.అమరావతిని మహానగరం చేయాలని భావించా!
.ప్రభుత్వంపై తిరుగుబాటు మొదలైంది…
.అందుకే ఎక్కడికక్కడ వైసిపి నేతల నిలదీతలు
.2019లో టిడిపి ఓటమితో రాష్ట్రానికి తీరని నష్టం
.గన్నవరం నియోజకవర్గం నుంచి భారీగా చేరికలు
అమరావతి: ఉమ్మడి రాష్ట్రంలో 2004లో తన తరువాత జగన్ లాంటి వ్యక్తి సిఎంగా వచ్చి ఉంటే హైదరాబాద్‌ శ్మశానంగా మారిపోయేదని టిడిపి అధినేత నారా చంద్రబాబు నాయుడు పేర్కొన్నారు. తెలంగాణకు హైదరాబాద్‌ మాదిరిగానే విభజిత ఆంధ్రప్రదేశ్ కు అమరావతి ఉండాలని భావించానని తెలిపారు. 2019లో టీడీపీ ఓటమి వల్ల రాష్ట్రానికి తీవ్ర నష్టం వాటిల్లిందని తెలిపారు. గన్నవరం నియోజకవర్గం రామవరప్పాడు గ్రామానికి చెందిన బిసి సంఘాల నేతలు, కార్యకర్తలు చంద్రబాబు సమక్షంలో గురువారం టిడిపిలో చేరారు. ఈ సందర్భంగా చంద్రబాబు రాష్ట్రంలో పాలనా వైఫల్యాలపై మాట్లాడుతూ ప్రస్తుత రాష్ట్ర పరిస్థితిపై తీవ్ర ఆవేదన వ్యక్తం చేశారు. తాను విజన్‌ తో చేసిన పాలన కారణంగానే హైదరాబాద్‌ నేడు ఉన్నత స్థానంలో ఉందని అన్నారు. ఇప్పుడు ఎపిలో అన్నిటినీ కూల్చేస్తూ ప్రాజెక్టులను ఆపేస్తున్న జగన్ లాంటి వాళ్లు…. 2004లో తన తర్వాత సిఎం అయ్యిఉంటే హైదరాబాద్‌ శ్మశానంగా మారేదన్నారు. హైటెక్‌ సిటీ, ఐఎస్‌ బి లాంటి వాటిని కూల్చేసి, ఎయిర్‌ పోర్ట్‌, రింగ్‌ రోడ్‌ వంటి ప్రాజెక్టులను అపేసి ఉండేవారేమోనని తెలిపారు. నా మీద కక్షతో రాజధాని అమరావతిని స్మశానం చెయ్యాలని చూస్తున్న జగన్ లాంటి వాడికి ఆనాడు అవకాశం వచ్చి ఉంటే… హైదరాబాద్‌ ఏవిధంగా తయారయ్యాదో తలుచుకుంటేనే భయమేస్తోందని అన్నారు. ఆనాడు తాను వేసిన అభివృద్ధి బాట కారణంగా నేడు హైదరాబాద్‌ తెలంగాణ రాష్ట్రానికి ప్రధాన ఆదాయ వనరుగా, ఉపాధి కేంద్రంగా, అభివృద్దికి చిరునామాగా మారిందని చంద్రబాబు గుర్తు చేశారు. అమరావతి కూడా అలా ఉండాలని తాను భావించానని….అందుకే అభివృద్ది చేశానని చంద్రబాబు అన్నారు. ఉడతల కారణంగా కరెంట్‌ తీగలు తెగిపోవడం, ఎలుకలు మద్యం తాగడం, ప్రభుత్వ ఉద్యోగుల సొమ్ము ఉద్యోగుల అకౌంట్లనుంచి మాయం అవడం ఈ ప్రభుత్వంలో మాత్రమే సాధ్యమని చంద్రబాబు ఎద్దేవా చేశారు. ఉద్యోగుల అకౌంట్లలో సొమ్ము మాయం కావడానికి సిఎఫ్‌ఎంఎస్‌ విధానంలో లోపం కారణం కాదని….వైసిపి విధానంలోనే లోపం ఉందని చంద్రబాబు చెప్పారు. తెలంగాణలో 10వ తరగతి పరీక్షల్లో 90 శాతం మంది విద్యార్థులు పాస్‌ అయితే…..ఎపిలో కేవలం 67 శాతం మంది మాత్రమే పాస్‌ అవ్వడమే నాడు- నేడు సాధించిన ప్రగతా అని చంద్రబాబు ప్రశ్నించారు. 2019 టిడిపి ఓటమితో రాష్ట్రం ఎంత నష్టపోయిందో ఇప్పుడు ప్రత్యక్షంగా అంతా చూస్తున్నారని అన్నారు. ప్రజల్లో ఇప్పటికే తిరుగు బాటు మొదలయ్యిందని…అందుకే వైసిపి ఏ కార్యక్రమం మొదలు పెట్టినా జనం ప్రజాక్షేత్రంలో నిలదీస్తున్నారని అన్నారు. ఈ కార్యక్రమంలో టిడిపి రాష్ట్ర అధ్యక్షుడు అచ్చెన్నాయుడు, ఎమ్మెల్సీ, గన్నవరం ఇన్‌ చార్జి బచ్చుల అర్జునుడు తదితరులు పాల్గొన్నారు.
వైసీపీ నుంచి టిడిపిలో చేరిన ప్రముఖులు
బచ్చుల అర్జునుడు సమక్షంలో పలువురు ప్రముఖులు వైసిపి నుంచి టిడిపి తీర్థం పుచ్చుకున్నారు. టిడిపిలో చేరిన ప్రముఖుల్లో సహకార బ్యాంక్‌ మాజీ ఛైర్మన్‌ నదిగాని కొండయ్య, వైసీపీ మండల పార్టీ కార్యదర్శి మల్లెమూడి సుబ్బయ్య, వైసీపీ బూత్‌ కమిటీ సభ్యులు లంకలపల్లి లక్ష్మణరావు, దాసరి సాంబయ్య, వైసీపీ సీనియర్‌ నేతలు బండారు నాగరాజు, పుట్టి నాగరాజు, జంగిలి బాబూరావు తదితరులు పాల్గొన్నారు. ఈ కార్యక్రమంలో టీడీపీ నేతలు మాజీ ఎంపీటీసీ అద్దెపల్లి సాంబు, కృష్ణా జిల్లా వాణిజ్య విభాగం సభ్యులు నరసయ్య, ప్రసాదం పాడు మాజీ సర్పంచ్‌ బొప్పన హరికృష్ణ, రామవరప్పాడు గ్రామపార్టీ అధ్యక్షుడు అద్దెపల్లి శ్రీకాంత్‌, రామవరప్పాడు గ్రామపార్టీ సెక్రటరి మున్నంగి సత్యనారాయణ, మాజీ ఎంపీటీసీ బొమ్మసాని అరుణకుమారి, మండల పార్టీ నేత గొడ్డలి రామారావు, కోనేరు సందీపు, పార్లమెంట్‌ కమిటీ మెంబర్‌ దండు సుబ్రమణ్యరాజు, పట్టపు వెంకటేశ్వరావు, శ్రీరామ్‌, ఆదిమూలపు శివయ్య, కెష్టం సుబ్బారావు, గుజ్జర్ల బాబూరావు, దొంతు చిన్నా తదితరులు పాల్గొన్నారు.
