నిధుల కింద రూ.140 కోట్లు కేటాయించామన్నారు. ఇందులో జిల్లా ప్రధాన రహదారులకు సంబంధించి 1766 కి.మీ మేర 350 పనుల కోసం రూ.92.75 కోట్లు, రాష్ట్ర హైవేలకు సంబంధించి 796 కి.మీ మేర 128 పనుల కోసం రూ. 47.25 కోట్లు కేటాయించామని మంత్రి తెలిపారు. ఆగస్ట్, సెప్టెంబర్ నెలల్లో వర్షాలు, వరదల వల్ల తీవ్రంగా ధ్వంసమైన రాష్ట్ర హైవేల్లో సీడీ వర్క్లు, జిల్లా ప్రధాన రహదారులను శాశ్వత ప్రాతిపదికన పునర్నిర్మించడానికి డిజాస్టర్ మేనేజ్మెంట్ నిధుల నుండి రూ. 220.41 కోట్లు కేటాయించామన్నారు. ఇందులో రాష్ట్ర హైవేలకు సంబంధించి రూ.102.30 కోట్లతో 75 పనులను, జిల్లా ప్రధాన రోడ్లకు సంబంధించి 118.10 కోట్లతో 145 పనులను చేపట్టనున్నట్లు తెలిపారు..
