.ప్రశ్నించిన విద్యార్థుల జీవితాలు నాశనం చేస్తారా?
.అధినేత చంద్రబాబునాయుడు మండిపాటు
అమరావతి: వైసిపి ప్రభుత్వ అడ్డగోలు పాలనను ప్రశ్నించిన ప్రతి వారిపై కేసు పెట్టాలని ఈ ప్రభుత్వం భావిస్తే..రాష్ట్రంలో ఉన్న 5 కోట్ల మందిపైనా జగన్ కేసులు పెట్టాల్సి ఉంటుందని తెలుగుదేశం పార్టీ అధినేత నారా చంద్రబాబునాయుడు పేర్కొన్నారు. వైసిపి ప్రభుత్వ పాలనపై గడపగడపలో ప్రజల నుంచి తీవ్ర వ్యతిరేత వ్యక్తం అవుతుంది… కాలర్ ఎగరేసుకుని ఎమ్మెల్యేలు తిరగడం కాదు….జనం కాలర్ పట్టుకుని ప్రశ్నిస్తున్నారని దుయ్యబట్టారు. సంక్షేమంలో కోతలు, అభివృద్ది పనులపై ప్రజల నుంచి వస్తున్న ప్రశ్నలకు ప్రభుత్వం అసహనానికి లోనవుతుంది. చిత్తూరు జిల్లా పూతలపట్టు లో ఎమ్మెల్యేను విద్యా దీవెన పై ప్రశ్నించిన ఇంజినీరింగ్ విద్యార్థి జశ్వంత్ పై కేసు పెట్టి అరెస్టు చెయ్యడం ప్రభుత్వం అసహనానికి ప్రత్యక్ష సాక్ష్యమని అన్నారు. విద్యార్థులపైనా కేసులు పెట్టి వారి జీవితాలను నాశనం చేస్తారా? వేపనపల్లి గ్రామంలో ఘటనకు వైసిపి క్షమాపణ చెప్పి విద్యార్థిపై,అతనికి మద్దతుగా నిలిచిన గ్రామస్థులు, టిడిపి నేతలపై పెట్టిన కేసు వెనక్కి తీసుకోవాలి. వెంటనే అందరినీ విడుదల చెయ్యాలి. స్థానిక పోలీసుల అత్యుత్సాహంపై డిజిపి చర్యలు తీసుకోవాలని చంద్రబాబునాయుడు డిమాండ్ చేశారు.
