- క్షేత్రస్థాయిలో నివేదికలు తెప్పించుకున్నాం
- 6 రాష్ట్రాల్లో మద్యం అమ్మకాలను పరిశీలించాం
- గీత కార్మికులకు 10 శాతం మద్యం దుకాణాలు
- నూతన మద్యం పాలసీపై కేబినెట్‌ సబ్‌కమిటీ వెల్లడి
- ఎక్సైజ్‌ వ్యవస్థను భ్రష్టు పట్టించిన వైసీపీ
- నాసిరకాలతో ప్రజారోగ్యాన్ని దెబ్బతీశారు
- మద్య నిషేధానికి మాటిచ్చి.. దోపిడీ సాగించారు
- జె బ్రాండ్లతో వేలకోట్లు గత పాలకుల జేబుల్లోకి..
- మల్టీ నేషనల్‌ కంపెనీలు వెనక్కి పోయాయని వ్యాఖ్య
అమరావతి (చైతన్య రథం): రాష్ట్ర ప్రజల ఆరోగ్యాన్ని దృష్టిలో ఉంచుకుని నాణ్యమైన మద్యాన్ని సరసమైన ధరలకు అందించేలా కొత్త ఎక్సైజ్‌ పాలసీ రూపొందుతుందని మంత్రివర్గ ఉపసంఘం స్పష్టం చేసింది. కేబినెట్‌ సబ్‌ కమిటీలో సభ్యులైన మంత్రులు కొల్లు రవీంద్ర, నాదెండ్ల మనోహర్‌, సత్యకుమార్‌ యాదవ్‌, కొండపల్లి శ్రీనివాస్‌ మంగళవారం రాష్ట్ర సచివాలయంలో మీడియా సమావేశం నిర్వహించారు. సమావేశంలో ఎక్సైజ్‌ మంత్రి కొల్లు రవీంద్ర మాట్లాడుతూ.. ‘గత ప్రభుత్వంలో విచ్చలవిడిగా మద్య విధానాన్ని భ్రష్టుపట్టించారు. ఎక్సైజ్‌ వ్యవస్థను గుప్పిట్లో పెట్టుకున్నారు. సెబ్‌ పేరుతో వ్యవస్థను విధ్వంసం చేశారు. 70 శాతం ఉద్యోగులను అక్రమ మద్య విధానం అమలుకు ఉపయోగించుకున్నారు. ప్రభుత్వ మద్యం దుకాణాల పేరిట మల్టీ నేషనల్‌ కంపెనీల బ్రాండ్లు లేకుండా చేసి, సొంత జె బ్రాండ్లను అందుబాటులోకి తెచ్చారు. 2019 ఎన్నికల్లో మద్యపాన నిషేధమంటూ మాయమాటలు చెప్పారు. తర్వాత దశల వారీగా మద్య నియంత్రణంటూ మోసం చేశారు. సామాన్యుడు అప్పులు తెచ్చి, పుస్తులు అమ్మి మందు తాగే దుస్థితి తెచ్చారు.
దీంతో మద్యం ద్వారా ప్రభుత్వానికి రావాల్సిన ఆదాయం వారి జేబుల్లోకి వెళ్లింది. డిప్యుటేషన్‌ మీద అర్హతలేని వ్యక్తిని తీసుకొచ్చి వ్యవస్థను భ్రష్టుపట్టించారు. వారి విధానంతో మల్టీ నేషనల్‌ కంపెనీలు వెనక్కి వెళ్లిపోయాయి. నాసిరకం మద్యం తాగి చాలామంది అనారోగ్యంపాలై మృత్యువాత పడ్డారు. కిడ్నీ సమస్యలు, పెరాలసిస్‌వంటి సమస్యలతో మంచానపడ్డారు. డిస్టలరీస్‌ వ్యవస్థను కూడా వారి చేతుల్లోకి తీసుకున్నారు. గత ఐదేళ్లలో వారి అక్రమ మద్య విధానంపై ఎన్నో పోరాటాలు చేశాం. దాదాపు రూ.19 వేల కోట్ల నిధులు దారి మళ్లించారు. చాలామంది నాటుసారా, నాన్‌ డ్యూటీ పెయిడ్‌ లిక్కర్‌, గంజాయి, డ్రగ్స్‌కు అలవాటుపడ్డారు. ఈ నేపథ్యంలో కూటమి ప్రభుత్వం అధికారంలోకి వచ్చిన తర్వాత ఎన్నికల్లో ఇచ్చిన హామీ మేరకు నూతన మద్య విధానంపై సీఎం ఆదేశాలతో కేబినెట్‌ సబ్‌ కమిటీ ఏర్పాటైంది. ఈ కమిటీ క్షేత్రస్థాయిలో విచారణ చేసి బెస్ట్‌ పాలసీలపై అధ్యయనం చేసింది.
