- తరలి వచ్చిన తెలుగు సంఘాలు
- అలరించిన సాంస్కృతిక కార్యక్రమాలు
- ఎన్టీఆర్‌ కమిటీ లిటరేచర్‌ కమిటీ ఛైర్మన్‌ టీడీ జనార్ధన్‌ రూపొందించిన ‘తెలుగువారి గుండెబలం’ పాట, ‘తారకరామం’ పుస్తకం ఆవిష్కరణ
సింగపూర్‌ (చైతన్యరథం): ఎన్టీఆర్‌ సినీ వజ్రోత్సవ వేడుకలు ఆదివారం సింగపూర్‌లో ఘనంగా జరిగాయి. ప్రపంచవ్యాప్తంగా వివిధ దేశాల్లో ఎన్టీఆర్‌ సినీ వజ్రోత్సవ వేడుకలు జరుగుతున్న క్రమంలో భారత గణతంత్ర దినోత్సవం రోజున సింగపూర్‌లోని ఆర్యసమాజ్‌ ఆడిటోరియంలో ‘జై ఎన్టీఆర్‌ టీమ్‌’ సింగపూర్‌ ఆధ్వర్యంలో ఈ వేడుకలు ఉదయం 9 గంటల నుండి మధ్యాహ్నం 2 గంటల వరకు దాదాపు 500 మంది ఆహుతుల సమక్షంలో ఘనంగా, రమణీయంగా జరిగాయి.
ఈ కార్యక్రమానికి ఇండియా నుంచి ప్రత్యేకంగా విచ్చేసిన నందమూరి తారకరామారావు తనయుడు నందమూరి రామకృష్ణ, ఎన్టీఆర్‌ లిటరేచర్‌ కమిటీ ఛైర్మన్‌, తెలుగుదేశం పోలిట్‌బ్యూరో సభ్యుడు టీడీ జనార్ధన్‌, ప్రముఖ సినీ నటుడు ఎం. మురళీమోహన్‌ ముఖ్య అతిధులుగా పాల్గొన్నారు. ‘జై ఎన్టీఆర్‌ టీమ్‌ సింగపూర్‌’ తరఫున రేణుకుమార్‌ కన్నెగంటి, సురేష్‌ మొద్దుకూరి, వెంకట్‌ భీమినేని, కరుణాకర్‌ కంచేటిలు కార్యక్రమాన్ని పర్యవేక్షించారు.
తొలుత దీప ప్రజ్జ్వలనచేసి, ఎన్టీఆర్‌ విగ్రహానికి అతిథులు పూల మాలాలంకరణ చేయడంతో కార్యక్రమం మొదలయింది. ప్రొఫెసర్‌ బీవీఆర్‌ చౌదరి, వట్టికూటి శేషగిరి రావు స్వాగతోపన్యాసం చేసి ఎన్టీఆర్‌ సినీ, రాజకీయ రంగ విశేషాలను ప్రస్తావించారు. అతిథుల పరిచయం అనంతరం సాంస్కృతిక కార్యక్రమాలు ప్రారంభమయ్యాయి. ఎన్టీఆర్‌ చిత్రాల పాటలకు స్థానిక తెలుగు కుటుంబాలకు చెందిన పిల్లలు, యువతులు చేసిన నృత్యాలు, భరతనాట్యం, తదితర కార్యక్రమాలు అందర్నీ ఎంతగానో అలరించాయి.
అది నా అదృష్టం: నందమూరి రామకృష్ణ
ఈ సందర్భంగా ఎన్టీఆర్‌ లిటరేచర్‌ కమిటీ సభ్యుడు భగీరథ సంపాదకత్వంలో వెలువరించిన ‘తారకరామం’ పుస్తకాన్ని, ఎన్టీఆర్‌ లిటరేచర్‌ కమిటీ ఛైర్మన్‌ టీడీ జనార్ధన్‌ ఎన్టీఆర్‌పై రూపొందించిన ‘తెలుగువారి గుండెబలం’ వీడియో సాంగ్‌ను ఆవిష్కరించారు. కార్యక్రమంలో ముఖ్య అతిథిగా పాల్గొన్న నందమూరి రామకృష్ణ ప్రసంగిస్తూ ఎన్టీఆర్‌ సినీ వజ్రోత్సవ వేడుకల్ని ప్రపంచవ్యాప్తంగా నిర్వహించడం సంతోషంగా ఉందన్నారు. ఈ బృహత్తర కార్యక్రమానికి శ్రీకారం చుట్టి విజయవాడలో ఎన్టీఆర్‌ వజ్రోత్సవ వేడుకల్ని ‘నభూతో న భవిష్యతి’గా నిర్వహించిన ఎన్టీఆర్‌ లిటరేచర్‌ కమిటీ ఛైర్మన్‌ టీడీ జనార్ధన్‌కు ఆయన ధన్యవాదాలు తెలిపారు. ప్రపంచవ్యాప్తంగా వివిధ దేశాల్లో ఈ వేడుకల్ని నిర్వహించడానికి టీడీ జనార్ధన్‌, అట్లూరి అశ్విన్‌లు చొరవ తీసుకోవడం, తెలుగువారందర్నీ సమన్వయం చేసుకోవడం అభినందనీయమన్నారు. తన తండ్రి ఎన్టీ రామారావు నుంచి తాము క్రమశిక్షణ, సభ్యత, సంస్కారం వంటి ఉన్నత విలువలు నేర్చుకున్నామని, ఆ మహోన్నత మూర్తికి కొడుకుగా జన్మించడం తన అదృష్టం అని పేర్కొన్నారు.
