- అందుకు అనుగుణంగా పారిశ్రామిక పాలసీ
- ‘స్పీడ్‌ ఆఫ్‌ డూయింగ్‌ బిజినెస్‌’ ప్రతిబింబించాలి
- అమరావతిలో రతన్‌ టాటా ఇన్నోవేషన్‌ హబ్‌
- బీసీ, ఎస్సీ, ఎస్టీ, మహిళా వ్యాపారవేత్తలకు ఇన్సెన్టివ్‌లు
- ఇండస్ట్రియల్‌, ఎంఎస్‌ఎంఈ, ఫుడ్‌ ప్రాసెసింగ్‌ డ్రాప్ట్‌లపై సమీక్ష
- వచ్చే క్యాబినెట్‌ ముందుకు కొత్త పాలసీలు
అమరావతి (చైతన్య రథం): ఉద్యోగ కల్పనే కూటమి ప్రభుత్వ ప్రధాన లక్ష్యమని ముఖ్యమంత్రి చంద్రబాబు స్పష్టం చేశారు. అందుకు అనుగుణంగా పారిశ్రామిక పాలసీలు ఉండాలని అభిప్రాయపడ్డారు. పారిశ్రామిక వేత్తలను, పెట్టుబడుదారులను ఆకర్షించి…. స్పీడ్‌ ఆఫ్‌ డూయింగ్‌ బిజినెస్‌కు మార్గం సుగమం చేసేలా నూతన పాలసీలు ఉండాలని చంద్రబాబు పేర్కొన్నారు. సచివాలయంలో ఇండస్ట్రియల్‌ డెవలప్మెంట్, ఎంఎస్‌ఎంఈ, ఫుడ్‌ ప్రాసెసింగ్‌, ప్రైవేట్‌ ఇండస్ట్రియల్‌ పార్క్‌ డ్రాఫ్ట్‌ పాలసీలపై సోమవారం అధికారులతో ముఖ్యమంత్రి సమీక్ష నిర్వహించారు. ప్రైవేటు ఇండస్ట్రియల్‌ పార్క్‌ పాలసీపై మరికొంత కసరత్తు జరగాలని సూచించారు. మిగిలిన మూడు పాలసీలను వచ్చే క్యాబినెట్‌ ముందుకు తీసుకొచ్చేందుకు నిర్ణయించారు. నూతన పాలసీతో రాష్ట్రంలో పెద్దఎత్తున పెట్టుబడులు తెచ్చేందుకు ఆస్కారం ఏర్పడుతుందని సీఎం అన్నారు. దాదాపు ఏడెనిమిది శాఖల్లో కొత్త పాలసీలకు శ్రీకారం చుడుతున్న ప్రభుత్వం… వీటి రూపకల్పనపై మూడు నెలలుగా కొత్త కసరత్తు చేస్తోంది.
ముఖ్యమంత్రి సూచనలు, పరిశ్రమ వర్గాల అభిప్రాయాలు, ఉత్తమ ఫలితాలు ఇచ్చిన ఇతర రాష్ట్రాల విధానాల ఆధారంగా అధికారులు పాలసీలు రూపొందించి ముఖ్యమంత్రి ముందు ఉంచారు. వీటిపై సీపం లోతుగా చర్చించి సమీక్ష నిర్వహించారు. ప్రతి పాలసీ తయారీలో తన అనుభవాలు, ఆలోచనలు పంచుకున్నారు. ఈ సమీక్షలో అధికారులు ఆయా పాలసీలపై ముఖ్యమంత్రికి ప్రజెంటేషన్‌ ఇచ్చారు. ఇండస్ట్రియల్‌ డెవలప్మెంట్ పాలసీ అమల్లోకి వచ్చిన వెంటనే పెట్టుబడులు పెట్టేందుకు వచ్చిన వారికి అదనంగా పారిశ్రామిక ప్రోత్సాహకాలు ఇచ్చేందుకు ప్రతిపాదించనట్లు తెలిపారు. కన్సెంట్‌ ఆఫ్‌ ఎస్టాబ్లిష్‌మెంట్‌, డేట్‌ ఆఫ్‌ కమర్షియల్‌ ప్రొడక్షన్‌ ఇచ్చిన మొదటి 200 కంపెనీలకు అదనపు ప్రోత్సాహకాలు ఇచ్చేలా డ్రాఫ్ట్‌ పాలసీలో ప్రతిపాదనలు చేశారు. ఎక్కువ ఉద్యోగాలు కల్పించే కంపెనీలకు అదనంగా 10శాతం ప్రోత్సాహకం ఇచ్చేలా ఇండస్ట్రియల్‌ పాలసీ విధానాలను రూపొందించారు.
