హైదరాబాద్‌: తెదేపా అధినేత చంద్రబాబు కు హైదరాబాద్‌లో ఘన స్వాగతం లభించింది. రాజమహేంద్రవరం జైలు నుంచి విడుదలైన చంద్రబాబు… జన నీరాజనాల మధ్య బుధవారం ఉదయం ఉండవల్లిలోని తన నివాసానికి చేరుకున్నారు. అక్కడి నుంచి సాయంత్రం గన్నవరం విమానాశ్రయం నుంచి కుటుంబ సభ్యులతో కలిసి ప్రత్యేక విమానంలో హైదరాబాద్‌ చేరుకున్నారు. ఈ సందర్భంగా బేగంపేట విమానాశ్రయం వద్దకు భారీగా తరలివచ్చిన తెదేపా శ్రేణులు, అభిమానులు, ఐటీ ఉద్యోగులు జై చంద్రబాబు నినాదాలతో హోరెత్తించారు. కోర్టు షరతులు ఉండటంతో… చంద్రబాబు మీడియాతో మాట్లాడకుండానే కారులో నుంచే ప్రజలకు అభివాదం చేస్తూ ముందుకు సాగారు.
వేలాది మంది అభిమానులు కార్లు, బైక్‌లపై చంద్రబాబు కాన్వాయ్‌ను అనుసరించారు. బేగంపేట నుంచి జూబ్లీహిల్స్‌ వరకు అభిమానులు రోడ్లకు ఇరు వైపులా నిల్చుని చంద్రబాబుకోసం వేచి చూశారు. బేగంపేట విమానాశ్రయం నుంచి నేరుగా జూబ్లీహిల్స్‌లోని తన నివాసానికి చేరుకున్నారు. జూబ్లీహిల్స్‌లోని తన నివాసానికి చేరుకున్న చంద్రబాబును ఏఐజీ వైద్యుల బృందం కలిసింది. చంద్రబాబు ఆరోగ్య పరిస్థితి, సమస్యలు అడిగి తెలుసుకున్నారు. వైద్యుల సూచన మేరకు గురువారం ఉదయం 10గంటలకు చంద్రబాబు ఏఐజీ ఆసుపత్రికి వెళ్లనున్నారు. ఈ మేరకు ఆయనకు అవసరమైన వైద్యపరీక్షలు చేయనున్నారు.
