- గ్లోబల్‌ డిజిటల్‌ టెక్నాలజీ పవర్‌ హౌస్‌గా ఏపీ..
- చంద్రబాబు నేతృత్వంలో విజన్‌ `2047 సాకారం
- పారిశ్రామిక అవసరాలకు అనుగుణంగా విద్యావ్యవస్థలో మార్పులు
- ఏపీ డిజిటల్‌ టెక్నాలజీ సమ్మిట్‌లో మంత్రి నారా లోకేష్‌ ఉద్ఘాటన
విశాఖపట్నం (చైతన్య రథం): ముఖ్యమంత్రి నారా చంద్రబాబు నేతృత్వంలో 2047 విజన్‌ సాకారమవుతుందని, గ్లోబల్‌ డిజిటల్‌ టెక్నాలజీ పవర్‌ హౌస్‌గా ఏపీ మారుతుందని విద్య, ఐటీ మంత్రి నారా లోకేష్‌ అన్నారు. ఏపీ డీటీఐ (డిజిటల్‌ టెక్నాలజీ ఇండస్ట్రీ), ఎస్టీపీఐ (సాఫ్ట్‌వేర్‌ టెక్నాలజీ పార్క్స్‌ ఆఫ్‌ ఇండియా) ఆధ్వర్యంలో రెండు రోజులపాటు నిర్వహిస్తున్న ఆంధ్రప్రదేశ్ డిజిటల్‌ టెక్నాలజీ సమ్మిట్‌-2025 కార్యక్రమానికి మంత్రి నారా లోకేష్‌ ముఖ్య అతిథిగా హాజరయ్యారు. ముందుగా జ్యోతి ప్రజ్వలన చేసి సమ్మిట్‌ను లాంఛనంగా ప్రారంభించారు. ఏడురంగాల్లో ఐటీ అభివృద్ధి, డీప్‌ టెక్నాలజీ ప్రాముఖ్యత, స్టార్టప్‌ల వంటి అంశాలపై సదస్సులో చర్చించనున్నారు.
ఈ సందర్భంగా మంత్రి లోకేష్‌ మట్లాడుతూ.. ఏపీలో సాంకేతిక అభివృద్ధికి దిశానిర్దేశం చేయనున్న ఈ సమ్మిట్‌లో పాల్గొనడం గర్వంగా ఉందన్నారు. భవిష్యత్‌లో ఏపీ.. గ్లోబల్‌ డిజిటల్‌ టెక్నాలజీ హబ్‌గా మారుతుందని, ఇన్నోవేషన్‌, డీప్‌ టెక్‌ నైపుణ్యాన్ని పెంపొందించడం ద్వారా ఆర్థిక వృద్ధి, సామాజిక పురోగతి సాధ్యపడుతుందన్నారు. ‘అభివృద్ధికి ఇన్నోవేషన్‌ చాలా ముఖ్యం. ఏఐ, రోబోటిక్స్‌, క్వాంటమ్‌ కంప్యూటింగ్‌, హెల్త్‌ టెక్‌, ఎడ్యుటెక్‌, ఎనర్జీ స్మార్ట్‌ సొల్యూషన్స్‌, ఇన్‌ఫ్రాస్ట్రక్చర్‌ టెక్నాలజీ రోబోయే రోజుల్లో కీలకపాత్ర పోషించనున్నాయి. సామాజిక సమస్యల పరిష్కారానికి ఐటీ, ఎలక్ట్రానిక్స్‌, మెడ్‌ టెక్‌, స్మార్ట్‌ టెక్నాలజీస్‌ కలసికట్టుగా పనిచేయాల్సిన అవసరముంది. ఆరోగ్యరంగంలో ఆధునిక సాంకేతిక పరిజ్ఞానం ఏవిధమైన మార్పులు తీసుకువచ్చిందో మనం చూస్తున్నాం’ అని లోకేష్‌ పేర్కొన్నారు.