ఈ సందర్భంగా సీఎం మాట్లాడుతూ…. దేశంలో ఎక్కడా లేనివిధంగా ఎస్క్రో ఖాతా ద్వారా పారిశ్రామిక ప్రోత్సాహకాలిచ్చే అంశంలో ఆలోచనలు చేస్తున్నట్లు తెలిపారు. తద్వారా కంపెనీలకు జాప్యం లేకుండా ఎస్క్రో అకౌంట్‌ ద్వారా ఇన్సెన్టివ్‌లు దక్కుతాయని… ఇది పారిశ్రామిక ప్రగతికి, ఉద్యోగ కల్పనకు దోహదం చేస్తుందని సీఎం అభిప్రాయపడ్డారు. త్వరితగతిన ఉపాధి, ఉద్యోగాల కల్పనకు ఇలాంటి కీలక నిర్ణయాలు దోహదం చేస్తాయని…. ఈ విషయంలో సాధ్యాసాధ్యాలను, విధివిధానాలను సమగ్రంగా స్టడీ చేసి….. నివేదిక ఇవ్వాలని అధికారులకు ముఖ్యమంత్రి ఆదేశించారు. ఒక కుటుంబం… ఒక పారిశ్రామికవేత్త అనే కాన్సెప్ట్‌తో ఎంఎస్‌ఎంఈ పాలసీ ఉండాలని.. అది కూటమి ప్రభుత్వ విధానమని సీఎం చంద్రబాబు అధికారులకు సూచించారు. అదేవిధంగా గత క్యాబినెట్‌లో ప్రకటించినట్లు అమరావతిలో దివంగత పారిశ్రామికవేత్త రతన్‌ టాటా పేరున రతన్‌టాటా ఇన్నోవేషన్‌ హబ్‌ను ఏర్పాటు చేయనున్నట్లు సీఎం ప్రకటించారు. పారిశ్రామికరంగ అభివృద్ధికి దోహదపడేలా ప్రత్యేక రతన్‌ టాటా హబ్‌ తీసుకురావాలని నిర్ణయం తీసుకున్నట్లు తెలిపారు.
స్కిల్స్‌ డెవలప్మెంట్, ఇన్నోవేషన్‌, స్టార్టప్స్‌, ఫెసిలిటేషన్‌ కేంద్రంగా అమరావతిలో రతన్‌ టాటా ఇన్నోవేషన్‌ హబ్‌ ఏర్పాటు చేయాలని సీఎం వివరించారు. రాష్ట్రంలోని 5 ప్రాంతాల్లో హబ్‌కు అనుంబంధంగా సెంటర్లు ఏర్పాటు జరుగుతుందని… ఒక్కో సెంటర్‌కు ఒక్కో మల్టీనేషనల్‌ కంపెనీ మెంటార్‌గా ఉండేలా డిజైన్‌ చేయాలని సీఎం అధికారులను ఆదేశించారు. ఆక్వా, ఫౌల్ట్రీరంగంలో వచ్చిన విధంగా ఫుడ్‌ ప్రాసెసింగ్‌లో ఫలితాలు వచ్చే విధానాలను అమలు చేయాలని ప్రధాన కార్యదర్శి నీరబ్‌ కుమార్‌ ప్రసాద్‌ సూచించారు. ఫౌల్ట్రీ రంగంతో పాటు పాడి పరిశ్రమ, మేకలు, గొర్రెలు పెంపకానికి ప్రాధాన్యత ఇవ్వాలని… తద్వారా ప్రజల జీవన ప్రమాణాలు పెరుగుతాయన్నారు. ప్రభుత్వ పాలసీల్లో ఈ అంశాలను చేర్చాలని సీఎస్‌ సూచించారు. ఎంఎస్‌ఎంఈ, ఫుడ్‌ ప్రాసెసింగ్‌ రంగంలో బీసీ, ఎస్సీ, ఎస్టీ, మహిళా వ్యాపారవేత్తలకు అదనంగా ఐదు శాతం ఇన్సెన్టివ్‌ ఇచ్చేలా ప్రతిపాదించాలని సీఎం సూచించారు. ప్రయివేట్‌ ఇండస్ట్రియల్‌ పార్క్స్‌ పాలసీపైనా అధికారులతో చర్చించారు. అయితే మరింత కసరత్తు తరువాత క్యాబినెట్‌ ముందుకు ప్రైవేట్‌ ఇండస్ట్రియల్‌ పార్క్‌ పాలసీని తీసుకురావాలని సీఎం సూచించారు. ఈ సమీక్షలో మంత్రులు టీజీ భరత్‌, కొండపల్లి శ్రీనివాస్‌, ఆయా శాఖల అధికారులు పాల్గొన్నారు.
