- యువ క్రీడాకారులకు స్ఫూర్తిగా నిలిచారు
- యువ క్రికెటర్‌ నితీష్‌ కుమార్‌ రెడ్డికి మంత్రి లోకేష్‌ అభినందనలు
అమరావతి (చైతన్యరథం): ఇటీవల ఆస్ట్రేలియాలో జరిగిన టెస్ట్‌ సిరీస్‌లో అసమాన ప్రతిభను కనబరిచిన ఆల్‌ రౌండర్‌ నితీష్‌ కుమార్‌ రెడ్డి ఉండవల్లి నివాసంలో మంత్రి నారా లోకేష్‌ను గురువారం మర్యాదపూర్వకంగా కలిశారు. తెలుగువాడి సత్తా చాటిన నితీష్‌ను ఈ సందర్భంగా మంత్రి లోకేష్‌ అభినందించారు. రాష్ట్రంలో యువ ఔత్సాహిక క్రీడాకారులకు నితీష్‌ స్ఫూర్తిగా నిలిచారని కొనియాడారు. నితీష్‌ను మంగళగిరి చేనేత శాలువా, జ్ఞాపికతో మంత్రి సత్కరించారు. ఈ సందర్భంగా నితీష్‌ కుమార్‌ రెడ్డి మాట్లాడుతూ ఇటీవల రాష్ట్ర ప్రభుత్వం ప్రకటించిన స్పోర్ట్స్‌ పాలసీ చాలా బాగుందన్నారు. అయితే అందులో క్రికెట్‌ను కూడా చేర్చి యువ క్రీడాకారులను ప్రోత్సహించాలని కోరారు. ఇందుకు మంత్రి నారా లోకేష్‌ సానుకూలంగా స్పందించారు. నితీష్‌ వెంట ఆంధ్ర క్రికెట్‌ అసోసియేషన్‌ అధ్యక్షుడు కేశినేని చిన్ని, కార్యదర్శి సానా సతీష్‌, తదితరులు ఉన్నారు.
