- ఆయన స్ఫూర్తితో ప్రజా సంక్షేమమే లక్ష్యంగా పనిచేస్తున్నాం
- ఆర్థిక ఇబ్బందులున్నా రూ.861 కోట్లతో రోడ్ల మరమ్మతులు
- సంక్రాంతి నాటికి అందుబాటులోకి గుంతల రహిత రోడ్లు
- త్వరలో రూ.75 వేల కోట్లతో జాతీయ రహదారులకు టెండర్లు
- 1300 కి.మీ మేర పీపీపీ విధానంలో రోడ్లను అభివృద్ధి చేస్తాం
- గత ప్రభుత్వం నిర్లక్ష్యంతో నేడు రూ.15 వేల కోట్ల భారం
- రోడ్లు భవనాల శాఖ మంత్రి బి.సి.జనార్దన్‌రెడ్డి
అమరావతి(చైతన్యరథం): చంద్రబాబు అంటే అభివృద్ధికి అంబాసిడర్‌..ఆయన స్ఫూర్తితో ప్రజా సంక్షేమమే లక్ష్యంగా ప్రజల వద్దకే పాలన అందించే దిశలో మా ప్రభుత్వం పనిచేస్తుందని రాష్ట్ర రోడ్లు భవనాలు, పెట్టుబడులు, మౌలిక సదు పాయాల శాఖ మంత్రి బి.సి.జనార్దన్‌రెడ్డి పేర్కొన్నారు. ప్రకాశం జిల్లా గిద్దలూరు నియోజకవర్గం బెస్తవారిపేట మండలం కొత్తపల్లి గ్రామం వద్ద కోనపల్లి రోడ్డు మరమ్మతులను శుక్రవారం ఆయన పరిశీలించారు. ఈ కార్యక్రమంలో మంత్రితో పాటు గిద్దలూరు ఎమ్మెల్యే ఎం.అశోక్‌రెడ్డి, జిల్లా ఉన్నతాధికారులు, స్థానిక ప్రజా ప్రతినిధులు, ప్రజలు పాల్గొన్నారు. సం క్రాంతి నాటికి గుంతల రహిత రహదారులే లక్ష్యంగా రోడ్ల మరమ్మతులను ప్రభుత్వం ప్రతిష్టాత్మకంగా తీసుకున్న నేప థ్యంలో రాష్ట్ర వ్యాప్తంగా రోడ్ల మరమ్మతులను తనిఖీ చేసేందుకు వరుసగా జిల్లాల్లో పర్యటిస్తున్నారు. ఇప్పటికే అన్నమయ్య, బాపట్ల, కడప, కర్నూలు, నంద్యాల జిల్లాల్లో రోడ్ల మరమ్మతులను పరిశీలించారు. సంక్రాంతికి ఇంకా నెల మాత్రమే సమ యం ఉన్న నేపథ్యంలో మరమ్మతులను మరింత ముమ్మరం చేయాలని అధికారులకు సూచించారు. స్థానికులను అభివృద్ధి, సంక్షేమ ఫలాలు అందుతున్న తీరును అడిగి తెలుసుకున్నారు. ఆర్థికంగా ఎన్ని ఇబ్బందులు ఉన్నా మౌలిక సదుపాయాల కల్పనలో భాగంగా రాష్ట్రానికి రహదారులు కీలకమని భావించి రూ.861 కోట్ల నిధులతో దాదాపు 25 వేల కి.మీ రహ దారుల పనులను మూడు విడతలుగా ప్రారంభించినట్లు చెప్పారు. నేడు ప్రకాశం జిల్లాలో దాదాపు రూ.21 కోట్లతో 1313 కి.మీ రహదారుల మరమ్మతులు చేయిస్తున్నట్లు వివరించారు. జనవరి 15 నాటికి గుంతల రహిత రహదారులే లక్ష్యంగా పనిచేస్తున్నామని, అయితే కొన్నిచోట్ల వర్షం వల్ల మరమ్మతులు కొంతమేర ఆలస్యం అయినప్పటికీ జనవరి నెలాఖరుకు గుంతల రహిత రహదారుల లక్ష్యాన్ని చేరుకుంటామని తెలిపారు.
