- యూరియాపై గట్టి నిఘా
- బ్లాక్‌ మార్కెట్టుకు పోకుండా విజిలెన్స్‌ పెంచండి
- ఆకస్మిక తనిఖీలు చేపట్టి నిల్వలు చెక్‌ చేయండి
- ఎరువులు పక్కదారి పట్టిస్తే లైసెన్సులు రద్దే..
- దుష్ప్రచారాన్ని తిప్పి కొట్టే బాధ్యత వ్యవసాయ శాఖదే
- ఎరువుల లభ్యతలో… సరఫరాలో తేడా రాకూడదు
- జిల్లాలవారీ యూరియా లభ్యతపై సీఎం ఆరా
- సీఎస్‌, డీజీపీ, విజిలెన్స్‌, వ్యవసాయశాఖతో టెలీకాన్ఫరెన్స్‌
అమరావతి (చైతన్య రథం): వ్యవసాయేతర అవసరాలకు యూరియా తరలిపోకుండా కట్టుదిట్టమైన చర్యలు తీసుకోవాలని ముఖ్యమంత్రి చంద్రబాబు అధికారులను ఆదేశించారు. ఎరువులు బ్లాక్‌ మార్కెట్‌కు తరలిస్తే కేసులు నమోదు చేయాలని స్పష్టం చేశారు. ఎరువుల లభ్యత, సరఫరాపై సీఎం టెలికాన్ఫరెన్స్‌ నిర్వహిస్తూ.. సీఎస్‌, డీజీపీ, వ్యవసాయశాఖ, విజిలెన్స్‌ అధికారులతో సమీక్ష నిర్వహించారు. జిల్లాల వారీగా ఎరువుల లభ్యత, సరఫరా వివరాలపై ఆరా తీశారు. విజిలెన్స్‌ తనిఖీలు ముమ్మరంగా చేపట్టాలని అధికారులను ఆదేశించారు. యూరియా, ఎరువుల స్టాక్‌ చెకింగ్‌ చేపట్టాలని స్పష్టం చేశారు. ఎరువుల ధరలు పెంచి అమ్మిన వారిపై కఠినచర్యలు తీసుకోవాలని సీఎం ఆదేశించారు. ‘ఎరువుల సరఫరా విషయంలో రైతులకు ఎలాంటి ఇబ్బంది తలెత్తకుండా చూసుకోవాలన్నారు. జిల్లాల వారీగా ఎరువుల లభ్యత ఏవిధంగా ఉంది, సరఫరా ఎలా జరుగుతోందనే అంశంపై ముఖ్యమంత్రి ఆరా తీశారు. ఈ సందర్భంగా జిల్లాల్లో ఉన్న పరిస్థితిని అధికారులు వివరించారు. అవసరానికి తగ్గట్టుగానే ఎరువులు, యూరియాను అందుబాటులో ఉంచుకున్నామని అధికారులు ముఖ్యమంత్రికి వివరించారు.
మార్క్‌ ఫెడ్‌ ద్వారా ఎంతమేర ఎరువులను సరఫరా చేస్తున్నారని చంద్రబాబు అడిగారు. ప్రైవేట్‌ డీలర్లకు ఎరువుల కేటాయింపు తగ్గించి మార్క్‌ ఫెడ్‌ ద్వారానే ఎక్కువగా సరఫరా జరిగేలా చూడాలని ముఖ్యమంత్రి ఆదేశించారు. మార్క్‌ ఫెడ్‌ ద్వారా దాదాపు 70 శాతంమేర ఎరువులు రైతులకు సరఫరా అయ్యేలా ప్రణాళికలు సిద్ధం చేసుకోవాలని ఆదేశించారు. ఎరువులు పక్కదారి పట్టకుండా చూడాలని సీఎం చంద్రబాబు సూచించారు. భారీ స్థాయిలో విజిలెన్స్‌ తనిఖీలు చేపట్టాలని ముఖ్యమంత్రి ఆదేశించారు. దీంతోపాటు యూరియా, ఎరువుల స్టాక్‌ కూడా చెక్‌ చేయాలని విజిలెన్స్‌ అధికారులను సీఎం ఆదేశించారు. అలాగే ఎరువుల సక్రమ వినియోగంపై రైతుల్లో అవగాహన పెంచాలని సీఎం సూచించారు. ఇదే సందర్భంలో ఎరువులు, యూరియా సరఫరా విషయంలో జరిగే దుష్ప్రచారాన్ని తిప్పికొట్టాలని సీఎం ఆదేశించారు. పొరపాట్లు ఉంటే సరి చేసుకోవాలని… అదే సమయంలో ఎవరైనా ఫేక్‌ ప్రచారాలు చేస్తుంటే.. అలాంటి వారిని పసిగట్టి… తగురీతిన సమాధానం చెప్పాలని ముఖ్యమంత్రి ఆదేశించారు. ఎరువులు, యూరియా లభ్యత విషయంలో రైతులకు పూర్తి స్థాయి సమాచారాన్ని అందుబాటులో ఉంచాలని ముఖ్యమంత్రి సూచించారు.
