న్యూఢిల్లీ: ప్రధాని నరేంద్రమోదీ ఎంతో నమ్మకంతో పౌరవిమానయాన శాఖను తనకు అప్పగించారని… ఆయనకు ఇది ఎంతో ప్రతిష్టాత్మక మంత్రిత్వశాఖ అని తనతో చెప్పారని కేంద్రమంత్రి, టీడీపీ ఎంపీ రామ్మోహన్ నాయుడు అన్నారు. మంగళవారం ఢల్లీిలో ఆయన మీడియాతో మాట్లాడుతూ… భారతదేశ, తన వ్యక్తిగత ప్రతిష్టను సైతం నీ చేతిలో పెడుతున్నానని ప్రధాని మోదీ తనతో అన్నారని గుర్తు చేసుకున్నారు. దేశ ప్రజలకు సేవలు అందించాలని సూచించారన్నారు. సోమవారం కేబినెట్‌ భేటీ తర్వాత ప్రధాని మోదీ తనతో మాట్లాడినట్లు చెప్పారు. ఇది తనకు చాలా పెద్ద బాధ్యత అని… వయస్సుకు మించినదని అన్నారు. ప్రధాని మోదీ, చంద్రబాబు, పవన్‌ కల్యాణ్‌ల సహకారం తీసుకొని ముందుకు సాగుతానని చెప్పారు. గతంలో పౌరవిమానయాన మంత్రిగా పని చేసిన జ్యోతిరాదిత్య సింధియాను కూడా కలిసి సలహాలు, సూచనలు తీసుకుంటానన్నారు. త్వరలో బాధ్యతలు చేపట్టి.. పౌరవిమానయానానికి సంబంధించి దేశానికి, రాష్ట్రానికి ఒక విజన్‌ తయారు చేసి ముందుకు సాగుతామన్నారు. తిరుపతి, విజయవాడ సహా ఏపీలో ఉన్న విమానాశ్రయాలలో మౌలిక సదుపాయాలు అభివృద్ధి చేస్తామన్నారు. పౌరవిమానయాన శాఖలో తనకంటూ ప్రత్యేక గుర్తింపు వచ్చేలా పని చేస్తానని తెలిపారు. తనకు కేంద్రమంత్రి నితిన్‌ గడ్కరీ ఆదర్శమని… ఆయన రోడ్స్‌ అండ్‌ ట్రాన్స్‌పోర్ట్‌లో అద్భుతాలు సృష్టించారని ప్రశంసించారు. గడ్కరీ అంటే రోడ్లు… రోడ్లు అంటే గడ్కరీ అన్న విధంగా ఇప్పుడు తయారయిందన్నారు. అందుకే మరోసారి ఆయనకు అదే శాఖను అప్పగించారని గుర్తు చేశారు. అలాగే, రేపు… భవిష్యత్తులో పౌరవిమానయాన శాఖకు సంబంధించిన చర్చ జరిగితే రామ్మోహన్ నాయుడు ఉన్నప్పుడు ఇలా జరిగింది అనే మార్క్‌ తీసుకువస్తానని ధీమా వ్యక్తం చేశారు.
తనను యంగెస్ట్‌ మినిస్టర్‌ అనడం చాలా సంతోషంగా ఉందన్నారు. అయితే ఇది అదనపు బాధ్యత అవుతుందని పేర్కొన్నారు. ఎందుకంటే అందరి దృష్టి తనపైనే ఉంటుందన్నారు. అందుకు అనుగుణంగా ఏవియేషన్‌ మినిస్ట్రీలో తన మార్క్‌ ఉండాలనేది తన ఉద్దేశ్యమన్నారు. అన్ని మంత్రిత్వ శాఖలకు సంబంధించిన వారితో తనకు అనుబంధం ఉందని… అలాగే రాష్ట్ర సమస్యలు తనకు తెలుసునని రామ్మోహన్ నాయుడు చెప్పారు. అందుకే ఇతర మంత్రులతో మాట్లాడి రాష్ట్రానికి సంబంధించిన ప్రతి సమస్యను పరిష్కరించే ప్రయత్నం చేస్తానన్నారు. కేంద్ర ప్రభుత్వంలో ఉన్నాం కాబట్టి మనకు కావాల్సినవి తెచ్చుకునే వెసులుబాటు ఉందన్నారు.
తెలంగాణకు న్యాయం చేస్తా
తెలంగాణ ప్రజలను దృష్టిలో పెట్టుకొని తాను ఆ ప్రాంతానికి న్యాయం చేసే ప్రయత్నం చేస్తానని కేంద్రమంత్రి, టీడీపీ శ్రీకాకుళం ఎంపీ రామ్మోహన్ నాయుడు అన్నారు. తెలంగాణ ఎంపీలు, కేంద్రమంత్రులు, తెలంగాణ ముఖ్యమంత్రి… ఇలా ఎవరి నుంచి తనకు విజ్ఞప్తులు వచ్చినా మరో ఆలోచన లేకుండా ఆ ప్రాంతానికి న్యాయం చేసే ప్రయత్నం చేస్తానని హామీ ఇచ్చారు. తన సహకారంతో తెలంగాణలో అభివృద్ధి కార్యక్రమాలు చేపడతామని కేంద్రమంత్రి కిషన్‌ రెడ్డి అన్నారని… ఇది తనకు ఎంతో సంతోషాన్ని ఇచ్చిందన్నారు. ఇరు తెలుగు రాష్ట్రాల మధ్య ఈ అనుబంధంఎప్పుడూ కొనసాగాలన్నారు.