అప్పట్లో 1994లో అమలు చేసిన విధానం దేశానికే ఆదర్శంగా నిలిచింది. దానిని ఆదర్శంగా తీసుకుని 6 రాష్ట్రాల్లో నూతన పాలసీపై అధ్యయనం చేశాం. అక్కడి ప్రభుత్వ, ప్రైవేట్‌ మద్యం షాపులు, ప్రభుత్వ, ప్రైవేట్‌ కలిపి నడుపుతున్న మద్యం షాపుల విధానాలను అధ్యయనం చేశాం. సరసమైన ధరలకు నాణ్యమైన మద్యం అందించేలా ప్రపోజల్స్‌ను బుధవారం కేబినెట్‌ ముందుంచుతాం. డ్రగ్స్‌ వంటివాటిని నియంత్రించేలా, మత్తుకు బానిసలైనవారిని రక్షించేలా కొన్ని చర్యలకు నిధులు కేటాయించనున్నారు. 5-6 పరీక్షలు నిర్వహించిన తర్వాతే మద్యాన్ని అందుబాటులోకి తీసుకురావడం జరుగుతుంది. మా ప్రభుత్వం అధికారంలోకి వచ్చిన తర్వాత కల్తీ మద్యం విక్రయాలను నిలిపివేశాం. గత ప్రభుత్వ పాలసీపై జరుగుతున్న విచారణలో ఎంతటివారున్నా వదిలే ప్రసక్తి లేదు. గత ప్రభుత్వంలో డిస్టలిరీస్‌ను కూడా కబ్జా చేశారు. ఎన్నికల్లో ఇచ్చిన హామీ మేరకు గీత కార్మికులకు 10 రిజర్వేషన్లు కల్పించి మద్యం షాపులు కేటాయించడం జరుగుతుంది. గత ప్రభుత్వ మద్యం పాలసీ ఈ సెప్టెంబర్‌తో పూర్తవుతుంది. రిటైర్డ్‌ జడ్జితో టెండర్‌ కమిటీ అలాగే జిల్లాస్థాయి కమిటీలు కూడా ఏర్పాటు చేయడం జరుగుతుంది’ అని వివరించారు.
రాష్ట్ర పౌర సరఫరాల మంత్రి నాదెండ్ల మనోహర్‌ మాట్లాడుతూ ‘క్షేత్రస్థాయిలో వివిధ సంఘాల ఫీడ్‌ బ్యాక్‌ తీసుకున్నాం. మాకున్న అవగాహనతో కొత్త మద్యం పాలసీ రూపాకల్పనలో సహకరించాం. దీనికిముందు మంత్రివర్గ ఉపసంఘం ముఖ్యమంత్రితో సమావేశమై చర్చించడం జరిగింది. రేపు కేబినెట్‌ ముందు నూతన లిక్కర్‌ పాలసీ ప్రపోజల్స్‌ను పెడతాం. గత ప్రభుత్వం ఎక్సైజ్‌ పాలసీతో జేబులు నింపుకోవడానికి ప్రయత్నించింది. విచిత్రంగా ఇష్టం వచ్చిన విధంగా ధరలు పెంచుకుంటూ పోయారు. గత ప్రభుత్వంలో మద్యం రేట్ల విషయంలో ఒకేరోజు జీవో నెంబర్‌ 128, జీవో నెంబర్‌ 129 పేర్లతో రెండు జీవోలు జారీ చేశారు. ఇప్పుడు కూటమి ప్రభుత్వంలో కొత్తగా తీసుకొస్తున్న మద్యం విధానంవల్ల మార్పు కనిపిస్తుంది. ఎన్నికల్లో ఇచ్చిన హామీలను జాగ్రత్తగా స్టడీ చేశాం. ఎన్‌ఫోర్స్‌మెంట్‌ను బలోపేతం చేస్తాం. డి`అడిక్షన్‌ సెంటర్లు, కౌన్సిలింగ్‌ సెంటర్లకు నిధులు కేటాయిస్తాం. నూతన మధ్య విధానంతో రాష్ట్రంలో పెట్టుబడులు, ఉద్యోగాలు కల్పిన జరిగేలా ప్రత్యేక చర్యలు తీసుకుంటారు.
