- ఐదేళ్లలో భ్రష్టుపట్టిన వ్యవస్థను గాడిన పెట్టాలి
- అందుబాటులోకి ఆన్‌లైన్‌ రెవిన్యూ సర్వీసులు
- సర్టిఫికెట్ల కోసం కళ్లరిగేలా తిరగే పరిస్థితి తేవొద్దు
- రెవెన్యూ అర్జీల పరిష్కారంపై థర్డ్‌ పార్టీతో ఆడిట్‌
- రికార్డులు మార్చి భూములు కొట్టేసిన వాళ్లపై చర్యలు
- తప్పుడు అధికారులనూ వదిలి పెట్టొద్దు
- రీసర్వే సమస్యల తక్షణ పరిష్కారానికి చర్యలు
- ఫ్రీహోల్డ్‌ భూముల రిజిస్ట్రేషన్లపై లోతైన విచారణ
- రెవిన్యూ సమీక్షలో సీఎం చంద్రబాబు ఆదేశాలు
అమరావతి (చైతన్య రథం):- రాష్ట్రంలో రెవెన్యూ సేవలు సులభతరం కావాలని.. ఆన్లైన్లో అన్ని సర్వీసులు అందుబాటులోకి రావాలని ముఖ్యమంత్రి చంద్రబాబు నాయుడు అన్నారు. టెక్నాలజీ కాలంలో కూడా సర్టిఫికెట్ల కోసం ప్రజలు ప్రభుత్వ కార్యాలయాల చుట్టూ తిరిగే పరిస్థితి ఉండకూడదన్నారు. బర్త్‌ సర్టిఫికెట్‌, డెత్‌ సర్టిఫికెట్‌, క్యాస్ట్‌ సర్టిఫికెట్‌, ఇన్‌కం సర్టిఫికెట్‌ వంటి సర్వీసుల కోసం ప్రజలు ప్రభుత్వ కార్యాలయాలకు వచ్చే అవసరం లేకుండా ఆన్లైన్లో సేవలు పొందేలా చేయాలన్నారు. రెవెన్యూ శాఖను శుక్రవారం ముఖ్యమంత్రి చంద్రబాబు సచివాలయంలో సమీక్షించారు. సమీక్షకు మంత్రి అనగాని సత్యప్రసాద్‌, రెవెన్యూశాఖ ఉన్నతాధికారులు హాజరయ్యారు. రెవెన్యూ శాఖకు సంబంధించి ప్రజల నుంచి వస్తున్న వినతులు, వాటి పరిష్కారం తీరును సీఎం సమీక్షించారు. రాష్ట్రవ్యాప్తంగా వివిధ సమస్యలపై అన్ని శాఖలకు సంబంధించి 1,74,720 అర్జీలు రాగా.. అందులో 67,928 అర్జీలు కేవలం రెవెన్యూ విభాగంనుంచే వచ్చాయి.
మొత్తం అర్జీలలో 1,32,572 పరిష్కరించగా… ఇందులో 49,784 రెవెన్యూ సమస్యలకు సంబంధించి ఉన్నట్లు అధికారులు తెలిపారు. రెవెన్యూ రికార్డులు, భూకబ్జాలు, అసైన్మెంట్‌ భూములువంటి సమస్యలపై ఎక్కువ ఫిర్యాదులు వస్తున్నాయని అధికారులు వివరించారు. ప్రజలనుంచి వచ్చే వినతులపై సత్వర చర్యలు తీసుకుని పూర్తిస్థాయి పరిష్కారం చూపాల్సిన అవసరం ఉందని సీఎం అన్నారు. తమ వినతులు, సమస్యలపై ప్రజలను అక్కడికి, ఇక్కడికి తిప్పే పరిస్థితి ఇకపైవుంటే సహించేది లేదని సీఎం హెచ్చరించారు. ఒక దరఖాస్తు వస్తే దాన్ని పూర్తిస్థాయిలో పరిష్కరించాల్సిన అవసరం ఉందని… మొక్కుబడి తంతు కుదరదని స్పష్టం చేశారు. గత ప్రభుత్వ విధానాల కారణంగా ఎప్పుడూ లేనంతగా రెవెన్యూ పరిధిలో పెద్దమొత్తంలో సమస్యలు తలెత్తాయని… వీటి పరిష్కారం కోసం ప్రజలు కాళ్లరిగేలా కార్యాలయాల చుట్టూ తిరుగుతున్నారని సీఎం అన్నారు. ప్రజలు సులభంగా రెవెన్యూ సేవలు పొందేందుకు అవసరమైన ప్రక్షాళన చేపట్టాలని సూచించారు.