సమన్వయం చేసుకోవాలి…
స్థానిక అధికారులతో… జిల్లా, రాష్ట్రస్థాయి అధికారులు నిత్యం సమన్వయం చేసుకుంటూ పని చేయాలని చంద్రబాబు దిశా నిర్దేశం చేశారు. పరిశ్రమలు, రవాణా, విజిలెన్స్‌, పోలీస్‌, వ్యవసాయ శాఖల అధికారులు, జిల్లా కలెక్టర్లు సమన్వయంతో రోజువారీ పరిశీలన బృందాలను ఏర్పాటు చేసుకోవాలన్నారు. ఎక్కడైనా సమస్య వస్తే స్థానిక ప్రజా ప్రతినిధులతో సమన్వయం చేసుకోవాలని ముఖ్యమంత్రి చెప్పారు. ఎరువులు బ్లాక్‌ మార్కెట్టుకు తరలిస్తే కేసులు నమోదు చేయడానికి ఎక్కడా వెనుకాడొద్దని సీఎం చంద్రబాబు స్పష్టం చేశారు. ధరలు పెంచి ఎరువుల అమ్మిన వారిపై కఠిన చర్యలు తీసుకోవాలన్నారు. ఎరువులను పక్కదారి పట్టించారని నిర్ధారణైతే… సదరు డీలర్ల లైసెన్సులు కూడా రద్దు చేయాలని సీఎం స్పష్టం చేశారు. ఐఎంఎఫ్‌ఎస్‌ పోర్టల్లో సమాచారం అప్డేట్‌ ఏమేరకు అవుతుందని ఆరా తీసిన సీఎం… ఐఎంఎఫ్‌ఎస్‌ పోర్టల్లో రియల్‌ టైమ్‌ ప్రాతిపదికన సమాచారం అప్డేట్‌ కావడం లేదని తన దృష్టికి వచ్చిందన్నారు.
సాకులు చెప్పకుండా.. పోర్టల్లో సమాచారం నిరంతరం అప్డేట్‌ అయ్యేలా చర్యలు తీసుకోవాలని ముఖ్యమంత్రి స్పష్టం చేశారు. అత్యధికంగా ఎరువులు అమ్ముతున్న రిటైలర్లు… తరచుగా కొనుగోలు చేస్తున్న వారు ఎవరైనా ఉన్నట్టు గుర్తిస్తే… అలాంటివారి విషయంలో వెంటనే దర్యాప్తు చేపట్టాలని ముఖ్యమంత్రి సూచించారు. రైతు సేవా కేంద్రాలు, సహకార సంఘాల వద్ద సరిపడా నిల్వలు ఉండేలా చూసుకోవాని అధికారులను ఆదేశించారు. బయట ప్రైవేట్‌ డీలర్లకంటే.. ప్రాథమిక వ్యవసాయ సహకార సంఘాల ద్వారా ఎరువుల సరఫరా ఎక్కువగా జరిగేలా చూడాలన్నారు. రిటైల్‌ కేంద్రాల వద్ద కానీ.. పీఏసీఎస్‌ల వద్ద కానీ యూరియా, ఎరువుల కోసం రైతులు పడిగాపులు పడే పరిస్థితి రాకుండా చర్యలు తీసుకోవాలని సీఎం చంద్రబాబు స్పష్టమైన ఆదేశాలు జారీ చేశారు.