ఎన్టీఆర్‌కు ఎంత చేసినా తక్కువే: టీడీ జనార్ధన్‌
ఈ కార్యక్రమానికి ముఖ్య అతిథిóగా పాల్గొన్న ఎన్టీఆర్‌ లిటరేచర్‌ కమిటీ ఛైర్మన్‌ టీడీ జనార్ధన్‌ ఉద్వేగభరితంగా, స్ఫూర్తిదాయకంగా మాట్లాడారు. సినీరంగంలో రారాజుగా నిలిచిన ఎన్టీఆర్‌ ను ఆంధ్రప్రదేశ్ రాజకీయాల్లో సంచలనం సృష్టించిన ఓ ధృవతారగా అభివర్ణించారు. ఎన్టీఆర్‌ ముందు, తర్వాతగా తెలుగునాట రాజకీయాల్ని చెప్పుకోవాలని, రాజకీయాల్లో నైతిక విలువల్ని, ప్రజాస్వామ్య విధానాల్ని, సంక్షేమ శకాన్ని ప్రారంభించిన మహాపురుషుడు ఎన్టీఆర్‌ అని కొనియాడారు. 2023లో ఎన్టీఆర్‌ శతజయంతిని పురస్కరించుకొని ఎన్టీఆర్‌ లిటరేచర్‌ కమిటీని ఏర్పాటు చేశామని తెలిపారు. ఎన్టీఆర్‌ నమ్మి ఆచరించిన మహోన్నత ఆశయాలు, సిద్ధాంతాలు, విధానాల్ని భావితరాలకు అందించాలనే లక్ష్యంతో తాము ఎన్టీఆర్‌కు సంబంధించిన అపురూప గ్రంథాలను వెలువరిస్తున్నామన్నారు. అందులో ‘తారకరామం’ తాజాదని చెప్పారు. భవిష్యత్తులో మరెన్నో పుస్తకాలు తీసుకురానున్నట్లు పేర్కొన్నారు. తనకు రాజకీయంగా జన్మనిచ్చి ప్రోత్సహించిన ఎన్టీఆర్‌కు ఎంత చేసినా తక్కువే అన్నారు. హైదరాబాద్‌లో 100 అడుగుల ఎన్టీఆర్‌ విగ్రహాన్ని ఏర్పాటు చేయడం లక్ష్యంగా తమ కమిటీ కృషి చేస్తోందని తెలిపారు. కాగా, తాము చేస్తున్న ఈ కార్యక్రమాలకు తెలుగుదేశం పార్టీ అధ్యక్షుడు, ముఖ్యమంత్రి నారా చంద్రబాబునాయుడి ప్రోత్సాహం, సహకారం ఉన్నాయని తెలిపారు.
భారతరత్న వస్తే సంతోషం: మురళీమోహన్‌
నటుడు మురళీమోహన్‌ ప్రసంగిస్తూ తనకు అన్న ఎన్టీఆర్‌తో, తెలుగుదేశం పార్టీతో ఉన్న అనుబంధాన్ని తెలియజేశారు. ఎన్టీఆర్‌ తనను సొంత సోదరుడిగా ఆదరించారని చెబుతూ, ఎన్టీఆర్‌కు భారతరత్న లభిస్తే తనలాంటి కోట్లాది మంది ఎన్టీఆర్‌ అభిమానులకు, తెలుగు వారికి సంతోషం కలుగుతుందన్నారు.
దాదాపు 4 గంటలపాటు ఎంతో హృద్యంగా సాగిన ఈ కార్యక్రమానికి సింగపూర్‌లోని తెలుగు సంఘాలన్నీ హాజరు కావడం విశేషం. కార్యక్రమాలలో పాల్గొని అలరించిన వారందరికీ ముఖ్య అతిధులు చేతులు మీదుగా మెమొంటోలు బహూకరించారు.
జై ఎన్టీఆర్‌ టీమ్‌ సభ్యులు సర్వేష్‌, కురిచేటి కరుణాకర్‌ వందన సమర్పణ చేశారు.