ఏపీని 2 ట్రిలియన్‌ డాలర్ల ఎకానమీగా తీర్చిదిద్దుతాం
2047నాటికి ఏపీని 2 ట్రిలియన్‌ డాలర్ల ఎకానమీగా తీర్చిదిద్దుతామని లోకేష్‌ ప్రామిస్‌ చేశారు. ‘విజన్‌ `2020లో భాగంగా చంద్రబాబునాయుడు ఐటీని అభివృద్ధి చేశారు. ఇప్పుడు విజన్‌ `2047లో భాగస్వామ్యం కావడం నా అదృష్టం. చంద్రబాబునాయుడి సారథ్యంలో 2047 కలను సాకారం చేస్తాం. ఉద్యోగాలు పొందేందుకు, కల్పించేందుకు ఇన్నోవేషన్‌తో పాటు పారిశ్రామిక అవసరాలకు అనుగుణంగా పాఠ్య ప్రణాళికలో సమూల మార్పులు తీసుకువస్తాం. ఉన్నత విద్యను సంస్కరిస్తాం. ఎన్‌ఐఆర్‌ఎఫ్‌ ర్యాంకింగ్స్‌లో ఏపీ ప్రస్తుతం 9వ స్థానంలో ఉంది. దీనిని 3వ స్థానానికి తీసుకువస్తాం. ఇందుకు పరిశ్రమ వర్గాలు తమవంతు సహకారం అందించాలి. విశాఖలో ఏఐ యూనివర్సిటీ ఏర్పాటు చేస్తాం. రాష్ట్ర సాంకేతిక విప్లవంలో ఏపీ డిజిటల్‌ టెక్నాలజీ సమ్మిట్‌ తనవంతు పాత్ర పోషించాలి. సంక్షోభాలనే అవకాశాలుగా మలచుకోవాలని మన నాయకుడు చెప్పారు’ అని లోకేష్‌ అన్నారు.
అభివృద్ధిని వికేంద్రీకరిస్తాం
‘ఏపీ అభివృద్ధికి ప్రధాని ఎంతో సహకరిస్తున్నారు. నేడు 2 లక్షల కోట్ల పెట్టుబడులు వచ్చాయి. అభివృద్ధి వికేంద్రీకరణ చేస్తాం. రాయలసీమలోని అనంతపూర్‌కు కియా పరిశ్రమ రావడం ద్వారా తలసరి ఆదాయంలో 3వ స్థానంలో ఉండి గోదావరి జిల్లాలతో పోటీపడుతోంది. కర్నూలును రెన్యువబుల్‌ ఎనర్జీ హబ్‌గా రూపొందిస్తాం. చిత్తూరు, కడపను ఎలక్ట్రానిక్స్‌ మాన్యుఫాక్చరింగ్‌ హబ్‌గా మారుస్తాం. గోదావరి జిల్లాలను ఆక్వా హబ్‌గా మారుస్తాం. ఉత్తరాంధ్రకు త్వరలోనే ప్రపంచంలోనే అతిపెద్ద కెమికల్‌ పార్క్‌ రాబోతోంది. విశాఖకు డేటా సెంటర్‌ తీసుకువస్తాం. త్వరలోనే టీసీఎస్‌ రాబోతోంది. రతన్‌ టాటా ఇన్నోవేషన్‌ హబ్‌ను నెలకొల్పుతాం. పారిశ్రామికవేత్తలకు అన్ని విధాలా సహకారం అందిస్తాం’ అని మంత్రి నారా లోకేష్‌ వెల్లడిరచారు.
విశాఖ ఎంపీ మతుకుమిల్లి శ్రీభరత్‌ మాట్లాడుతూ.. ‘ఏపీలో ఆర్థిక పరిస్థితి అంతంతమాత్రంగానే ఉంది. సంక్షోభాలనే అవకాశాలుగా మల్చుకుందాం. ఈ ఐదేళ్లూ చాలా కీలకం. నూతన ఆవిష్కరణలకు సిద్ధంగా ఉన్నాం. విశాఖను ఐటీ హబ్‌గా మార్చేందుకు అవసరమైన ఎకో సిస్టమ్‌ను అభివృద్ధి చేస్తాం. పరిశోధన రంగాన్నీ మెరుగుపర్చాల్సిన అవసరం ఉంది’ అన్నారు. కార్యక్రమంలో డీటీఎన్‌ఎఫ్‌ ఛైర్మన్‌ శ్రీధర్‌ కొసరాజుతో పాటు కేడీఈఎమ్‌ ఛైర్మన్‌ బీవీ నాయుడు, అలోన్‌ ఓఎస్‌ కో-ఫౌండర్‌ సీపీ గుర్నాని, ఎస్టీపీఐ డైరెక్టర్‌ సి.కవిత, ఐటీఏఏపీ ప్రెసిడెంట్‌ లక్ష్మీ ముక్కవిల్లి తదితరులు పాల్గొన్నారు
