- ఇంకా జగన్ ప్రభుత్వమే ఉందనుకుని విర్రవీగుతున్నారు
- ఎంపీడీవోపై దాడి రాష్ట్ర యంత్రాంగంపై జరిగిన దాడిగా భావిస్తాం
- నిందితులను కఠినంగా శిక్షిస్తాం
- అధికారులకు అండగా ఉంటాం
- 11 సీట్లకు పరిమితం చేసినా వైపీసీ నేతకు బుద్ధి రాలేదు
- వైసీపీ నాయకుడు సుదర్శన్‌ రెడ్డి దాడిలో గాయపడ్డ ఎంపీడీవోకు పరామర్శ
- అధైర్యపడొద్దని కుటుంబ సభ్యులకు భరోసా
కడప (చైతన్యరథం): అహంకారం నడి నెత్తికి ఎక్కిన వైసీపీ నాయకులు అధికారులపై దాడులు చేస్తున్నారని ఉప ముఖ్యమంత్రి, రాష్ట్ర పంచాయతీరాజ్‌, గ్రామీణాభివృద్ధి శాఖల మంత్రి పవన్‌ కళ్యాణ్‌ ఆగ్రహం వ్యక్తం చేశారు. వీళ్లను ప్రశ్నిస్తే ఎవరైనా ఒకటే.. వీరి ఆధిపత్యం ఒప్పుకోకపోతే ఎవరి మీదనైనా దాడులకు దిగే స్వభావం చూపిస్తారని మండిపడ్డారు. తమను ప్రశ్నించే వాళ్లను, ఎదురు చెప్పే వాళ్లపై దాడి చేసి భయపెట్టడాన్ని వైసీపీ నాయకులు నైజంగా మార్చుకున్నారని ధ్వజమెత్తారు. ఇలాంటి వారి అహంకారం దించుతాం.. తోలు తీసి కింద కూర్చోబెడతామని హెచ్చరించారు. అన్నమయ్య జిల్లా గాలివీడు మండల ఎంపీడీవో జవహర్‌ బాబుపై వైసీపీ నాయకుడు సుదర్శన్‌ రెడ్డి చేసిన దాడి అధికార యంత్రాంగం మొత్తం మీద చేసిన దాడిగా భావిస్తున్నామని స్పష్టం చేశారు. శుక్రవారం మధ్యాహ్నం అధికారిక విధుల్లో ఉన్న ఎంపీడీవో జవహర్‌ బాబుపై వైసీపీ నాయకుడు సుదర్శన్‌ రెడ్డి సుమారు 20 మంది అనుచరులతో వచ్చి కార్యాలయంలోనే దాడికి పాల్పడ్డారు. తీవ్ర గాయాల పాలైన జవహర్‌ బాబుని కడప రిమ్స్‌ ఆసుపత్రికి తరలించిన నేపథ్యంలో ఆయనను పరామర్శించేందుకు శనివారం మధ్యాహ్నం పవన్‌ వచ్చారు. చికిత్స పొందుతున్న జవహర్‌ బాబు ఆరోగ్య పరిస్థితి గురించి వైద్యులను అడిగి తెలుసుకున్నారు. జవహర్‌ బాబుకి పలు ఆరోగ్య సమస్యలు ఉన్న దృష్ట్యా జాగ్రత్తలు తీసుకోవాలని, మెరుగైన సేవలు అందించాలని వైద్యులకు సూచించారు. ఆస్పత్రిలోనే ఉన్న జవహర్‌ బాబు కుటుంబ సభ్యులతో మాట్లాడి వారికి ధైర్యం చెప్పారు.
అండగా ఉంటామని, అధైర్యపడవద్దని భరోసా ఇచ్చారు.
అనంతరం ఆసుపత్రి బయట మీడియాతో పవన్‌ కళ్యాణ్‌ మాట్లాడుతూ విధుల్లో ఉన్న ఎంపీడీవో జవహర్‌ బాబుపై దాడికి పాల్పడిన వ్యక్తి చట్టాల గురించి బాగా తెలిసిన వ్యక్తి.. గతంలో ఏపీ స్టేట్‌ లా ప్రాసిక్యూషన్‌ ఆఫీసర్‌గా ఉన్నారు.. అలాంటి వ్యక్తి కూడా ఎంపీడీవోపై భౌతిక దాడికి పాల్పడడం అనాగరికం.. హేయమని తప్పుబట్టారు. సదరు వైసీపీ నాయకుడి తల్లి ఎంపీపీగా పని చేస్తున్నారు. ఆమె ప్రజాప్రతినిధి అయితే ఆమె కార్యాలయ తాళాలు ఆమెకే ఇవ్వాలి. ఆ కార్యాలయ తాళాలు ఇవ్వను అని నిబంధనలు గురించి చెబితే ఎంపీడీఓ జవహర్‌ బాబుపై తీవ్రంగా దాడి చేయడం అప్రజాస్వామికమని పవన్‌ విమర్శించారు.