సర్వీస్‌ ఇండస్ట్రీ, టూరిజం డిపార్ట్‌మెంట్‌ను బలోపేతం చేసేలా నూతన పాలసీ ఉంటుంది. వినియోగదారునికి వెసులబాటు కల్పిస్తూ క్వాలిటీ మద్యం అందించడం జరుగుతుంది. ప్రీమియం అవుట్‌ లెట్స్ పెట్టడం జరుగుతుంది. టాక్స్‌ స్ట్రక్చర్‌ను సులభతరం చేసేలా చర్యలు తీసుకోవడం జరిగింది’ అని వివరించారు. రాష్ట్ర వైద్య, ఆరోగ్య మంత్రి సత్యకుమార్‌యాదవ్‌ మాట్లాడుతూ.. ‘గత ఐదేళ్లలో మద్యం ద్వారా వచ్చిన ఆదాయంతో గత పాలకులు వారి జేబులు నింపుకున్నారు. నాసిరకం మందుతో మధ్యతరగతి ప్రజల జీవితాలతో చెలగాటమాడారు. వారి స్వలాభం కోసం వేలాది అక్కచెల్లమ్మల పుస్తెలతాడులు తెంపారు. 2014-2019లో రాష్ట్రంలో 36 వేల కిడ్నీ, కాలేయ సంబంధిత అనారోగ్య సమస్యలు నమోదైతే.. 2019-2024లో రాష్ట్రంలో 56 వేలకు పైగా కిడ్నీ, కాలేయ సంబంధిత అనారోగ్య సమస్యలు నమోదయ్యాయి.
కూటమి ప్రభుత్వంలో నూతన లిక్కర్‌ పాలసీతో ఆరోగ్యానికి భద్రత కల్పించాలి. నాణ్యమైన మద్యం సరసమైన ధరలకే అందించడం జరుగుతుంది. ఏపీ బేవరేజ్‌ కార్పొరేషన్‌ పేరుతో రూ.13 వేల కోట్లు అప్పు తెచ్చారు. వారి జేబులను నింపుకోవడం కోసం మందు బాబులు విషయంలో కూడా దోచేశారు. ఈ భారం కూడా ప్రస్తుత ప్రభుత్వంపై పడిరది. నాణ్యమైన మద్యం, ప్రజల ఆరోగ్యం, పక్క రాష్ట్రాలతో పోటీపడేలా కొత్త ఎక్సైజ్‌ పాలసీ రూపకల్పన జరిగింది. ఎన్సీఆర్బీ డేటా ప్రకారం నకిలీ మద్యం ద్వారా వచ్చే సమస్యలతో 2019లో ఆత్మహత్యలు 100శాతం పెరిగాయి. ఇవి ఆత్మహత్యలు కాదు గత ప్రభుత్వ హత్యలు. ఈ మద్య విధానాన్ని రూపొందించిన గత పాలకులపై చర్యలు తీసుకోవాలి. ఈ పరిస్థితులను చక్కదిద్దుతూ దేశంలోని బెస్ట్‌ పాలసీని ప్రవేశపెట్టేలా చర్యలు తీసుకుంటున్నాం’ అన్నాంరు.
రాష్ట్ర సూక్ష్మ, చిన్న, మధ్య తరహా పరిశ్రమలు, సెర్ప్‌, ఎన్నారై సాధికారిత సంబంధాల మంత్రి కొండపల్లి శ్రీనివాస్‌ మాట్లాడుతూ.. ‘ముఖ్యమంత్రి చంద్రబాబునాయుడు ఆదేశాలతో నూతన మద్యం పాలసీపై సబ్‌ కమిటీ ఏర్పాటైంది. ఆయా శాఖల అధికారులు ఇచ్చిన ప్రతిపాదనలతో ఆరు రాష్ట్రాల్లో పర్యటించాం. ప్రజలు నాణ్యమైన మద్యాన్ని కోరుకుంటున్నారు. సెర్ప్‌ లెక్కల ప్రకారం గత ఐదేళ్లలో నాసిరకం మందు విక్రయాల ద్వారా ఎంతోమంది అనారోగ్యం పాలై చనిపోయారు. దీంతో వితంతు, ఒంటరి పెన్షన్లు పెరిగాయి. అందుకే రాష్ట్రంలో బెస్ట్‌ పాలసీని అమలు చేయబోతున్నాం. మల్టీ నేషనల్‌ కంపెనీలు కూడా తక్కువ ధరకే మద్యం అందించేలా చర్యలు తీసుకోవడం జరుగుతుంది’ అన్నారు.