ఏతరహా ఫిర్యాదును ఎలా పరిష్కరిస్తున్నారు, ఎంత సమయం తీసుకుంటున్నారు, ప్రజల నుంచి సంతృప్తి వ్యక్తమవుతుందా లేదా అనే అంశాలపై థర్డ్‌ పార్టీ ద్వారా ఆడిట్‌ చెయ్యాలని సీఎం అన్నారు. గత ఐదేళ్లలో జరిగిన భూకబ్జాలు, తప్పుడు లావాదేవీలు, వివాదాలపై శాఖాపరంగా తీసుకుంటున్న చర్యలను, నివేదికలను అధికారులు వివరించారు. రాష్ట్రంలో గత ఐదేళ్లలో 13,59,805 ఎకరాలను ఫ్రీహోల్డ్‌ చేశారని… వీటిలో 4,21,433 ఎకరాలు నిబంధనలకు విరుద్ధంగా ఫ్రీహోల్డ్‌ చేసినట్లు గుర్తించామని అధికారులు తెలిపారు. మొత్తం ఫ్రీహోల్డ్‌ భూముల్లో 25,284 ఎకరాలు రిజిస్ట్రేషన్‌ అవ్వగా… అందులో 7,827 ఎకరాల భూముల రిజిస్ట్రేషన్‌లో నిబంధనల ఉల్లంఘన జరిగిందని గుర్తించినట్టు అధికారులు తెలిపారు. ఈ 7,827 ఎకరాలకు సంబంధించి జరిగిన అవకతవకల్లో రెవెన్యూ అధికారుల, సిబ్బంది సహా ఎవరి పాత్ర ఉంది? కారకులు ఎవరు? తెరవెనుక ఉన్నవాళ్లు, బీనామీలు, రాజకీయ నేతల ప్రమేయాన్ని కూడా తేల్చాలని సీఎం ఆదేశించారు. ఫ్రీహోల్డ్‌ భూముల అక్రమ రిజిస్ట్రేషన్లు జరిగిన మొదటి 10 మండలాలపై అధికారులు సీఎంకు వివరించారు. పెనుకొండ, నందలూరు, వెదురుకుప్పం, ధర్మవరం, వీరబల్లి, సోమందేపల్లి, ఏర్పేడు, దోర్ణాల, రొద్ద, రామాపురం మండలాల్లో పెద్దమొత్తంలో అక్రమ రిజిస్ట్రేషన్లు జరిగినట్లు అధికారులు తెలిపారు. వీటిపై సమగ్ర విచారణ జరిపి… కారకులపై చర్యలు తీసుకోవాలని సీఎం ఆదేశించారు. అదేవిధంగా 4,21,433 ఎకారాల ఫ్రీహోల్డ్‌ భూమల్లో జరిగిన నిబంధన ఉల్లంఘనలను కూడా తేల్చాలని సీఎం అధికారులకు సూచించారు.
రీసర్వే సమస్యల సత్వర పరిష్కారం
మొత్తం 16,816 గ్రామాలకుగాను 6,698 గ్రామాల్లో 85 లక్షల ఎకరాలల్లో రీసర్వే పూర్తైంది. అయితే రీ సర్వేలో తప్పులపై ప్రజల నుంచి 2,79,148 ఫిర్యాదులు వచ్చాయి. వీటిని పరిష్కరించడంతో పాటు… ఇప్పటికే రీ సర్వే జరుగుతున్న గ్రామాలతో పాటు.. రీ సర్వే మొదలవ్వని గ్రామాల్లో కూడా పారదర్శకంగా, సమస్యలు తలెత్తకుండా సర్వే పూర్తి చెయ్యాలని సీపం అదేశించారు. అనంతరం రెవెన్యూ మంత్రి అనగాని సత్యప్రసాద్‌ మాట్లాడుతూ… గత ప్రభుత్వం 77,98,516 సరిహద్దు రాళ్లునాటి సీఎం బొమ్మలతో ముద్రించింది. కూటమి ప్రభుత్వం వీటిని తొలగించి సరిహద్దు రాళ్లు ఇస్తామన్న మాట మేరకు… ఆ రాళ్లపై బొమ్మల తొలగింపు జరుగుతోంది. దీనిలో భాగంగా ఇప్పటి వరకు 4,40,651 రాళ్లపై బొమ్మలు తొలగించారు. ఒక్కో రాయిపై బొమ్మ తొలగించేందుకు రూ.15 ఖర్చవుతుంది. మొత్తం అన్ని రాళ్లపై గత పాలకుల బొమ్మలు తొలగించేందుకు రూ.12 కోట్లు ఖర్చవుతుందని… జనవరి నాటికి పనులు పూర్తి చేస్తామని ముఖ్యమంత్రికి వివరించారు.
చివరిగా సీఎం చంద్రబాబు మాట్లాడుతూ… రెవెన్యూ శాఖ సమూల ప్రక్షాళన జరగాలని, కఠిన నిర్ణయాలతో ప్రజల ఇబ్బందులు తగ్గించాలన్నారు. భూములు బలవంతంగా లాక్కునేందుకు 22ఎలో పెడతామని బెదిరించి చేసిన కబ్జాలు అనేకం ఉన్నాయని వీటిపై వచ్చిన ఫిర్యాదుల ఆధారంగా చర్యలు తీసుకోవాలన్నారు. రానున్న రోజుల్లో పిడి యాక్ట్‌, యాంటీ ల్యాండ్‌ గ్రాబింగ్‌ యాక్ట్‌లను సమర్థవంతంగా ఉపయోగించి భూమాఫియాకు అడ్డుకట్ట వేయాలన్నారు. సామాన్య ప్రజలను, పేదలను, బలహీనులను బెదిరించి భూకబ్జాలు చేసేవాళ్లు… హంతకులతో సమానమని, ఇలాంటి వారిపట్ల కఠినంగా ఉండాలని సీఎం ఆదేశించారు. కొందరు అధికారులు, సిబ్బంది రికార్డులు మార్చి చేసిన అవినీతి కారణంగా ఎంతో విలువైన భూములు కోల్పోయి ప్రజలు రోడ్డున పడ్డారని…. ఇలాంటి వాటికి ఇక ముగింపు పలకాలని సీఎం అన్నారు. ఆన్లైన్లో భూరికార్డులు మార్చి ప్రజలను భయపెట్టి భూములు కొట్టేసిన ఘటనల్లో పాత్రదారులైన అధికారులపైనా, సిబ్బందిపైనా చర్యలు తీసుకోవాలన్నారు. రెవెన్యూ శాఖలో సమూల ప్రక్షాళన చేయాల్సిన అవసరం ఉందని.. తద్వారా ప్రజల ఆస్తులు, భూములకు రక్షణ కల్పించి వారికి భరోసా కల్పిస్తామని సీఎం స్పష్టం చేశారు.
