పేదలకు ‘పట్టా’భిషేకం

• పేదరిక నిర్మూలన దిశగా మంత్రి నారా లోకేష్‌ అడుగులు
• ఎన్నికల్లో ఇచ్చిన ప్రధాన హామీ అమలు చేస్తున్న లోకేష్‌
• నెరవేరుతున్న మంగళగిరి పేదల దశాబ్దాల కల
• మొదటిదశలో మూడు వేల పట్టాల పంపిణికి రంగం సిద్ధం
• మన ఇల్లు – మన లోకేష్‌ పేరుతో రేపటి నుండి పట్టాల పంపిణీకి శ్రీకారం
• 4 నుండి 12 వరకు నియోజకవర్గంలోని వివిధ ప్రాంతాల ప్రజలకు పట్టాలు అందివ్వనున్న మంత్రి లోకేష్‌

అమరావతి (చైతన్యరథం): మంత్రి లోకేష్‌ హామీ ఇస్తే నెరవేరినట్టే.. మంగళగిరి పేద ప్రజల కల నెరవేరబోతోంది. ఎంతో మంది నాయకులు హామీ ఇచ్చారు, కానీ సమస్య మాత్రం పరిష్కారం కాలేదు. సార్వత్రిక ఎన్నికల్లో ప్రచారం చేస్తూ నారా లోకేష్‌ అత్యధిక మెజారిటీతో గెలిపిస్తే ప్రభుత్వ భూముల్లో నివసిస్తున్న వారికి శాశ్వత హక్కు కల్పిస్తూ పట్టాలు అందజేసి మంగళగిరి పేద ప్రజల దశాబ్దాల కల నెరవేరుస్తానని హామీ ఇచ్చారు. చరిత్రలో ఎప్పుడూ లేని విధంగా 91,413 ఓట్ల భారీ మెజారిటీతో మంగళగిరి ప్రజలు నారా లోకేష్‌ ను గెలిపించారు. గెలిచిన మొదటి రోజు నుండే ఇచ్చిన ప్రతి హామీ అమలు చేసే దశగా లోకేష్‌ కార్యాచరణ మొదలుపెట్టారు. ఎన్నో ఏళ్లుగా అపరిష్కృతంగా మిగిలిపోయిన సమస్యల పరిష్కారం కోసం పట్టుదలతో పనిచేస్తున్నారు. ఎన్నికల ముందు లోకేష్‌ ఇచ్చిన హామీల్లో ప్రధానమైంది ఇల్ల పట్టాల సమస్య. ఎన్నో ఏళ్లుగా పేద ప్రజలు ప్రభుత్వ భూముల్లో నివాసాలు ఏర్పాటు చేసుకొని నివసిస్తున్నారు. వారంతా తాము నివసిస్తున్న భూమిని, రెక్కల కష్టంతో నిర్మించుకున్న గూడుని క్రమబద్దీకరించాలని ఏళ్లుగా డిమాండ్‌ చేస్తూనే ఉన్నారు. ఎంతోమంది నాయకులు వారి సమస్యను పరిష్కరిస్తామని హామీ ఇచ్చి ఎన్నికల్లో లబ్ధి పొందినా ఆ హామీ అమలుకు కనీస కృషి చేసింది లేదు.

నారా లోకేష్‌ చిత్తశుద్ధి..
కానీ ఇప్పుడు పరిస్థితి మారింది మంగళగిరి శాసనసభ్యుడిగా నారా లోకేష్‌ పేదల పట్ల తనకు ఉన్న చిత్తశుద్ధిని కార్యాచరణలో పెట్టారు. గత పది నెలల్లో ప్రభుత్వ భూముల్లో నివసిస్తున్న ప్రజల వివరాల సేకరణ దగ్గర నుండి వివిధ శాఖలతో సమన్వయం, పేద ప్రజలకు ఎటువంటి ఇబ్బంది లేకుండా అధికారులే ఇళ్లకు వెళ్లి దరఖాస్తులు నింపడం వరకూ అన్నీ దశలను నారా లోకేష్‌ స్వయంగా పర్యవేక్షించారు. అత్యంత క్లిష్టమైన అటవీ భూములు, రైల్వే భూముల సమస్యను కూడా పట్టుదలగా తీసుకుని పరిష్కారం వైపు అడుగులు వేస్తున్నారు. మొదటి దశలో 3 వేల ఇళ్ల పట్టాల పంపిణికి రంగం సిద్ధం చేసారు నారా లోకేష్‌. ప్రభుత్వ భూముల్లో నివసిస్తున్న వారి భూమిని, వారు నిర్మించుకున్న ఇంటిని క్రమబద్ధీకరించి శాశ్వత హక్కు కల్పిస్తూ ఇంటి పట్టాలు అందజేయనున్నారు. పట్టాల పంపిణితో పేదలకు భరోసా లభించనుంది. ఏప్రిల్‌ 3 న మొదటి పట్టాను ఉండవల్లి గ్రామంలో అందజేయనున్నారు. నారా లోకేష్‌ స్వయంగా లబ్ధిదారుల నివాసానికి వెళ్లి పట్టా అందజేసి మన ఇల్లు – మన లోకేష్‌ కార్యక్రమాన్ని ప్రారంభించనున్నారు. ఏప్రిల్‌ 4 తేదీ నుండి మంగళగిరి డాన్‌ బాస్కో స్కూల్‌ను అనుకుని ఉన్న ఖాళీ స్థలంలో ఏర్పాటు చేస్తున్న వేదికపై లబ్ధిదారులకు నారా లోకేష్‌ ఇళ్ల పట్టాలు అందజేయనున్నారు. ఏప్రిల్‌ 4న యర్రబాలెం, నీరుకొండ, కాజా గ్రామాలకు చెందిన లబ్ధిదారులకు మంత్రి లోకేష్‌ పట్టాలు అందజేస్తారు. ఏప్రిల్‌ 7న పెనుమాక, ఉండవల్లి, ఇప్పటం, కొలనుకొండ, పద్మశాలి బజార్‌ ప్రాంతాలకు చెందిన లబ్ధిదారులకు, ఏప్రిల్‌ 8న రత్నాల చెరువు, మహానాడు-2 కు చెందిన లబ్ధిదారులకు, ఏప్రిల్‌ 11న సీతానగరం, సలాం సెంటర్‌, డ్రైవర్స్‌ కాలనీకు చెందిన లబ్ధిదారులకు, ఏప్రిల్‌ 12 న మహానాడు-1, ఉండవల్లి సెంటర్‌ ప్రాంతాలకు చెందిన లబ్ధిదారులకు, మొత్తంగా మూడువేలకు పైగా పట్టాల పంపిణికి ఏర్పాట్లు చేస్తున్నారు. ఈ కార్యక్రమంలో కూటమి పార్టీల ముఖ్యనాయకులు, నారా లోకేష్‌ భారీ విజయానికి కృషి చేసిన ఆయా గ్రామాల, వార్డుల ముఖ్య నాయకులు పాల్గొననున్నారు.