అమరావతి : హైదరాబాద్‌ గచ్చిబౌలిలో ఐటీ ఉద్యోగులు నిర్వహించిన సీబీఎన్‌ గ్రాటిట్యూడ్‌ కాన్సర్ట్‌ కార్యక్రమం ఊహించినదానికంటే మిన్నగా విజయవంతం కావడంతో టీడీపీ నాయకుడు, హిందూపురం ఎమ్మెల్యే బాలకృష్ణ సోషల్‌ మీడియా ద్వారా స్పందించారు. గచ్చిబౌలిలో చంద్రబాబుకు కృతజ్ఞతతో ఏర్పాటు చేసిన సంగీత విభావరి సభకు హాజరైన అభిమానులకు ఆయన ప్రత్యేకంగా ధన్యవాదాలు తెలియజేశారు. చంద్రబాబుకు తిరుగులేని మద్దతు ఇచ్చారని.. ఈ సభ ద్వారా అభిమానులు తమ ప్రియతమ నేత పట్ల చూపించిన ప్రేమ, గౌరవం తనను కదిలిచిందని బాలకృష్ణ అభిప్రాయపడ్డారు. విజనరీ నేతగా పేరు పొందిన చంద్రబాబును జైలులో పెట్టినా రాజకీయంగా తాము దృఢంగా ఉన్నామని ఆయన స్పష్టం చేశారు. చంద్రబాబు పెట్టిన కేసులు రాజకీయ కక్షతోనే పెట్టారని తాము విశ్వసిస్తున్నామని.. తాము కష్టకాలంలో ఉన్న సమయంలో ఈ సభ ద్వారా అభిమానులు సంఫీుభావం తెలపడం ఎంతో ఉత్సాహాన్ని నింపిందన్నారు. అనివార్య కారణాల వల్ల తాను ఈ సభకు హాజరుకాలేకపోయినా అభిమానులు చూపించిన నమ్మకానికి, నిబద్ధతకు రుణపడి ఉంటానని.. చంద్రబాబుకు ఇది కొండంత బలాన్ని ఇస్తుందని బాలయ్య పేర్కొన్నారు. త్వరలోనే చంద్రబాబు కడిగిన ముత్యంలా జైలు నుంచి విడుదల అవుతారని బాలకృష్ణ ఆశాభావం వ్యక్తం చేశారు.
చంద్రబాబుపై అభిమానం కదిలించింది: బాలకృష్ణ
