- పిల్లలంతా స్కూళ్లకెళ్లేలా చర్యలు తీసుకోండి
- జీవన ప్రమాణాలు మెరుగుపర్చాలి
- ఉద్యోగులు అంకితభావంతో పనిచేయాలి
- గిరిజన ప్రాంతాల అభివృద్ధికి సహకరించాలి
అమరావతి (చైతన్య రథం): గిరిజనుల జీవన ప్రమాణాలు మెరుగుపర్చేందుకు సంపూర్ణ సహకారాన్ని అందజేస్తానని, అందుకు తగ్గట్టుగా గిరిజన సంక్షేమ శాఖ అధికారులు, ఉద్యోగులు అంకిత భావంతో పనిచేస్తూ గిరిజనుల, గిరిజన ప్రాంతాల సమగ్రాభివృద్దికి పూర్తిస్థాయిలో సహకరించాలని ముఖ్యమంత్రి చంద్రబాబు నాయుడు కోరారు. సోమవారం రాష్ట్ర సచివాలయంలో గిరిజన సంక్షేమ శాఖ అధికారులతో ఆయన సమావేశమై పలు పథకాల ప్రగతిని సమీక్షించారు. గిరిజనుల సంక్షేమానికి, వారి ప్రాంతాల అభివృద్దికి కేంద్ర ప్రాయోజిత పథకాలను పూర్తిస్థాయిలో వినియోగించుకోవాలని, అందుకు తగిన మ్యాచింగ్‌ గ్రాంట్‌ను రాష్ట్ర ప్రభుత్వపరంగా విడుదల చేసేందుకు తాను సిద్ధంగా ఉన్నానన్నారు. విద్య, వైద్య, ఆరోగ్యం, తాగునీటి సరఫరా, రహదారులు, కమ్యూనికేషన్‌ తదితర మౌలిక వసతుల కల్పనతోపాటు వారి జీవన ప్రమాణాలను మెరుగుపర్చే అవసరమైన జీవనోపాధి కార్యక్రమాలను పెద్దఎత్తున చేపట్టాలని ఆదేశించారు.
గిరిజనుల విద్యకు అత్యంత ప్రాధాన్యతనివ్వాలని, పిల్లలందరూ పాఠశాలల్లో చేరే విధంగా ప్రోత్సహించాలని, అవసరమైతే ప్రత్యేక బ్రిడ్జి కోర్సులు నిర్వహించి పాఠశాలల్లో చేరేలా చూడాలన్నారు.
అక్షయ పాత్ర సంస్థ ద్వారా గిరిజన విద్యార్థులకు మంచి పోషకాహారాన్ని అందజేసే ప్రతిపాదనలకు ముఖ్యమంత్రి ఆమోదం తెలుతూ అందుకు అవసరమైన రూ.337 కోట్ల నిధులను మంజూరు చేసేందుకు సంసిద్దత వ్యక్తం చేశారు. గిరిజన విద్యార్థుల ఆరోగ్య పరిరక్షణ అంశంలో ప్రత్యేక శ్రద్ద చూపాలని, రెండు రోజులకు ఒకసారి ఏఎన్‌ఎంతో వారికి ఆరోగ్య పరీక్షలు చేయించాలని, ఆశ్రమ పాఠశాలల్లో రాత్రి వేళల్లో ఏఎన్‌ఎం అందుబాటులో ఉండేలా చూడాలని ఆదేశించారు. తల్లీ, బిడ్డల మోర్టాలిటీ రేటును తగ్గించే విధంగా మరియు సికిల్‌ సెల్‌ వ్యాధిని పూర్తిస్థాయిలో నివారించేందుకు ప్రణాళికా బద్దంగా చర్యలు చేపట్టాలని ఆదేశించారు. ఎన్‌ఆర్‌ఇజిఎస్‌ ద్వారా గిరిజన ప్రాంతాల్లోని అన్ని గ్రామాలకు రహదారుల సౌకర్యాన్ని కల్పించేందుకు రూ.1200 కోట్లతో ప్రత్యేక ప్రాజెక్టును రూపొందించాలన్నారు. వచ్చే ఏడాది జనవరికల్లా బిఎస్‌ఎన్‌ఎల్‌తో పాటు ఇతర కమ్యూనికేషన్‌ నెట్‌ వర్కులను పూర్తిస్థాయిలో ఏర్పాటు చేయాలని ఆదేశించారు. గిరిజ ప్రాంతాల్లో సోలార్‌ విద్యుత్‌ వినియోగాన్ని పెద్దఎత్తున పెంచేలా ప్రధాన మంత్రి సూర్య ఘర్‌ పథకాన్ని పెద్దఎత్తున సద్వినియోగం చేసుకోవాలని, ప్రతి యూనిట్‌ ఏర్పాటుకు దాదాపు రూ.50 వేల మేర ప్రభుత్వపరంగా సాయం అందజేస్తామన్నారు.
