అమరావతి: ఆంధ్రప్రదేశ్ సిఐడిలోని కళంకిత అధికారులపై చర్యలు తీసుకొని బాధితులకు సత్వరం న్యాయం చేయాలని తెలుగుదేశం పార్టీ జాతీయ ప్రధాన కార్యదర్శి వర్ల రామయ్య… జాతీయ మానవహక్కుల కమిషన్కు విజ్జప్తిచేశారు. ఈ మేరకు రామయ్య సోమవారం ఎన్హెచ్ఆర్సీకి ఒక లేఖరాశారు. లేఖ సారాంశం ఇలా ఉంది. అధికార పార్టీ కి అనుకూలంగా ఏపీ సిఐడి ఇటీవలి కాలంలో అర్ధరాత్రి అరెస్టులు చేస్తూ అపఖ్యాతి పాలౌతున్నది. సీఐడీ చర్యలు భారత రాజ్యాంగంలో పొందుపరచిన ప్రజాస్వామ్యం, ప్రాథమిక హక్కులు, మానవ హక్కులకు తీవ్ర ప్రమాదకరంగా తయారయ్యాయి. 2022 జూన్ 29 న సిఐడి పోలీసులు గార్లపాటి వెంకటేశ్వరరావును అక్రమ అరెస్ట్ చేసి చిత్రహింసలకు గురిచేసిన ఘటన సిఐడి వికృత తీరుకు నిదర్శనం. సీఐడీ పోలీసులు దొంగల మాదిరి గోడ దుకడమే కాకుండా తలుపులు పగులగొట్టారు. లైట్లు ఆర్పివేసి వెంకటేశ్వరావు తల్లి, సోదరితో అనుచితంగా ప్రవర్తించారు. 41-A నోటీసు ఇచ్చేందుకు గోడ దూకి తలుపులు పగలగొట్టాల్సిన అవసరం ఏమిటి? 41-A నోటీసు అందజేసేందుకు హింసాత్మకంగా వ్యవహరిస్తున్నారు? 30 జూన్ 2022 న ఉదయం మోకరాల సాంబశివరావును మంగళగిరిలో బలవంతంగా అరెస్టు చేశారు. అరెస్టు సమయంలో సాంబశివ రావు భార్య బిడ్డకు పాలు ఇస్తున్నా బెడ్రూమ్లోకి బలవంతంగా వెళ్లారు. వెంకటేశ్వరరావు, సాంబశివరావులను వేర్వేరు గదుల్లో ఉంచి చిత్రహంసలకు గురిచేశారు. వెంకటేశ్వరరావును కొట్టడంతో తీవ్ర గాయాలై అంతర్గత అవయవాలు దెబ్బతిన్నాయి. సాంబశివరావును సైతం తీవ్ర చిత్రహింసలకు గురిచేయడంతో అతని కాళ్లలో తీవ్రమైన అంతర్గత గాయాలయ్యాయి. సిఐడి సిబ్బంది బాధితుల బట్టలూడదీసి నగ్నంగా మార్చి చిత్రహింసలు పెట్టడం విస్మయం కలిగిస్తోంది. వైసీపీ గౌరవాధ్యక్షురాలు వైఎస్ విజయమ్మ తన పదవికి రాజీనామా చేసినట్లు ఫోర్జరీ లేఖను తయారు చేశారనే సాకుతో సీఐడీ అధికారులు ఇదంతా చేశారు. దోపిడీ దొంగల్లా సీఐడీ అధికారులు వ్యవహరించాల్సిన అవసరం ఏముంది? కస్టడీలో బాధితులను చిత్రహింసలు పెట్టాల్సిన అవసరం ఏమిటి? అధికార వైసీపీ నేతలకు ఒక రకంగా, మిగిలిన ప్రజలకు మరో రకంగా భారత రాజ్యాంగం అమలు చేస్తున్నట్లు కనిపిస్తోంది. సీఐడీ కళంకిత అధికారులచే ఇటువంటి అక్రమ అరెస్టులు చేయిస్తున్నారు. గతంలో గృహహింస కేసు నమోదైన సీఐడీ అడిషనల్ డీజీ పివి సునీల్ కుమార్ వంటి కళంకిత అధికారులను ప్రభుత్వం ఉపయోగించుకుంటోందని ప్రజలు అనుకుంటున్నారు.
రెండు సామాజిక వర్గాల మధ్య శత్రుత్వం ప్రోత్సహించారని పివి సునీల్ కుమార్పై తీవ్రమైన ఆరోపణలు ఉన్నాయి. గార్లపాటి వెంకటేశ్వరరావును అర్ధరాత్రి అరెస్టు చేయడంలో కీలకపాత్ర పోషించిన సిఐడి డిఎస్పీ కె. చెంచు రామారావు గతంలో సస్పెండ్ చేయబడ్డారు. ఆయనపై అనేక తీవ్ర ఆరోపణలు ఉన్నాయి. సిఐ జగదీష్ కూడా ఓ వివాహితను మోసం చేసి ఆమెతో బిడ్డను కనడం లాంటి తీవ్రమైన ఆరోపణలు ఉన్నాయి. ఇలాంటి కళంకిత అధికారులను ప్రలోభపెట్టి వైసీపీ ప్రభుత్వం అసమ్మతిని అణిచివేసేందుకు ఉపయోగిస్తోంది. ఈ నేపథ్యంలో సీఐడీ దుశ్చర్యలపై సమగ్ర విచారణ జరిపించాలని అభ్యర్థిస్తున్నాను. కళంకిత అధికారులు సస్పెన్షన్లో ఉండేలా చర్యలు తీసుకోండి. బాధితులకు నష్టపరిహారం అందించి సత్వరమే న్యాయం జరిగేలా చూడాలని వర్ల రామయ్య విజ్జప్తిచేశారు.
