- ఏడాదిలోగా ఉన్నత విద్యావ్యవస్థలో సమూల ప్రక్షాళన
- అధికారులతో సమీక్షలో మంత్రి లోకేష్ వెల్లడి
- యూనివర్సిటీల ర్యాంకింగ్ మెరుగుదలకు పటిష్ట ప్రణాళిక
- విద్యాదీవెన, వసతిదీవెన బకాయిలపై మంత్రి ఆరా
అమరావతి (చైతన్యరథం): ఏడాదిలోగా ఉన్నత విద్యావ్యవస్థను పూర్తిస్థాయిలో ప్రక్షాళన చేస్తామని రాష్ట్ర విద్యా, ఐటి, ఎలక్ట్రానిక్స్ శాఖల మంత్రి నారా లోకేష్ తెలిపారు. కాలేజీలు, యూనివర్సిటీల్లో చేపట్టాల్సిన మార్పులు, ప్రమాణాల మెరుగుదలకు తీసుకోవాల్సిన చర్యలపై ఉన్నత విద్య అధికారులతో మంత్రి లోకేష్ శుక్రవారం సుదీర్ఘంగా సమీక్ష నిర్వహించారు. యూనివర్సిటీలు, డిగ్రీ కళాశాలల్లో అధ్యాపక పోస్టుల భర్తీకి చేపట్టాల్సిన చర్యలు, ఉన్నత విద్యలో నాణ్యతా ప్రమాణాల మెరుగుదల, కరిక్యులమ్ లో మార్పులు, విద్యార్థుల్లో నైపుణ్యత పెంచడానికి పాఠ్యాంశాల్లో మార్పులు, ప్రైవేటు ఇంజనీరింగ్ కళాశాలల్లో ఫీజులు, ప్రభుత్వ డిగ్రీ, జూనియర్ కళాశాలల్లో మౌలిక వసతుల కల్పన, అడ్మిషన్ల పెంపుదలకు తీసుకోవాల్సిన చర్యలు, రూసా నిధుల వినియోగం తదితర అంశాలపై సమావేశంలో మంత్రి చర్చించారు.
ఉన్నత విద్యలో సమూల మార్పులు తెచ్చి, యూనివర్సిటీల ర్యాంకింగ్స్ పెంచాలన్నది ముఖ్యమంత్రి చంద్రబాబునాయుడి లక్ష్యమని ఈ సందర్భంగా మంత్రి పేర్కొన్నారు. పరిశ్రమల అవసరాలకు ఉపయోగపడే విధంగా కరిక్యులమ్ను అప్ గ్రేడేషన్ చేయాల్సిన అవసరం ఉందన్నారు. ఇంజనీరింగ్ నాలుగేళ్లు చదివిన విద్యార్థికి ఉద్యోగం రాని స్కిల్స్, అమీర్ పేటలో నాలుగు నెలల శిక్షణ పొందితే ఎలా వస్తున్నాయి..అటువంటి అవసరం లేకుండా కళాశాలల్లోనే శిక్షణ ఇచ్చే అంశాన్ని పరిశీలించాలన్నారు. మెరుగైన ప్రమాణాల కోసం దృఢ సంకల్పం ఉండాలన్నారు. ఈజ్ ఆఫ్ ఎడ్యుకేషన్ ఉండాలన్నారు. క్రమశిక్షణ, నిజాయతీతో పనిచేసి ప్రమాణాల పెంపునకు కృషిచేద్దామని అధికారులను కోరారు. ఉన్నత విద్యకు సంబంధించిన ఆస్తుల విభజనపై నోట్ తయారుచేయాలన్నారు.
యూనివర్సిటీల్లో అధ్యాపక పోస్టులను భర్తీకి చర్యలు
యూనివర్సిటీల ర్యాంకింగ్ లు పడిపోవడానికి గల కారణాలను అధికారులను అడిగి లోకేష్ తెలుసుకున్నారు. యూనివర్సిటీల రేటింగ్ ను పెంచేందుకు ప్రణాళికాబద్ధంగా చర్యలు చేపట్టాలన్నారు. న్యాయపరమైన వివాదాలను పరిష్కరించి రాష్ట్రవ్యాప్తంగా ఖాళీగా ఉన్న అధ్యాపక పోస్టుల భర్తీకి చర్యలు తీసుకోవాలన్నారు. డిగ్రీ కళాశాలల్లో అధ్యాపకుల బదిలీలు పారదర్శకంగా జరగాలన్నారు. ఏపీపీఎస్సీలో నిర్వహించాల్సిన పరీక్షల వివరాలపైనా సమావేశంలో చర్చించారు. గత పదేళ్లలో డిగ్రీ కాలేజీల్లో అడ్మిషన్ల వివరాలపై నివేదిక ఇవ్వాలని అధికారులను మంత్రి ఆదేశించారు. విద్యా ప్రమాణాల పెంపునకు ఏం చర్యలు తీసుకోవాలో అధ్యయనం చేసి వివరాలు సమర్పించాలని లోకేష్ కోరారు.
విద్యాదీవెన, వసతి దీవెన బకాయిలపై ఆరా
నేరుగా కాలేజీలకు ఫీజు రీయింబర్స్మెంట్ నిధులు ఇచ్చే విధానం తొలగించి, గత ప్రభుత్వం విద్యా దీవెన, వసతి దీవెన పథకాలను ప్రవేశపెట్టి విద్యార్థులను తీవ్ర ఇబ్బందులకు గురిచేసిందని మంత్రి లోకేష్ తెలిపారు. ఈ కారణంగా రాష్ట్రవ్యాప్తంగా 6 లక్షలమంది విద్యార్థుల సర్టిఫికెట్లు కళాశాలల్లో నిలచిపోయాయన్నారు. విద్యాదీవెన, వసతిదీవెన కింద వైసీపీ ప్రభుత్వం రూ.3,480 కోట్ల రూపాయల బకాయిలు పెట్టారని చెప్పారు. ఆయా విద్యాసంస్థలతో మాట్లాడి ముందు విద్యార్థులకు సర్టిఫికెట్లు అందించడానికి చేపట్టాల్సిన చర్యలపై చర్చించారు. ఈ సమావేశంలో ఉన్నత విద్య కార్యదర్శి సౌరబ్ గౌర్, ఇంటర్మీడియట్ విద్య కమిషనర్ పోలా భాస్కర్, ఉన్నత విద్యామండలి చైర్మన్ కె.రామ్మోహన్ రావు, ఏపీ హయ్యర్ ఎడ్యుకేషన్ రెగ్యులేటరీ అండ్ మానిటరింగ్ కమిషన్ సెక్రెటరీ సూర్యచంద్రా రావు, తదితరులు పాల్గొన్నారు.
