- ఎంఓయూని ర్యాటిఫై చేస్తూ ఐటీశాఖ ఉత్తర్వులు
- వచ్చే జనవరి 1కి సిద్ధం
అమరావతి (చైతన్యరథం): రాష్ట్ర ఐటీ రంగ అభివృద్ధిలో మరో కీలక ముందడుగు పడిరది. రాజధాని అమరావతిలో క్వాంటం వ్యాలీ టెక్నాలజీ పార్కు ఏర్పాటుకు చేసుకున్న ఎంఓయూను ర్యాటిఫై చేస్తూ శనివారం ఐటీశాఖ ఉత్తర్వులు జారీ చేసింది. అమరావతిలో క్వాంటం వ్యాలీ టెక్నాలజీ పార్కును అగ్రశ్రేణి ఐటీ సంస్థలు టీసీఎస్‌, ఎల్‌ అండ్‌ టీ, ఐబీఎం కలిసి నిర్మాణం చేపట్టనున్నాయి. క్వాంటం వ్యాలీ టెక్నాలజీ పార్క్‌ నిర్మాణానికి ఈ మూడు సంస్థలతో రాష్ట్ర ప్రభుత్వం ఇంతకు ముందు ఒప్పందం చేసుకున్న విషయం తెలిసిందే. ఇందులో భాగంగా, ఐబీఎం సంస్థ 156 క్యూబిట్‌ క్వాంటం సిస్టమ్‌ 2 ను అమరావతిలో ఏర్పాటు చేయనుంది. టీసీఎస్‌ సంస్థ క్వాంటం కంప్యూటింగ్‌ సర్వీసులు, సొల్యూషన్స్‌, పరిశోధన, హైబ్రిడ్‌ కంప్యూటింగ్‌ స్ట్రాటజీలు వంటి సేవలను అందించనుంది. ఇక ఎల్‌ అండ్‌ టీ సంస్థ క్లయింట్‌ నెట్‌వర్క్‌ స్టార్టప్‌ల నిర్వహణ, ఇంజనీరింగ్‌ స్టార్టప్‌లకు తగిన నైపుణ్య సహాయం అందించనుంది. ఈ ప్రాజెక్టును 2026 జనవరి 1 నాటికి పూర్తి చేయడమే లక్ష్యంగా పెట్టుకున్నారు. క్వాంటం వ్యాలీ పార్క్‌తో అమరావతిలో వేలాదిమందికి ఐటీ ఉద్యోగాలు లభించనున్నాయి.
