అమరావతి: రాష్ట్రంలో ఎన్డీఏ కూటమి అఖండ విజయంపై సినీ హీరో జూనియర్‌ ఎన్టీఆర్‌ స్పందించారు. అఖండ విజయం సాధించినందుకు చంద్రబాబు మావయ్యకి అభినందనలు తెలుపుతూ ఎక్స్‌లో పోస్ట్‌ పెట్టారు. ప్రియమైన చంద్రబాబు మామయ్యకి… ఈ చారిత్రాత్మక విజయాన్ని సాధించినందుకు నా హృదయపూర్వక శుభాకాంక్షలు. మీరు సాధించిన ఈ విజయం ఆంధ్రప్రదేశ్ రాష్ట్రాన్ని అభివృద్ధి పథం వైపు నడిపిస్తుందని ఆశిస్తున్నాను. అద్భుతమైన మెజారిటీతో గెలిచిన నారా లోకేష్‌కి, మూడోసారి విజయం సాధించిన బాలకృష్ణ బాబాయికి, ఎంపీలుగా గెలిచిన పురందేశ్వరి అత్తకి, మతుకుమిల్లి శ్రీభరత్‌కు నా శుభాకాంక్షలు’’ అంటూ ఎన్టీఆర్‌ శుభాకాంక్షలు తెలియజేశారు.
పవన్‌కల్యాణ్‌కు కూడా..
మరో ట్వీట్‌లో జనసేనాని పవన్‌కల్యాణ్‌కు కూడా ఎన్టీఆర్‌ శుభాభినందనలు తెలియజేశారు. ఇంతటి ఘన విజయం సాధించిన పవన్‌ కల్యాణ్‌కు కూడా నా హృదయపూర్వక శుభాకాంక్షలు అంటూ పేర్కొన్నారు.
