నేడు ఆక్వా రైతుల రాష్ట్రస్థాయి సదస్సు
టీడీపీ రాష్ట్ర అధ్యక్షులు కింజరాపు అచ్చెన్నాయుడు
అమరావతి: తెలుగుదేశం హయాంలో దేశంలోనే అగ్రస్థానంలో ఉన్న ఆంధ్రప్రదేశ్ ఆక్వా రంగం నేడు జగన్రెడ్డి చర్యలతో పతనావస్థకు చేరిందని టీడీపీ రాష్ట్ర అధ్యక్షులు కింజరాపు అచ్చెన్నాయుడు ఆందోళన వ్యక్తం చేశారు. సంక్షోభంలో ఉన్న ఆక్వా రైతులకు అండగా నిలబడేందుకు ఈ నెల 24వ తేదీ గురువారం ఉదయం 10 గంటల నుంచి సాయంత్రం వరకు ‘‘ఇదేం ఖర్మ.. ఆక్వా రైతాంగానికి’’ అనే అంశంపై రాష్ట్రస్థాయి సదస్సు నిర్వహించనున్నట్లు బుధవారం ఆయన ఒక ప్రకటనలో తెలిపారు. ఈ సదస్సును మంగళగిరిలోని పార్టీ జాతీయ కార్యాలయంలో నిర్వహించనున్నట్లు పేర్కొన్నారు. ఈ సదస్సుకు రాష్ట్రవ్యాప్తంగా అన్ని ప్రాంతాల నుంచి ఆక్వా రైతు సంఘం నాయకులు, రైతులు పెద్ద ఎత్తున పాల్గొని విజయవంతం చేయాలని విజ్ఞప్తి చేశారు. ఈ సదస్సులో తెలుగుదేశం పార్టీ జాతీయ అధ్యక్షులు నారా చంద్రబాబునాయుడుతో పాటు ముఖ్య నాయకులు హాజరై ఆక్వా రైతులకు జరుగుతున్న అన్యాయంపై చర్చించి ఉద్యమ కార్యాచరణ రూపొందిస్తారని వివరించారు. ఆక్వా రైతులకు రూ.1.50 కే విద్యుత్ సరఫరా చేస్తానని జగన్రెడ్డి హామీ ఇచ్చి రైతులను వంచించారన్నారు. ఇచ్చిన హామీ అమలు చేయకుండా విద్యుత్ కోతలతో ఆక్వా రంగాన్ని జగన్రెడ్డి నిండా ముంచారని మండిపడ్డారు. ప్రభుత్వ చర్యలతో ఆక్వా రైతులకు మద్దతు ధర లభించక ఆత్మహత్యలకు పాల్పడుతున్నారని ఆందోళన వ్యక్తం చేశారు. అనేక షరతులతో సబ్సిడీలు ఎత్తేసి ఆక్వా రైతులను వేధిస్తున్నారని ఆగ్రహం వ్యక్తం చేశారు. రూ.5 వేల కోట్ల జె%“%ట్యాక్స్తో ఆక్వా రైతాంగాన్ని నాశనం చేస్తున్న జగన్రెడ్డి చర్యలకు వ్యతిరేకంగా తెలుగుదేశం పార్టీ చేస్తున్న పోరాటంలో ఆక్వా రైతులందరూ పాల్గొనాలని అచ్చెన్నాయుడు కోరారు.
