అమరావతి (చైతన్యరథం): యువనేత నారా లోకేష్‌ యువగళం ప్రారంభమై సోమవారంతో రెండు సంవత్సరాలు పూర్తి కానున్న సందర్భంగా ఓ చిత్రకారిణి ప్రత్యేక రీతిలో అభినందనలు తెలియజేశారు. ప్రముఖ చిత్రకారిణి తేజశ్రీ నవధాన్యాలను ఉపయోగించి 6 అడుగుల పొడవు, 4 అడుగుల వెడల్పుతో నారా లోకేష్‌ అద్భుత చిత్రపటాన్ని రూపొందించారు. ఈ చిత్రపటాన్ని పూర్తిగా నవధాన్యాలను ఉపయోగించి ఎంతో శ్రద్ధతో తీర్చిదిద్దారు. తేజశ్రీ సృజనాత్మకత, కృషి ఈ చిత్రంలో ప్రతిఫలించింది. ఇది కళారూపంలోనే కాకుండా, భారతీయ సాంప్రదాయాలను, ప్రకృతితో మమేకమయ్యే తీరును తెలియజెప్పేలా ప్రత్యేకతను సంతరించుకుంది. దీనిపై తేజశ్రీ మాట్లాడుతూ నారా లోకేష్‌ యువగళం ప్రజల్లో స్ఫూర్తిని నింపిన ప్రస్థానం అన్నారు. ఆయన కృషిని, ప్రజలతో మమేకమై వేల కిలోమీటర్లు నడిచిన శ్రమను ప్రతిబింబించేందుకు చేసిన ప్రయత్నంలో భాగమే ఈ చిత్రపటం అన్నారు. నారా లోకేష్‌ అభిమానులు, కళా ప్రియులు ఈ చిత్రపటాన్ని ప్రశంసిస్తూ, తేజశ్రీ ప్రతిభకు అభినందనలు తెలియజేశారు.
నవధాన్యాలతో నారా లోకేష్‌ చిత్రపటం
రెండేళ్ల యువగళానికి చిత్రకారిణి అభినందన మాలిక
