- అభివృద్ధిలో మరింత వెనక్కి
- సామాజిక, ఆర్థిక సర్వేపై స్పందించే ధైర్యం ఉందా
- టీడీపీ సీనియర్‌ నేత యనమల సవాల్‌
అమరావతి(చైతన్యరథం): ఐదేళ్ల వైసీపీ పాలనలో ఆంధ్రప్రదేశ్ అన్ని రంగాల్లో వెనక్కి వెళ్లిందని టీడీపీ పొలిట్‌బ్యూరో సభ్యుడు, మాజీమంత్రి యనమల రామకృష్ణుడు ధ్వజమెత్తారు. జగన్ రెడ్డి విధ్వంసకర విధానాలతో రాష్ట్రంలోని అన్ని రంగాలు కుప్పకూలాయన్నారు. 2014`19 మధ్య అభివృద్ధికి చోదకశక్తులుగా టీడీపీ ప్రభుత్వం గుర్తించిన పోలవరం, నదుల అనుసంధానం, ప్రజారాజధాని అమరావతి నిర్మాణం, విద్యుత్‌, పారిశ్రామిక రంగాలు, తదితరాలను వైసీపీ ప్రభుత్వం విస్మరించిందన్నారు. జగన్ పాలనలో ఏపీ ఆర్థిక వృద్ధి అధోగతిపాలయిందనే వాస్తవాన్ని ఆంధ్రప్రదేశ్ సామాజిక, ఆర్థిక సర్వే` 2022-23 వెల్లడిరచిందన్నారు. ఈ సర్వేపై స్పందించే ధైర్యం జగన్‌కు ఉందా అని ఒక ప్రకటనలో యనమల సవాల్‌ విసిరారు.
వందేళ్ల వ్యవసాయ చరిత్రలో ఎన్నడూ లేనంతగా జగన్ పాలనలో పంటల సాగు పాతాళానికి పడిపోయింది. 12.85 శాతం నుండి 6.14 శాతానికి వ్యవసాయ రంగం జీఎస్‌డీపీ పడిపోయింది. సాగునీటి ప్రాజెక్టులు పూర్తి చేయకపోవడంతో పంటలకు నీరందక, ఉత్పత్తులు లేక అప్పుల బాధతో రైతులు ఆత్మహత్యలు చేసుకున్నారు. జగన్ రెడ్డి తప్పుడు విధానాలు, ఆక్వా విద్యుత్‌ రేట్ల పెంపు, అవినీతి వల్ల మత్య్స, ఆక్వా రంగం బలైంది. 2014`19 మధ్య టీడీపీ ప్రభుత్వ హయాంలో 2 లక్షల హెక్టార్లకు ఆక్వా సాగు పెంచాం. ఎగుమతులలో మొదటి స్థానంలో నిలిపాం. నాడు రాష్ట్రానికి ఏటా రూ.66 వేల కోట్ల జీవీఏ అందించగా.. జగన్ హయాంలో సంక్షోభంలో కూరుకుపోయింది. ఆక్వా సాగు ఖర్చు రెండు రెట్లు పెరిగింది. మద్దతు ధర లభించ లేదు.
జగన్ రెడ్డి అనాలోచిత నిర్ణయాలు వల్ల కుదేలైన అత్యంత కీలకమైన రంగం పారిశ్రామిక రంగం. రాష్ట్రంలో నెలకొన్న భయానక పరిస్థితుల దృష్ట్యా పెట్టుబడులు పెట్టేందుకు పారిశ్రామికవేత్తలు జంకారు. కొత్తగా పరిశ్రమలు రాకపోగా ఉన్న కంపెనీలు సైతం మూతపడ్డాయి. రాష్ట్ర నిరుద్యోగిత శాతం దేశ నిరుద్యోగిత శాతం కంటే ఎక్కువగా ఉంది. నాడు తెలుగుదేశం ప్రభుత్వం ప్రణాళికాబద్ధంగా తీసుకున్న నిర్ణయాల వల్ల పెట్టుబడుదారులు క్యూ కట్టగా అదే స్థాయిలో పర్యాటక రంగం అభివృద్ధి చెందింది. ఎక్కువ శాతం విదేశీయులు మన రాష్ట్రంలో పర్యటించేవారు. తద్వారా హోటళ్లు, రెస్టారెంట్లు ఎక్కువ అవ్వడంతో పాటుగా ఉపాధి లభించేది. 2019 తర్వాత పర్యాటకరంగాన్ని వైసీపీ ప్రభుత్వం గాలికి వదిలేయడంతో 9.49 శాతం నుండి 5.08 శాతానికి జీఎస్‌డీపీ పడిపోయింది.
వైసీపీ పాలనలో నిర్వహణాలోపంతో ప్రభుత్వాసుపత్రులను నరకకూపాలుగా తయారుచేశారు. ఆరోగ్యశ్రీని అనారోగ్యశ్రీగా మార్చేయడంతో పేదలకు ఉచిత వైద్యం దూరమైంది. రాష్ట్రంలో నుంచి ఐటి కంపెనీలు పరారయ్యాయి. ప్రజలపై విద్యుత్‌ భారం మోపారు. ఎన్నడూ లేని విధంగా మీడియాపై ఆంక్షలు విధించారు. విద్యా రంగాన్ని భ్రష్టుపట్టించారు.
విభజనతో నష్టపోయిన రాష్ట్రాన్ని కాపాడేందుకు 2014లో సీఎంగా బాధ్యతలు చేపట్టిన చంద్రబాబు రాష్ట్రాన్ని అభివృద్ధి మార్గంలో నడిపించారు. సంపద సృష్టిస్తూనే మెరుగైన సంక్షేమ పథకాలు అందించారు.రాష్ట్రానికి స్వదేశీ-విదేశీ పెట్టుబడిదారులను ఆకర్షించారు. రాష్ట్రం నుంచి ఎగుమతులు పెరిగాయి. ఒక వైపు రాష్ట్ర రాజధానిని నిర్మిస్తూనే అన్ని రంగాల అభివృద్ధికి కృషి చేశారు.
దాని ఫలితమే 8.98 శాతం జీఎస్‌డీపీ సాధించాం. 2019 నుంచి సమీకరణాలు మారాయి. వైసీపీ అధికారంలోకి రావడంతో రాష్ట్రం అంధకారంలోకి వెళ్ళిపోయింది. ఐదేళ్లు రాజధానే లేకుండా పరిపాలించడంతో పాటు అన్ని రంగాలను కుదిపేశారు. దీంతో జీఎస్‌డీపీ 4.46 శాతానికి పడిపోయింది. ఈ ఆర్థిక సర్వేపై స్పందించే ధైర్యం జగన్ రెడ్డి ఉందా? అభివృద్ధి విధ్వంసకర విధానాలకు నిదర్శనంగా నిలిచిన జగన్ పాలనతో విసిగిపోయిన ప్రజలు వైసీపీకి తగిన బుద్ధి చెప్పి ఇంటికి పంపించారు. ఏమి చేయకుండానే అన్ని చేశామని గప్పాలు చెప్పుకున్నవారి తల రాతలను ప్రజలు తిరగ రాశారని యనమల అన్నారు.
