- జగన్ రెడ్డిపై టీడీపీ రాష్ట్ర అధ్యక్షుడు పల్లా ఫైర్
- దళితుల కన్నా నేరస్థుడు ఎక్కువయ్యాడా
- ఎస్సీ, ఎస్టీ ఎట్రాసిటీ కేసులో అరెస్టయిన ముద్దాయితో ములాఖత్లో మర్మమేమిటి
- మహిళా ద్రోహి వంశీని కలిసేందుకు సిగ్గులేదా
- 10 సూటి ప్రశ్నలతో జగన్కు పల్లా బహిరంగ లేఖ
అమరావతి (చైతన్యరథం): దళిత వ్యతిరేకి, ఎస్సీ, ఎస్టీ ఎట్రాసిటీ కేసులో అరెస్టయి విజయవాడ జైలులో ఉన్న మాజీ ఎమ్మెల్యే వల్లభనేని వంశీని వైసీపీ అధినేత వైఎస్ జగన్ రెడ్డి పరామర్శించడంపై విమర్శలు వెల్లువెత్తుతున్నాయి. అందులో భాగంగా జగన్పై ఏపీ టీడీపీ అధ్యక్షుడు, గాజువాక ఎమ్మెల్యే పల్లా శ్రీనివాసరావు మండిపడ్డారు. ఏ గూటి పక్షులు ఆ గూటికి చేరినందుకు వంశీకి మద్దతు ఇస్తున్నారా అని జగన్ మోహన్ రెడ్డిని ప్రశ్నించారు. జైలులో ఉన్న దళిత వ్యతిరేకి, మహిళా ద్రోహి వంశీని పరామర్శించేందుకు వచ్చారా అని జగన్ను నిలదీశారు. దోపిడిదారుడు వంశీతో ఎందుకు జైలులో ములాఖత్ అయ్యారో సమాధానం చెప్పాలని జగన్ను పల్లా శ్రీనివాసరావు డిమాండ్ చేశారు. ఆ క్రమంలో ఈ 10 ప్రశ్నలకు సమాధానం చెప్పాలంటూ జగన్కు ఆయన బహిరంగ లేఖ రాశారు.
1. దళిత ఉద్యోగి సత్యవర్ధన్ను కిడ్నాప్ చేసి హింసించి, హత్య చేస్తానని బెదిరించి ఎస్సీ, ఎస్టీ, అట్రాసిటీ చట్టాన్ని ధిక్కరించిన వంశీని ఏ మొహం పెట్టుకుని పరామర్శిస్తావ్ జగన్ రెడ్డి.. నీకు దళితుల కన్నా నేరస్థుడు ఎక్కువైపోయాడా?
2. ప్రజాస్వామ్య దేవాలయం అసెంబ్లీలోనే దుశ్శాసనునిలాగా మహిళల వ్యక్తిత్వాన్ని కించపరిచిన నేరస్థుడిని ఏరకంగా పరామర్శిస్తావ్ జగన్ రెడ్డి? మహిళల వ్యక్తిత్వం కన్నా నేరస్థుడు వంశీ ఎక్కువైపోయాడా?
3. గన్నవరం తెలుగుదేశం పార్టీ కార్యాలయాన్ని నిలువునా తగలబెట్టించి, గన్నవరం మహిళా కార్యకర్తలపై అక్రమ కేసులు పెట్టించి, వారాల తరబడి హింసించిన వంశీని ఎలా పరామర్శిస్తావ్ జగన్ రెడ్డి?
4. తల్లి, చెల్లిపై అసభ్యకరంగా పోస్టులు పెట్టించిన నీకు.. ఇతర మహిళలపైన గౌరవం ఉంటుందా?
5. సంకల్ప సిద్ధి చిట్ఫండ్స్ కుంభకోణంలో 16 వేల కుటుంబాలను రోడ్డున పడేసిన వంశీని ఎలా పరామర్శిస్తావ్ జగన్ రెడ్డి?
6. పట్టిసీమ కాలువ గట్టు మట్టిని అక్రమంగా తరలించిన రైతుల ద్రోహిని ఎలా పరామర్శిస్తావ్ జగన్ రెడ్డి?
7. గన్నవరం నియోజకవర్గం ప్రజలకు 11 వేల దొంగ ఇళ్ల పట్టాలు ఇచ్చి సొంత ఇంటి కలను దూరం చేసిన వంశీని ఏవిధంగా మద్దతు పలుకుతావ్ జగన్ రెడ్డి?
8. బాపులపాడు, గన్నవరం, మండవల్లి ప్రాంతాల్లో చెరువులను, కొండలను అక్రమంగా తవ్వించి అమ్ముకున్న గ్రావెల్ మాఫియా నాయకుడు వంశీకి ఎలా మద్దతు ఇస్తావ్ జగన్ రెడ్డి?
9. ఎయిర్ పోర్టు భూములను సైతం కబ్జా చేసిన వంశీని ఎందుకు కలుస్తున్నావో అత్మపరిశీలన చేసుకో జగన్ రెడ్డి.
10. విజయవాడ రూరల్ మండలంలో ఉన్న 9 గ్రామాల్లో ఒక్క లే అవుట్ లో కూడా కామన్ సైట్లు వదలకుండా కబ్జా చేసిన వంశీని ఎందుకు పరామర్శిస్తున్నావ్ జగన్ రెడ్డి?