ఈ దాడి చిన్న విషయం కాదు
ఎంపీడీఓపై అహంకారంతో ఇష్టం వచ్చినట్లు దాడి చేయడం ఏమిటి? ఇది ఆయన ఒక్కరి మీద జరిగిన దాడిగా మేము భావించడం లేదు. రాష్ట్ర యంత్రాంగం మీద జరిగిన దాడిగా భావిస్తున్నాం. ఇందులో ఎంతటి వారు ఉన్న సరే చట్టం ముందుపెడతాం. ప్రజల కోసం పనిచేస్తున్న అధికారులపై భౌతిక దాడులకు పాల్పడితే వారి ఆత్మస్థైర్యం పూర్తిగా దెబ్బ తింటుంది. భవిష్యత్తులో కూడా దృఢంగా పని చేయలేరు. అధికార యంత్రాంగాన్ని భయపెట్టాలని భావిస్తే మేం చూస్తూ ఊరుకోబోమని పవన్‌ స్పష్టం చేశారు.
11 సీట్లు ఇచ్చినా బుద్ది రాలేదు
వైసీపీ నాయకులను ప్రజలు 11 సీట్లకు పరిమితం చేసినా వారి అహంకారం తగ్గలేదు. అహంకారంతో బరితెగించి ఈ పరిస్థితికి వచ్చారు. ప్రస్తుతం ఎంపీడీవో జవహర్‌ బాబుపై దాడి చేసిన జల్లా సుదర్శన్‌ రెడ్డి అనే వ్యక్తికి దాడులు చేయడం కొత్త కాదు. గతంలో కూడా ఎంపీడీవోగా పనిచేసిన ప్రతాప్‌ అనే అధికారిపైనా ఇదే జల్లా సుదర్శన్‌ రెడ్డి దాడి చేశారు. శేఖర్‌ నాయక్‌, శ్రీనివాసులు రెడ్డి అనే అధికారులు మీదా దాడి చేశారు. ఇది మా రాజ్యంగం అనుకొని వారికి ఎదురు చెబితే ఇష్టానుసారం అందరిపై దాడులు చేస్తున్నారు. చట్టం ముందు ఎవరైనా ఒక్కటే. వీరి ఆధిపత్య అహంకారాన్ని తగ్గించుకోకపోతే ప్రజలే బుద్ధి చెబుతారని పవన్‌ అన్నారు.
చూస్తూ ఊరుకోం
ఎంపీపీకి మాత్రమే తాళాలు ఇస్తామని చాలా మర్యాదగా, హుందాగా చెప్పిన జవహర్‌ బాబుపై ఇష్టానుసారం దాడి చేశారు. గడియ వేసి దాడికి తెగబడ్డారు. ఇది క్షమించరాని నేరం. జవహర్‌ బాబుకి హైబీపీతో పాటు ఇతర ఆరోగ్య సమస్యలు ఉన్నాయి. భౌతికంగా దాడి చేయడమే కాకుండా ఆయన కులాన్ని కూడా దూషించి.. సుదర్శన్‌ రెడ్డి తన అహంకారాన్ని మరోసారి చూపించారు. వీరి ఆధిపత్యాన్ని ప్రశ్నించే ప్రతి ఒక్కరిపై దాడి చేయడం అలవాటుగా మారింది. ఇంకా గత ప్రభుత్వమే ఉందనుకుంటూ, ఏం చేసినా చెల్లుబాటు అవుతుందనే ధోరణిలో వైసీపీ నేతలు ఉన్నారు. తప్పు జరిగితే చూస్తూ ఊరుకునే వ్యక్తిని కాదు. ఉప ముఖ్యమంత్రి స్థాయిలో ఉన్న నేను తప్పు చేసినా బలంగా శిక్ష పడాలి అని భావించే వ్యక్తిని. అలాంటిది అధికారిక విధులు నిర్వహిస్తున్న సిబ్బందిపై దాడి చేయడం తీవ్రంగా పరిగణిస్తాం. సంఘటన జరిగిన వెంటనే జిల్లా కలెక్టర్‌, ఎస్పీలతో మాట్లాడి కఠిన చర్యలు తీసుకోవాలని ఆదేశించామని పవన్‌ తెలిపారు.
అధికారులకు అండగా కూటమి ప్రభుత్వం
ప్రజల కోసం విధులు నిర్వహిస్తున్న అధికార యంత్రాంగంపై దాడులు చేస్తే ఏ మాత్రం సహించేది లేదు. నిబద్ధతగా పనిచేసే అధికారులకు కూటమి ప్రభుత్వం తోడుగా ఉంటుంది. ప్రజల విషయాల్లో కూటమి ప్రభుత్వం త్రికరణ శుద్ధిగా పని చేస్తుంది. జవహర్‌ బాబు ఎస్సీ సామాజిక వర్గానికి చెందినవారు అని నేను ఇక్కడికి రాలేదు. రాజకీయాలకు అతీతంగా, కులాలకు అతీతంగా కష్టపడి పని చేసే అధికారులకు ధైర్యం చెప్పడానికి వచ్చాను. విధులు నిర్వర్తిస్తున్న వారిపై ఇష్టానుసారం భౌతిక దాడులకు పాల్పడితే ఊరుకునేది లేదు. కేసులో ఉన్న అందర్నీ తప్పనిసరిగా పట్టుకోవాలని, తప్పించుకున్న తొమ్మిది మందిని కూడా వెంటనే పట్టుకోవాలని ఎస్పీకి చెప్పాం. ఈ కేసులో నిందితులందరికీ చట్టపరంగా శిక్ష పడేలా చూస్తామని పవన్‌ స్పష్టం చేశారు.
