- జగన్‌పై మంత్రి గొట్టిపాటి ఫైర్‌
- వైసీపీ నిరసనలకు ప్రజల్లోనే కాదు…సొంత పార్టీలోనూ స్పందన లేదు
- ఉనికి కోసమే వైసీపీ తాపత్రయం
- కూటమి ప్రభుత్వం విద్యుత్‌ ఛార్జీలు పెంచే ప్రసక్తే లేదు
- జగన్‌ విధ్వంసం చేసిన విద్యుత్‌ శాఖను సీఎం చంద్రబాబు గాడిన పెడుతున్నారు
అమరావతి (చైతన్యరథం): కూటమి ప్రభుత్వం అధికారంలోకి వచ్చిన తరువాత ఇంత వరకూ విద్యుత్‌ చార్జీలను పెంచనేలేదని, జగన్‌మోహన్‌ రెడ్డి అధికారంలో ఉన్నప్పుడు చేసిన చేసిన పాపాల కారణంగానే విద్యుత్‌ పై సర్దుబాటు చార్జీలు విధించాల్సి వచ్చిందని విద్యుత్‌ శాఖ మంత్రి గొట్టిపాటి రవికుమార్‌ స్పష్టం చేశారు. 22.5 మిలియన్‌ యూనిట్ల కొరత ఉన్న రాష్ట్రాన్ని నాటి టీడీపీ ప్రభుత్వం 2019 నాటికి మిగులు విద్యుత్‌ రాష్ట్రంగా తీర్చిదిద్ది వైసీపీ ప్రభుత్వానికి అప్పగించిందన్నారు. 2014 నుంచి 2019 వరకు కూడా తెలుగుదేశం ప్రభుత్వం ఒక్క రూపాయి కూడా కరెంట్‌ చార్జీలు పెంచలేదని గుర్తు చేశారు. ఈ మేరకు శుక్రవారం ఓ ప్రకటన విడుదల చేశారు. కానీ 2019 నుంచి 2024 వరకు అధికారంలో ఉన్న జగన్‌రెడ్డి ప్రజలపై రూ.35 వేల కోట్ల విద్యుత్‌ భారాన్ని మోపడమే కాకుండా, విద్యుత్‌శాఖకు రూ.1.20 లక్షల కోట్ల నష్టాన్ని తెచ్చిపెట్టారన్నారు. డిస్కంల ద్వారా ప్రజలపై భారం వేయాలంటూ జగన్‌ అధికారంలో ఉన్నప్పుడు గుట్టుచప్పుడు కాకుండా విద్యుత్‌ రెగ్యులేటరీ కమిషన్‌ (ఈఆర్సీ)కు ప్రతిపాదనలు పంపారన్నారు. సాధారణంగా ఈఆర్సీకి పంపిన 90 రోజుల్లోపు ట్రూ అప్‌ చార్జీలు ఆమోదం పొందాలని…కానీ ఎన్నికల ఫలితాలు వచ్చేవరకు కూడా ట్రూ అప్‌ చార్జీలను వాయిదా వేస్తూ వచ్చారన్నారు. కూటమి ప్రభుత్వం అధికారంలోకి వచ్చిన తరువాత ఈఆర్సీ నుంచి ఆమోదం పొందిన ట్రూ అప్‌ చార్జీలు నేడు ప్రజలపై భారంగా పడుతున్నాయని మంత్రి గొట్టిపాటి వివరించారు.
ఒక్క మెగావాట్‌ కూడా ఉత్పత్తి చేయలేదు
ప్రతీ ఏటా విద్యుత్‌ వినియోగం సగటున 6 శాతం పెరుగుతుందని, పెరుగుతున్న డిమాండ్‌కు తగ్గట్లు ఉత్పత్తిని కూడా పెంచాల్సి ఉంటుందని వివరించారు. దీన్ని దృష్టిలో పెట్టుకుని తెలుగుదేశం పార్టీ అధికారంలో ఉన్నప్పుడే వీటీపీఎస్‌, కృష్ణపట్నం జెన్కో ప్లాంట్ల సామర్థ్యాన్ని విస్తరించిందన్నారు. కానీ జగన్‌ మోహన్‌ రెడ్డి వాటిని పూర్తి చేయలేకపోయారన్నారు. జగన్‌ మోహన్‌ రెడ్డి ఐదేళ్ల కాలంలో కొత్తగా కనీసం ఒక్క మెగావాట్‌ కూడా విద్యుత్‌ ఉత్పత్తి చేయలేదన్నారు. అంతేకాకుండా గత టీడీపీ ప్రభుత్వ హయాంలో కుదుర్చుకున్న పీపీఏలను రద్దు చేయడం జగన్‌ రెడ్డి చేసిన పెద్ద పొరపాటు అన్నారు. పీపీఏల రద్దు కారణంగా 8 వేల మెగావాట్ల వరకు విద్యుత్‌ను ఏపీ కోల్పోవాల్సి వచ్చిందన్నారు. ఆ 8 వేల మెగావాట్ల పునరుత్పాదక విద్యుత్‌ను సీఎం చంద్రబాబు తిరిగి అందుబాటులోకి తీసుకుని వచ్చారన్నారు. కేవలం సీఎం చంద్రబాబుకు పేరు వస్తుందన్న అక్కసుతోనే జగన్‌ రెడ్డి నాడు పీపీఏలను రద్దు చేశారన్నారు. పీపీఏలను రద్దు చేయడం కారణంగా విదేశీ బ్యాంకర్లు, పెట్టుబడిదారులు కేంద్రానికి ఫిర్యాదు చేశారని, ఈ కారణంగా విద్యుత్‌ వినియోగించుకోకపోయినా డబ్బు చెల్లించాల్సి వచ్చిందని మంత్రి గొట్టిపాటి తెలిపారు.
