పింఛను అనర్హులపై వేటు

హైబ్రిడ్‌ విధానంతో కట్టుదిట్టమైన పరిశీలన
ఫిజికల్‌ వెరిఫికేషన్‌ కలెక్టర్ల బాధ్యత
సదరం సర్టిఫికెట్లపైనా దృష్టిపెట్టండి
ఉపాధి నిధులను సద్వినియోగపర్చాలి
అంతర్గత రహదార్ల అభివృద్ధి భేష్‌
పారిశ్రామికవేత్తలుగా డ్వాక్రా మహిళలు
కలెక్టర్లకు సీఎం స్పష్టమైన ఆదేశాలు

అమరావతి: రానున్న 3 నెలల్లో ప్రతి పింఛన్‌ను జిల్లా కలెక్టర్లు పరిశీలించాలని సీఎం చంద్రబాబు ఆదేశించారు. చాలామంది అనర్హులకు పింఛన్లు వెళ్తున్నాయంటూ మంత్రి నాదెండ్ల మనోహర్‌ చేసిన వ్యాఖ్యలకు చంద్రబాబు తగువిధంగా స్పందించారు. పంచాయితీ రాజ్‌ మరియు గ్రామీణాభివృద్ధిపై రెండో రోజు కలెక్టర్ల సమావేశంలో ముఖ్యమంత్రి నారా చంద్రబాబునాయుడు మాట్లాడుతూ… రాష్ట్రంలో వివిధ సామాజిక ఫించన్లు అర్హులకు అందేలా చూస్తూనే.. అనర్హులను తొలగించేలా కట్టుదిట్టమైన చర్యలు తీసుకోవాలని స్పష్టం చేశారు. ఇందుకు సాంకేతిక, హైబ్రిడ్‌ విధానాలను వినియోగించి ఫిజికల్‌ వెరిఫికేషన్‌తో అనర్హులను తొలగించాలన్నారు. ముఖ్యంగా వికలాంగులకు జారీ చేసే సదరం సర్టిఫికెట్ల జారీలో అక్రమాలను పూర్తిగా నివారించాలని సూచించారు. సర్టిఫికెట్లు జారీ చేసే డాక్టర్లు మెడికల్‌ బోర్డు మార్గదర్శకాలు సక్రమంగా పాటిస్తున్నారా? లేదా? పరిశీలించాలని, ఎక్కడైనా సదరం సర్టిఫికెట్ల జారీలో మార్గదర్శకాలను ఉల్లంఘిస్తే సంబంధిత వైద్యులపై కఠిన చర్యలు తీసుకోవాలని ఆదేశించారు గ్రామీణ ప్రాంతాల్లో మౌలిక సదుపాయాల అభివృద్ధికి మహాత్మాగాంధీ జాతీయ గ్రామీణ ఉపాధి హామీ పథకం ఓ వరమని అంటూ.. ఉపాధి నిధులను పూర్తిస్థాయిలో సద్వినియోగం చేసుకుని పెద్దఎత్తున మౌలిక సదుపాయాలు కల్పించాలని ఉద్బోధించారు.

100 రోజుల పనులు పూర్తి చేస్తే మెటీరియల్‌ కాంపోనెంట్‌ కింద నిధులు వస్తాయని, వాటితో వేగవంతంగా పనులు పూర్తి చేయవచ్చని దిశానిర్దేశం చేశారు. ‘15వ ఆర్థిక సంఘం ద్వారా గ్రామ పంచాయతీలకు ఇప్పటికే రూ.2 వేల కోట్లు విడుదల చేశాం. మరో రూ.1100 కోట్లు త్వరలో విడుదల కానున్నాయి. రాష్ట్రంలో సుమారు 80వేల కి.మీలు గ్రామీణ రహదార్లు ఉన్నాయి. మేజర్‌ పంచాయితీ రోడ్లు అనుసంధానం చేసేందుకు చర్యలు తీసుకోవాలి. గ్రామాల్లో అంతర్గత రహదారుల అభివృద్ధి సంతృప్తికరంగా ఉంది’ అని ముఖ్యమంత్రి చంద్రబాబు సంతోషం వ్యక్తం చేశారు. గ్రామాల్లో సీసీ రోడ్లు, డ్రెయిన్లు, వీధి దీపాలు, తాగునీరు, మరుగుదొడ్లు, ఇంటింటి చెత్త సేకరణ వంటి కనీస సౌకర్యాలు కల్పించడం పంచాయితీల బాధ్యతగా ముఖ్యమంత్రి పేర్కొన్నారు. 15వ ఆర్థిక సంఘం, సీనరేజీ తదితర నిధులు సమీకరించి పనులు చేపట్టాలని సీఎం చంద్రబాబు కలెక్టర్లుకు స్పష్టం చేశారు. గత ప్రభుత్వం జల్‌ జీవన్‌ మిషన్‌ పథకాన్ని పూర్తిగా నిర్వీర్యం చేసిందని, కూటమి ప్రభుత్వంలో ఆ పనులన్నీ పూర్తిగా మొదలుపెట్టామని అన్నారు. డ్వాక్వా మహిళలను ఔత్సాహిక పారిశ్రామికవేత్తలుగా తీర్చిదిద్దేందుకు కలెక్టర్లు చర్యలు తీసుకోవాలని సూచించారు. సుమారు 30 ఏళ్ళుగా స్వయం సహాయక సంఘాల మహిళలు కేవలం పొదుపు చేయడం, బ్యాంకు రుణాలు తీసుకోవడం, చిన్న చిన్న వ్యాపారాలు చేయడానికే పరిమితమయ్యారని అంటూ.. ఇకపై ప్రతీ డ్వాక్రా మహిళను ఔత్సాహిక పారిశ్రామికవేత్తగా తీర్చిదిద్దేందుకు చర్యలు తీసుకోవాలని ముఖ్యమంత్రి చంద్రబాబు కలెక్టర్లకు స్పష్టమైన ఆదేశాలు జారీ చేశారు.