రాయలసీమ యువతలో చైతన్యం రావాలి
బాధితుడైన ఎంపీడీఓ జవహర్‌ బాబు భార్య భయపడుతున్నారు. అలాంటి పరిస్థితికి ఇక్కడ ప్రజలను కొందరు తీసుకొని వచ్చారు. ఆ పార్టీ నాయకుడికి సూచిస్తున్నాను… వాళ్ల పార్టీలో ఇలాంటి దౌర్జన్యం చేసే వారిపై దృష్టి పెట్టి సరి చేసుకోవాలి. ప్రజలు ఇలాంటి బెదిరింపులను ఎదిరించి 11 సీట్లు ఇచ్చినా వాళ్ళకి బుద్ది రాలేదు. రాయలసీమ ప్రజలకు… ముఖ్యంగా యువతకు, మహిళలకు నేను చెబుతున్నది ఒక్కటే. దేనికీ, ఎవరికీ భయపడాల్సిన అవసరం లేదు. ఇలాంటి దాడులు, దౌర్జన్యాలతో పేట్రేగిపోయినప్పుడు కచ్చితంగా యువత ప్రశ్నించాలి. అవసరమైతే దాడులు చేసే వారికి ఎదురు తిరగాలి. ఓటు వేసేశాం అక్కడితో పని అయిపోయింది అనుకోవద్దు. మార్పు అనేది కచ్చితంగా యువత నుంచే రావాలి. తప్పు చేసేవారు ఎంతటి వారైనా వారిని వదిలిపెట్టవద్దు. ఆఖరికి కార్యాలయాల్లో విధులు నిర్వర్తిస్తున్న దళిత అధికారులకు కూడా రక్షణ కరవైంది. వారు ప్రజల కోసం స్వేచ్ఛగా పని చేయలేని పరిస్థితులు ఉన్నాయి. ఇలాంటి నాయకులను మళ్లీ మరోసారి ఎన్నికల్లో పాల్గొననీయకుండా యువతే పూనుకోవాలి. ఇలాంటి నాయకులు మాకు అక్కర్లేదు అని ప్రజలే బలంగా చెప్పాలి. రాయలసీమ యువతకు అండగా నిలుస్తాం.
అధికారిక ఆధిపత్య అహంకారాన్ని సమష్టిగా ఎదుర్కొందాం. అధికారులపై దాడులు చేసే ఇలాంటి ఘటనలు మళ్లీ పునరావృతం కాకుండా పక్కా చర్యలు తీసుకోవాలని జిల్లా యంత్రాంగానికి ఆదేశాలు ఇచ్చాం. అధికారులపై భౌతిక దాడులకు పాల్పడే ఎలాంటి వ్యక్తులైన ఊరుకోవద్దని, కచ్చితంగా అధికార యంత్రాంగానికి అండగా నిలబడాలని చెప్పాం. ఎంపీడీవో జవహర్‌ బాబు భార్య కూడా తాము నిస్సహాయులం అని, ఏమీ చేయలేమని, మళ్లీ బయటకు వస్తే ఎలాంటి దాడులు జరుగుతాయోనని భయపడుతున్నారు. మేం ఆ కుటుంబానికి అండగా నిలుస్తాం. దీనిపై జిల్లా కలెక్టర్‌, ఎస్పీలకు తగు ఆదేశాలు ఇస్తాం. రాయలసీమలో అహంకారం తలకెక్కి ఆధిపత్యం కోసం ఎంతకైనా తెగించే వారిని చట్టానికి అప్పగిస్తాం. యువత కూడా చైతన్యవంతులై ఈ దాష్టీకాలను ఎదిరించాలని పవన్‌ పిలుపు ఇచ్చారు. ఈ కార్యక్రమంలో ఎమ్మెల్యేలు అరవ శ్రీధర్‌, పుత్తా కృష్ణ చైతన్య రెడ్డి, అన్నమయ్య, జిల్లా కలెక్టర్‌ శ్రీధర్‌ చామకూరి, కడప జిల్లా కలెక్టర్‌ డాక్టర్‌ శ్రీధర్‌ చెరుకూరి, కడప జిల్లా ఎస్పీ విద్యాసాగర్‌ నాయుడు, పంచాయతీరాజ్‌ కమిషనర్‌ కృష్ణ తేజ, తదితరులు పాల్గొన్నారు.
