- రెండు నగరాల మధ్య ఒకేసారి రెండు విమాన సర్వీసులు ఇదే తొలిసారి
- విశాఖ`విజయవాడ సర్వీసులు ప్రారంభించిన కేంద్రమంత్రి రామ్మోహన్‌నాయుడు
విశాఖపట్నం (చైతన్యరథం): విశాఖపట్నం- విజయవాడ మధ్య కొత్తగా రెండు విమాన సర్వీసులు అందుబాటులోకి వచ్చాయి. విశాఖ విమానాశ్రయంలో ఎయిర్‌ ఇండియా ఎక్స్‌ప్రెస్‌ విమాన సర్వీసును కేంద్ర పౌర విమానయాన శాఖ మంత్రి రామ్మోహన్‌ నాయుడు ఆదివారం ప్రారంభించారు. ఎయిర్‌ ఇండియా ఎక్స్‌ప్రెస్‌ సర్వీసు ఉదయం 9:35 గంటలకు విశాఖలో బయలుదేరి 10:35కు విజయవాడ (గన్నవరం విమానాశ్రయం) చేరుతుంది. తిరిగి రాత్రి 7:55కు విజయవాడలో బయలుదేరి 9 గంటలకు విశాఖ చేరుతుంది. ఇండిగో సర్వీసు రాత్రి 7.15కు విజయవాడలో బయలుదేరి 8:20కి విశాఖ చేరుతుంది. అదే సర్వీసు తిరిగి రాత్రి 8:45కు విశాఖలో బయలుదేరి 9.50కి విజయవాడ చేరుతుంది. ఈ కొత్త విమానాలతో కలిపి విశాఖ- విజయవాడ మధ్య తిరిగే సర్వీసుల సంఖ్య మూడుకు చేరనుంది. ఈ సందర్భంగా రామ్మోహన్‌ నాయుడు మాట్లాడుతూ విశాఖ-విజయవాడ మధ్య ఫ్లయిట్‌ కనెక్టివిటీ పెంచాలని చాలా మంది కోరారని తెలిపారు. ఒకేసారి రెండు నగరాల మధ్య రెండు విమాన సర్వీసులు ప్రారంభం కావడం బహుశా ఇదే మొదటిసారి. ప్రజల కోరిక మేరకు ఈ మార్గంలో రెండు సర్వీసులు ప్రారంభించాం. రెండు నగరాల మధ్య ఎక్కువ సీట్లు అందుబాటులోకి రావడంతో విమాన టికెట్ల ధరలు తగ్గుతాయి. విశాఖ విజయవాడ మధ్య రూ.3000కే టికెట్‌ దొరికే అవకాశం ఉంది. విశాఖ ఎంతో అభివృద్ధి చెందుతున్న నగరం. దీనిని మరింత అభివృద్ధి చేయాలని కేంద్ర, రాష్ట్ర ప్రభుత్వాలు కృతనిశ్చయంతో ఉన్నాయి. ఒక ప్రాంతం అభివృద్ధి చెందాలంటే కనెక్టవిటీ ఎంతో అవసరం. విశాఖ-గోవా మధ్య విమాన సర్వీసులు తీసుకురావడానికి ప్రయత్నం చేస్తాం. విశాఖ నుంచి అత్యధిక కనెక్టివిటీలు ఉండేలా కృషి చేస్తాను. భోగాపురంలో అంతర్జాతీయ ప్రమాణాలతో ఎయిర్‌పోర్టు నిర్మిస్తున్నాం. ఏవియేషన్‌ యూనివర్సిటీని అక్కడ పెట్టాలని నిర్ణయం తీసుకున్నాం. రాష్ట్రంలోని కొత్త ప్రాంతాల్లో విమానాశ్రయాలను ఏర్పాటు చేయాలని ప్రణాళికలు వేస్తున్నాం. రాష్ట్రంలో విమానయానరంగం అభివృద్ధిపై ముఖ్యమంత్రి చంద్రబాబు ప్రత్యేక దృష్టి పెట్టారు. విజయవాడ వేదికగా డ్రోన్‌ షో నిర్వహించాం. ఈ డ్రోన్‌ షో ఐదు గిన్నీస్‌ రికార్డులు నెలకొల్పింది. ఓర్వకల్లు ప్రాంతంలో 300 ఎకరాలు డ్రోన్‌ సిటీ కోసం కేటాయించాం. విశాఖ నగరం మరింత అభివృద్ధి చెందడానికి అవకాశాలు ఉన్నాయి. ఈ నగరానికి మంత్రి నారా లోకేష్‌ టీసీఎస్‌ కంపెనీని తీసుకొస్తున్నారు. విశాఖను స్పోర్ట్స్‌ హబ్‌గా తయారు చేయాలని ప్రయత్నాలు జరుగుతున్నాయని రామ్మోహన్‌ నాయుడు వెల్లడిరచారు.
కార్యక్రమంలో పాల్గొన్న విజయవాడ ఎంపీ కేశినేని శివనాథ్‌ (చిన్ని) మాట్లాడుతూ అమరావతి రాజధాని ప్రాంతానికి విమాన సర్వీసుల కనెక్టివిటీ పెరిగితే వ్యాపారస్తులకి, ప్రజలకి మరింత సౌకర్యంగా వుంటుందని ముఖ్యమంత్రి చంద్రబాబు రాష్ట్రంలో విమానయన రంగం అభివృద్దిపై ప్రత్యేక దృష్టి పెట్టారన్నారు. ఇక కేంద్రం నుంచి ప్రధాన మంత్రి మోదీ, పౌరవిమానయాన శాఖ మంత్రి రామ్మోహన్‌ నాయుడు అందుకు ఎంతో సహకరిస్తున్నారన్నారు. రాష్ట్ర రాజధాని అమరావతి- ఆర్థిక రాజధాని వైజాగ్‌ మధ్య అనుసంధానం మరింత పెంచడం ఎంతో ఆనందంగా వుందున్నారు. ఇప్పటి వరకు విజయవాడ నుంచి వైజాగ్‌కి ఒక విమాన సర్వీసు మాత్రమే వుండగా, ఇప్పుడు మరో రెండు విమాన సర్వీసులు అందుబాటులోకి రావటం ప్రయాణికులకి ఎంతో సౌకర్యంగా వుంటుందన్నారు. ఈ కార్యక్రమంలో విశాఖపట్నం పశ్చిమ ఎమ్మెల్యే పి.జి.వి.ఆర్ నాయుడు (గణబాబు) తో పాటు ఎయిర్‌ పోర్ట్‌ అథారిటీ నాయకులు పాల్గొన్నారు.
