- ఉపాధి కోసం విదేశాలకు వెళ్తున్న వారికి సహాయక మార్గదర్శకాలు
- నైపుణ్య విభాగంపై సమీక్షలో మంత్రి నారా లోకేష్‌ ఆదేశాలు
ఉండవల్లి (చైతన్యరథం): యువత, పరిశ్రమలను అనుసంధానించేలా కూటమి ప్రభుత్వం అభివృద్ధి చేస్తున్న నైపుణ్యం పోర్టల్‌ను ఆగస్ట్‌ నాటికి పూర్తిచేసి సెప్టెంబర్‌ 1న ప్రారంభించేందుకు చర్యలు చేపట్టాలని అధికారులను విద్య, ఐటీ శాఖల మంత్రి నారా లోకేష్‌ ఆదేశించారు. ఉండవల్లి నివాసంలో నైపుణ్యాభివృద్ధి శాఖ అధికారులతో మంత్రి మంగళవారం సమీక్షించారు. డిస్ట్రిక్ట్‌ ఎంప్లాయింట్‌ ఆఫీసర్‌ను డిస్ట్రిక్ట్‌ ఎంప్లాయిమెంట్‌ అండ్‌ స్కిల్‌ ఆఫీసర్‌గా మార్చి.. వారి ఆధ్వర్యంలో జాబ్‌ మేళాలు, నైపుణ్య శిక్షణ కార్యక్రమాలు చేపట్టాలని మంత్రి ఆదేశించారు. ముఖ్యమంత్రి చంద్రబాబునాయుడు ఆదేశాల మేరకు ప్రతి నియోజకవర్గంలో 3 నెలలకు ఒకసారి జాబ్‌ మేళాలు నిర్వహిస్తున్న తీరును మంత్రికి అధికారులు వివరించారు. నైపుణ్య శిక్షణ ద్వారా విదేశాల్లో మెరుగైన ఉపాధి అవకాశాలను ఓంక్యాప్‌ ద్వారా కల్పించాలని ఈ సందర్భంగా మంత్రి సూచించారు. అదేవిధంగా ఉపాధి కోసం విదేశాలకు వెళ్తున్న వారికి ఎలాంటి ఇబ్బందులు తలెత్తకుండా వారికి తగిన సహాయక మార్గదర్శకాలను రూపొందించాలని ఆదేశించారు. వారికి ఏమైనా ఇబ్బందులు తలెత్తితే హెల్ప్‌ లైన్‌ నెంబర్‌ 0863-2340678, లేదా వాట్సాప్‌ నెంబర్‌ 8500027678ను సంప్రదించాలని సూచించారు. ఇటీవల థాయ్‌ల్యాండ్‌లో ఉద్యోగాల పేరుతో ఏజెన్సీల చేతిలో మోసపోయిన వారిని ఓంక్యాప్‌, ఎన్‌ఆర్‌టి ద్వారా స్వదేశానికి రప్పించేలా చర్యలు తీసుకోవాలని మంత్రి ఆదేశించారు. ఈ సమావేశంలో నైపుణ్యాభివృద్ధి, శిక్షణ విభాగం కార్యదర్శి కోన శశిధర్‌, ఏపీ స్కిల్‌ డెవలప్‌మెంట్‌ కార్పొరేషన్‌ ఎండీ, సీఈవో జి.గణేష్‌ కుమార్‌, కాలేజి ఎడ్యుకేషన్‌ డైరెక్టర్‌ నారాయణ భరత్‌ గుప్తా, ఇంటర్నేషనల్‌ స్కిల్లింగ్‌ అండ్‌ మొబిలిటీ అడ్వైజర్‌ సీత శర్మ, ఏపీఎస్‌ఎస్‌డీసీ ఎగ్జిక్యూటివ్‌ డైరెక్టర్‌ కె.రఘు, తదితరులు పాల్గొన్నారు.
“