10 సార్లు కరెంటు ఛార్జీలు పెంచిన జగన్‌
మరోవైపు జగన్‌ తన కమీషన్ల కక్కుర్తి కోసం ఎక్కువ రేటుకు విద్యుత్‌ కొనుగోలు చేశారని మంత్రి గొట్టిపాటి విమర్శించారు. రాష్ట్రానికి జగన్‌ చేసినంత నష్టాన్ని ఏ ముఖ్యమంత్రీ చేయలేదని దుమ్మెత్తి పోశారు. విద్యుత్‌ వ్యవస్థ గురించి మాట్లాడే అర్హత జగన్‌ కోల్పోయారన్నారు. విద్యుత్‌ చార్జీలపై జగన్‌ మోహన్‌ రెడ్డి ధర్నాలకు పిలుపునివ్వడం మరో తుగ్లక్‌ చర్య అని మండిపడ్డారు. తాను పెంచిన విద్యుత్‌ చార్జీలపై తానే ధర్నాలకు పిలుపునిచ్చారని ఎద్దేవా చేశారు. కృష్ణపట్నం విద్యుత్‌ ప్లాంట్‌కు నాసిరకం బొగ్గును సరఫరా చేశారని, నాలుగు లక్షల టన్నులు కృష్ణపట్నం ప్లాంట్‌ కోసం కొనుగోలు చేస్తే.. దానిలో లక్ష టన్నులు నాసిరకం కొనుగోలు చేశారని ఆరోపించారు. నాసిరకం విద్యుత్‌ కొనుగోళ్లపై ప్రభుత్వం చర్యలు తీసుకుంటుందని, ఇందుకు సంబంధించిన వారిపై విచారణకు ఆదేశిస్తామని తేల్చి చెప్పారు. విద్యుత్‌ శాఖకు అందించిన సేవలకు సన్మానం చేయాలని జగన్‌ అంటున్నారని, ప్రజలు ఇప్పటికే 11 సీట్లు ఇచ్చి జగన్‌ను ఘనంగా సన్మానించారన్నారు. వైసీపీ కార్యకర్తలే జగన్‌ రెడ్డిపై తిరగబడే పరిస్థితి ఏర్పడిరదన్నారు. కాంట్రాక్టు పనులు చేయించి బిల్లులు ఎగ్గొట్టారన్నారు. తన ఐదేళ్ల పాలనలో 10 సార్లు విద్యుత్‌ చార్జీలను జగన్‌ పెంచారని గుర్తు చేశారు. నాడు జగన్‌ తెచ్చిన పాలసీలను చూసి ఒక్కరూ కూడా పెట్టుబడులు పెట్టేందుకు ముందుకు రాలేదని, విద్యుత్‌ వ్యవస్థకు రూ.1.29 లక్షల కోట్లు మేర అప్పులు చేశారని విమర్శించారు.
ఉనికి కోసమే వైసీపీ ధర్నాలు
కూటమి ప్రభుత్వ హయాంలో ప్రజలపై కరెంటు బిల్లు రూపంలో ఒక్క రూపాయి కూడా భారం వేయబోమన్నారు. ఎన్ని ఇబ్బందులు ఎదురైనా విద్యుత్‌ ఛార్జీలు పెంచే ప్రసక్తే లేదని తేల్చి చెప్పారు. జగన్‌ తప్పులతో నాశనమైన విద్యుత్‌ వ్యవస్థను సీఎం చంద్రబాబు సరిదిద్దుతున్నారన్నారు. ప్రజల్లో ఉనికి కాపాడుకునేందుకు వైసీపీ ధర్నాలు చేస్తోందని, వైసీపీ డ్రామాలను ప్రజలు నమ్మరన్నారు. ధర్నాల్లో పాల్గొనాలని జగన్‌ ఇచ్చిన పిలుపునకు ప్రజల్లోనే కాకుండా, సొంత పార్టీలో కూడా స్పందన లేదని మంత్రి గొట్టిపాటి ఎద్దేవా చేశారు.
