- పహల్గామ్‌ దారుణాన్ని దేశం ఎన్నటికీ మరువదు
- అత్యంత కిరాతకంగా, నిర్దయగా ప్రవర్తించారు
- ఉగ్రవాదులు ఎక్కడ ఉన్నా నిర్దాక్షణ్యంగా ఏరి పారేయాలి
- బాధిత కుటుంబాలకు ప్రభుత్వం అండగా ఉంటుంది
- ఉప ముఖ్యమంత్రి పవన్‌ స్పష్టీకరణ
- ఉగ్ర దాడిలో మృతి చెందిన కావలి వాసి మధుసూదనరావు భౌతిక కాయానికి నివాళులు అర్పించిన ఉప ముఖ్యమంత్రి
కావలి (చైతన్యరథం): పహల్గామ్‌లో ఉగ్రవాదుల దాడులు దారుణమని ఉప ముఖ్యమంత్రి పవన్‌ కళ్యాణ్‌ ఆగ్రహం వ్యక్తం చేశారు. ఉగ్రవాదులు అత్యంత కిరాతకంగా, టార్గెటెడ్‌గా పర్యాటకుల్ని హతమార్చారు. ఎంతో పైశాచికంగా ప్రవర్తించారు. ఈ ఘటనను భారత దేశం ఎప్పటికీ మరచిపోదు. ఉగ్రవాదులు ఎక్కడ ఉన్నా నిర్దాక్షణ్యంగా ఏరి వేయాలని స్పష్టం చేశారు. గురువారం మధ్యాహ్నం శ్రీపొట్టి శ్రీరామలు నెల్లూరు జిల్లా, కావలిలో పహల్గామ్‌ ఉగ్రవాదుల దాడిలో ప్రాణాలు కోల్పోయిన సోమిశెట్టి మధుసూదన రావు భౌతిక కాయానికి రాష్ట్ర పౌర సరఫరాల శాఖ మంత్రి నాదెండ్ల మనోహర్‌తో కలసి నివాళులు అర్పించారు. కుటుంబ సభ్యులను పరామర్శించారు. ఘటన వివరాలు అడిగి తెలుసుకుని వారిని ఓదార్చారు. అనంతరం పవన్‌ కళ్యాణ్‌ మీడియాతో మాట్లాడుతూ.. ఉగ్రవాదులు ఎంతో కిరాతకంగా దారుణంగా ప్రవర్తించారు. మధుసూదన రావు కుటుంబ సభ్యులను పరామర్శించినప్పుడు వారు పడిన క్షోభను తెలియజేశారు. వారి ఆవేదన వింటే మనసు వికలమైంది.
మాట్లాడడానికి మాటలు రావడం లేదు. విశాఖ వెళ్లి చంద్రమౌళి (పహల్గాం దాడుల మృతుడు) కుటుంబ సభ్యులను కూడా పరామర్శించిన అనంతరం మంగళగిరిలో మీడియా సమావేశం నిర్వహించి అన్నీ వివరంగా మాట్లాడుతాను. ప్రభుత్వం అన్ని రకాలుగా మృతుల కుటుంబాలకు భరోసా ఇస్తుంది. పరిహారం కంటే మనిషి చనిపోయిన బాధలో వారికి అండగా నిలవడం అవసరం. కశ్మీర్‌లో పరిస్థితులు నాకు తెలుసు. 1986 నుంచి 1989 వరకు అక్కడ షూటింగ్‌ శిక్షణకు వెళ్లే వాడిని. కశ్మీర్‌ ో తూటాలు పేలితే ఆ ప్రభావం దేశం నలుమూలలా కనబడుతుంది అనడానికి పహల్గాంలో ఉగ్రదాడి ఉదంతమే నిదర్శనం. గత కొంత కాలంగా కశ్మీర్‌లో ప్రశాంత పరిస్థితులు ఏర్పడ్డాయని పర్యాటకులు విహారానికి వెళ్లారు. ఇంతలోనే ముష్కరముఠా కాల్పులకు తెగబడిరది. ఏ మతాన్ని ఆచరిస్తారని అడిగి మరీ నిర్ధాక్షణ్యంగా చంపేశారని పవన్‌ ఆవేదన వ్యక్తం చేశారు.
అంతిమ యాత్రలో పాల్గొన్న మంత్రులు
మధుసూదన రావు అంతిమ యాత్రలో రాష్ట్ర మంత్రులు ఆనం రామనారాయణ రెడ్డి, నాదెండ్ల మనోహర్‌, సత్యకుమార్‌, కావలి ఎమ్మెల్యే దగుమాటి వెంకట కృష్ణారెడ్డి గారు, జిల్లా అధికారులు పాల్గొన్నారు.