గిరిజనుల జీవనోపాధి మెరుగుకై కాఫీ, మిరియాల సాగును మరింత ప్రోత్సహించాలని, ప్రస్తుతం 2.5 లక్షల ఎకరాల్లో సాగుతున్న కాఫీ సాగును మరో లక్ష ఎకరాల మేరకు విస్తరించేలా చర్యలు చేపట్టాలన్నారు. ఎన్‌ఆర్‌ఇజిఎస్‌ ద్వారా కాఫీపంట సాగును విస్తరించేందుకు అవసరమైన సహకారాన్ని ప్రభుత్వపరంగా అందించేందుకు ప్రతిపాదనలు రూపొందించాలన్నారు. ప్రభుత్వ, ప్రవేటు భాగస్వామ్యంతో కాఫీసాగును మరింత ప్రోత్సహించి, పెద్దఎత్తున గిరిజనులకు ఆదాయం వచ్చే విధానాన్ని రూపొందించాలని, అందుకు అవసరమైన స్పెషల్‌ పర్పస్‌ వెహికిల్‌ను ఏర్పాటు చేస్తామన్నారు. పసుపు సాగును జాయింట్‌ వెంచర్‌పై ప్రోత్సహిస్తే గిరిజనులకు మరింత మేలు జరుగుతుందని, ఆ దిశగా అధికారులు చర్యలు చేపట్టాలని సూచించారు. అదేవిధంగా తేనె దిగుబడిని పెద్దఎత్తున ప్రోత్సహించేలా డాబర్‌లాంటి ప్రయివేట్‌ కంపెనీల సహకారం పొందాలన్నారు. ట్రైకార్‌ద్వారా గిరిజనులకు తగిన ఆర్థిక సహకారం అందేవిధంగా కేంద్ర ప్రాయోజిత పథకాలను పెద్దఎత్తున ఉపయోగించుకోవాలన్నారు.
గత జూలై 30న గిరిజన సంక్షేమ శాఖపై నిర్వహించిన సమీక్షలో ముఖ్యమంత్రి జారీచేసిన ఆదేశాలకు అనుగుణంగా చేపట్టిన పనుల ప్రగతి, మీటింగ్‌ అజెండా అంశాలను పవర్‌ పాయింట్‌ ప్రెజెంటేషన్‌ ద్వారా రాష్ట్ర గిరిజన సంక్షేమ శాఖ కార్యదర్శి కన్నబాబు వివరించారు. గిరిజన సంక్షేమ మంత్రి గుమ్మడి సంధ్యారాణి, ఆరోగ్య శాఖ స్పెషల్‌ సీఎస్‌ ఎంటి కృష్ణబాబు, ముఖ్యమంత్రి కార్యదర్శి ప్రద్యుమ్న, మహిళా సంక్షేమ శాఖ కార్యదర్శి సూర్యకుమారి, జీసీసీ అధికారులు, ఐటిడిఏ పీవోలు తదితరులు సమీక్షా సమావేశంలో పాల్గొన్నారు.
