- నామినేషన్‌ ఫీజు సమకూర్చిన నిరుద్యోగులు, మహిళలు, వికలాంగులు, రైతులు
- లక్ష మెజారిటీ ఖామయని భువనమ్మ ధీమా
- కుప్పం గడ్డ..టీడీపీ అడ్డా అని ఉద్ఘాటన
కుప్పం(చైతన్యరథం): ఓటు అనే ఆయుధంతో రాక్షస పాలకులను గద్దె దించాలని టీడీపీ అధినేత చంద్రబాబు సతీమణి నారా భువనేశ్వరి పిలుపు ఇచ్చారు. వైసీపీ దుర్మార్గపు పాలనకు రానున్న ఎన్నికల్లో ముగింపు పలకాలన్నారు. చిత్తూరు జిల్లా కుప్పంలో శుక్రవారం వేలాదిమంది నాయకులు, కార్యకర్తలు తరలిరాగా చంద్రబాబు తరఫున భువనేశ్వరి నామినేషన్‌ పత్రాలు దాఖలు చేశారు. మధ్యాహ్నం 1:27 గంటలకు రిటర్నింగ్‌ అధికారులకు భువనేశ్వరి నామినేషన్‌ పత్రాలు సమర్పించారు. అనంతరం ఆమె మాట్లాడుతూ కుప్పం ప్రజలకు, టీడీపీ బిడ్డలకు నమస్కారాలు తెలిపారు. కుప్పం గడ్డ … టీడీపీ అడ్డా అన్నారు. కుప్పంలో పసుపు జెండా తప్ప మరో జెండాకు తావులేదు. చంద్రబాబును అక్రమంగా అరెస్టు చేసినప్పుడు నేను నిజం గెలవాలి కార్యక్రమాన్ని చేశాను.
ఆ సందర్భంగా నా పార్టీ బిడ్డల కుటుంబాలను నేరుగా కలవడం నా అదృష్టంగా భావిస్తున్నాను. నిజం గెలవాలి కార్యక్రమం సమయంలో పార్టీ బిడ్డలే నాకు అండగా నిలిచారు. నేడు కుప్పంలో అంతకు మించి అన్నట్టు మీ ఉత్సాహం, ఆనందం చూస్తుంటే లక్ష మెజార్టీ ఖాయం అనిపిస్తోంది. నామినేషన్‌ కు బయలుదేరినప్పుడు యువత, నిరుద్యోగులు, మహిళలు, వికలాంగులు, రైతులు వచ్చి నామినేషన్‌ ఫీజుకు అవసరమైన మొత్తం ఇచ్చి, చంద్రబాబు సీఎం అయితేనే తమ భవిష్యత్తు బాగుంటుందన్నారు.. వారు ఇచ్చిన డబ్బులతోనే నామినేషన్‌ వేస్తున్నానని భువనేశ్వరి తెలిపారు.
జెండాలు వేరైనా అజెండా ఒక్కటే
చంద్రబాబు ఏపీని దేశంలోనే నంబర్‌ వన్‌ స్థానంలో నిలబెట్టాలని చూశారు. వైసీపీ పాలనలో రాష్ట్రాన్ని దోచేశారు. వైసీపీ నేతల దోపిడీకి అడ్డుపడిన టీడీపీ కార్యకర్తలను దారుణంగా చంపేశారు. వైసీపీ పాలనలో మహిళలు సహా ఎవరికీ రక్షణ లేదు. రాష్ట్రంలోని అన్ని ప్రాంతాల ప్రజలు వైసీపీ పాలనలో నలిగిపోయారు. రాష్ట్రంలో ప్రాంతాలు వేరైనా మనమంతా ఒక్కటే. టీడీపీ, జనసేన, బీజేపీ పార్టీలకు జెండాలు వేరైనా అజెండాలు ఒక్కటే… అది ప్రజా ప్రభుత్వాన్ని స్థాపించడం. మే 13న జరిగే ఎన్నికల్లో టీడీపీ, జనసేన, బీజేపీ అభ్యర్థులను రాష్ట్ర వ్యాప్తంగా గెలిపించాలని రాష్ట్ర ప్రజలకు భువనేశ్వరి పిలుపు ఇచ్చారు.
కోలాహలంగా..
అంతకుముందు నామినేషన్‌ వేసేందుకు బయలుదేరిన భువనేశ్వరి వెంట వేలాదిగా చంద్ర దండు కదిలింది. టీడీపీ కార్యకర్తలు కదం తొక్కడంతో కుప్పం రోడ్లు కిక్కిరిశాయి. కార్యకర్తలకు అభివాదం చేస్తూ భువనేశ్వరి నామినేషన్‌ కేంద్రానికి చేరుకున్నారు. డీజేలు, తీన్మార్‌, డప్పులు, కోలాటం కళాకారుల సందడి నడుమ పండుగ వాతావరణాన్ని తలపించేలా చంద్రన్న నామినేషన్‌ కార్యక్రమం కొనసాగింది. కుప్పం బస్టాండ్‌ పరిసరాలు జనసంద్రంగా మారాయి.
ఆలయంలో పూజలు, మసీదులో ప్రార్థనలు
ఉదయం 10గంటలకు కుప్పం పీఈఎస్‌ మెడికల్‌ కళాశాలలోని గెస్ట్‌హౌస్‌ నుండి బయలుదేరి కుప్పం శ్రీ ప్రసన్న వరదరాజస్వామి ఆలయానికి చేరుకున్న భువనమ్మకు ఆలయ కమిటీ అధికారులు, అర్చకులు పూర్ణకుంభంతో మంగళ వాయిద్యాల నడుమ ఘనస్వాగతం పలికారు. నామినేషన్‌ పత్రాలను వరదరాజాస్వామి పాదాల చెంత పెట్టి భువనమ్మ ప్రత్యేక పూజలు నిర్వహించారు. పూజల అనంతరం భువనమ్మకు ఆలయ అర్చకులు వేద ఆశీర్వచనం, తీర్థ ప్రసాదాలు అందించారు. వరదరాజస్వామి దర్శనం అనంతరం శ్రీ పేరుందేవీ తాయర్‌ సన్నిధిలో భువనమ్మ ప్రత్యేక పూజలు నిర్వహించారు. ఆలయ అర్చకులు వేద ఆశీర్వచనం, తీర్థ ప్రసాదాలు అందించారు.
అనంతరం కుప్పం మక్కా మసీదు వద్ద భువనమ్మ ప్రత్యేక ప్రార్థనలు నిర్వహించారు. ఈ సందర్భంగా మత పెద్దలు ప్రార్థనలు చేసి ఆశీర్వచనాలు అందించారు. అలాగే హెబ్రోన్‌ చర్చిలో కూడా ప్రత్యేక ప్రార్థనలు చేశారు. ఈ సందర్భంగా మతపెద్దలు ఆశీర్వాద వచనాలు పలికారు.
