టిడిపి ప్రభుత్వం అధికారంలోకి వచ్చిన వెంటనే వాటర్ గ్రిడ్ ఏర్పాటు ద్వారా తాగునీటి సమస్యకు శాశ్వత పరిష్కారం చూపుతామని తెలుగుదేశం పార్టీ జాతీయ ప్రధాన కార్యదర్శి నారా లోకేష్ హామీ ఇచ్చారు. యువగళం పాదయాత్రలో భాగంగా బుధవారం మంత్రాలయం నియోజకవర్గం లచ్చుమర్రి గ్రామస్తులు యువనేత లోకేష్ ను కలిసి సమస్యలను విన్నివించారు. టీడీపీ పాలనలో మా గ్రామానికి లిఫ్ట్ ఇరిగేషన్ ద్వారా పుష్కలంగా నీరందేది. నేడు మోటార్లు పనిచేయక, నీరందక, వ్యవసాయం నష్టదాయకంగా మారింది. ఇళ్లకు సకాలంలో బిల్లులు ఇవ్వకపోవడంతో కేటగిరి మారి అధికంగా వస్తోంది. వంక పక్కన మాకు ఇళ్లు ఇవ్వడంతో వరదల సమయంలో ముంపుకు గురవుతున్నాం.
వైసీపీ ప్రభుత్వం వచ్చాక మా గ్రామంలో సిసి రోడ్లు, వీధి లైట్లు వేయలేదు. తాగునీరు అందక ఇబ్బందులు పడుతున్నాం. తుంగభద్ర నది పక్కనే ఉన్నా మాకు ఇసుక దొరకడం కష్టంగా మారింది. టిడిపి అధికారంలోకి వచ్చాక మా సమస్యల్ని పరిష్కరించండి అని వారు విజ్ఞప్తి చేశారు. వారి సమస్యలపై లోకేష్ సానుకూలంగా స్పందించారు. రైతులను ఆదుకునేందుకు టిడిపి హయాంలో నిర్మించిన లిఫ్ట్ ఇరిగేషన్ పథకాలన్నింటినీ జగన్మోహన్ రెడ్డి ప్రభుత్వం అధికారంలోకి వచ్చాక పాడుబెట్టింది. గత ప్రభుత్వంలో రాష్ట్రంలోని గ్రామీణ ప్రాంతాల్లో 25వేల కి.మీ. సిసి రోడ్లు, 30లక్షల తాగునీటి కుళాయిలు ఇచ్చాం. గ్రామీణ ప్రాంతాల్లో ప్రజలు ఎదుర్కొంటున్న ఇబ్బందులను ప్రణాళికాబద్ధంగా పరిష్కరిస్తామని లోకేష్ హామీ ఇచ్చారు.