గత ఐదేళ్లలో ఆర్‌అండ్‌బీని నిర్వీర్యం చేశారు
గత ప్రభుత్వం నిర్లక్ష్యంతో కనీస మౌలిక సదుపాయాలు లేక రాష్ట్రంలో పరిశ్రమలు, టూరిజం వంటి రంగాలు తీవ్రంగా దెబ్బతిన్నాయి.. గతంలో రోడ్లను చూసి పారిశ్రామికవేత్తలు పెట్టుబడులు పెట్టేందుకు రాష్ట్రానికి రాలేని పరిస్థితి నెలకొందన్నారు. ఎక్కడా కూడా రోడ్లను రెన్యువల్‌ చేసిన పాపాన పోలేదు.. దీంతో నేడు అదనంగా రోడ్లపై రూ.15 వేల కోట్లు ఖర్చు చేయాల్సిన స్థితికి తీసుకొచ్చారని మండిపడ్డారు. రాష్ట్రాన్ని అప్పులమయంగా మార్చేశారని..ఏ శాఖలో చూసినా ఏ నిధులు ఎక్కడున్నాయో తెలియని అయోమయస్థితికి తీసుకొచ్చారని ధ్వజమెత్తారు. గత ప్రభుత్వంలో ఎన్‌డీబీ పనులకు సంబంధించి రాష్ట్ర వాటా నిధులు ఇవ్వకపోవడంతో ఆ పనులు ఎక్కడికక్కడ నిలిచిపోయాయి. నాబార్డు నుంచి వచ్చిన నిధులకు కూడా కనీసం యూసీలు ఇవ్వని పరిస్థితి నెలకొందన్నారు. గత ఐదేళ్ల కాలంలో ఆర్‌ అండ్‌ బీ శాఖను పూర్తిగా నిర్వీర్యం చేయడంతో పాటు బిల్లులు చెల్లించకపోవడంతో కాంట్రాక్టర్లు ఆత్మహత్యలకు పాల్పడి వారి కుటుంబాలు రోడ్డున పడ్డ దుస్థితి నెలకొందని ఆగ్రహం వ్యక్తం చేశారు.
సౌకర్యవంతమైన రోడ్లతోనే పారిశ్రామిక వెలుగులు
నేడు కూటమి ప్రభుత్వం అధికారంలోకి వచ్చిన తర్వాత కేంద్ర ప్రభుత్వం సహకారంతో రూ.75 వేల కోట్లు జాతీయ రహదారుల పనులు రాష్ట్రానికి తీసుకురావడంతో పాటు వాటికి కూడా త్వరలో టెండర్లు పిలవనున్నట్లు చెప్పారు. రాష్ట్రంలో పీపీపీ విధానంలో కొన్ని రహదారులను ఎంపిక చేసి రూ.47 కోట్లతో ఏజెన్సీల ద్వారా సమగ్ర నివేదికలు రూపొందిస్తున్నామని తెలిపారు. త్వరలో ఈ 1300 కి.మీ రహదారులను పీపీపీ విధానంలో అభివృద్ది చేయాలని భావిస్తున్నామని, మార్చి లోపు పనులు ప్రారంభించి గతంలో టీడీపీ హయాంలో మాదిరిగా సౌకర్యవంతమైన రోడ్లను ప్రజలకు అందించేందుకు ప్రయత్నిస్తున్నామన్నారు. ప్రజలకు సౌకర్యవంతమైన రోడ్లు, మౌలిక వసతుల కల్పన ద్వారా పారిశ్రామికంగా రాష్ట్రంలో మళ్లీ వెలుగులు నింపేందుకు ప్రయత్నిస్తున్నట్లు తెలిపారు. త్వరలో మరిన్ని పరిశ్రమలు రాష్ట్రానికి రానున్నాయని ఏడాది లోపు రాష్ట్రాన్ని తిరిగి గాడిలో పెట్టడమే లక్ష్య్యంగా ముఖ్యమంత్రి ఆధ్వర్యంలో రెండు రోజుల పాటు ప్రజాప్రతినిధులు, ఉన్నతాధికారులతో కలెక్టర్ల కాన్ఫరెన్స్‌ నిర్వహించడం జరిగిందన్నారు. 161 సీట్లతో భారీ విజయాన్ని అందించిన ప్రజల రుణం తీర్చుకోవడంతో పాటు, ప్రజల నమ్మకాన్ని వమ్ముచేయకుండా మోదీ, బాబు, పవన్‌ త్రయం ఆధ్వర్యంలో రాష్ట్రానికి తిరిగి పూర్వవైభవం తీసుకొస్తామని వివరించారు.
