నిన్న.. నేడు.. రేపు

ఎన్టీఆర్ ఆశయం, చంద్రబాబు దార్శనికత, లోకేష్ పోరాట పటిమ

నేటితరం యువత చెంతకు టిడిపి భావజాలం

సంపదసృష్టి చంద్రబాబుకే సాధ్యమని విశ్వ జనాభిప్రాయం

లోకేష్ రూపంలో తెలుగుజాతికి దక్కిన భరోసా

తెలుగుజాతికి దిశానిర్దేశం చేయనున్న మహానాడు
………
తెలుగుదేశం పార్టీ ఈనెల 27,28 తేదీలలో జరుప తలపెట్టిన మహానాడులో ఎన్నికల శంఖారావం పూరించనున్నది. ఎన్నికలు ఏ క్షణంలో జరిగినా ఎదుర్కొనే దిశగా పార్టీ శ్రేణులను అధినేత నారా చంద్రబాబు నాయుడు ఇప్పటికే సమాయత్తం చేశారు. ఈ మహానాడులో ఎన్టీఆర్ శతజయంతి ఉత్సవాలను సైతం ఘనంగా నిర్వహించనున్నారు. గత సంవత్సరం కాలంగా ప్రపంచవ్యాప్తంగా వున్న తెలుగువారంతా ఎన్టీఆర్ శతజయంతి వేడుకలను నిర్వహిస్తున్నారు. విదేశాలలో సైతం ఈ వేడుకలను ఘనంగా నిర్వహించారు. పార్టీ ఆవిర్భవించి నాలుగు దశాబ్దాలు పూర్తయిన సందర్భంగా టిడిపికి నూతన జవసత్వాలు సమకూర్చే విధంగా చంద్రబాబు శ్రేణులకు మార్గదర్శనం చేస్తున్నారు.

ప్రస్తుతం రాష్ట్రంలో కొత్తగా ఓటర్లుగా నమోదైన యువతకు తెలుగుదేశం పార్టీ స్థాపన నాటి లక్ష్యాలు, ఆశయాలు తెలిసే అవకాశం లేదు. ఎన్టీఆర్ శతజయంతి వేడుకల సందర్భంగా నేటి తరానికి టిడిపి భావజాలం పై అవగాహన ఏర్పడేందుకు ఆస్కారం ఏర్పడింది. తెలుగుజాతికి ఎన్టీఆర్ గుర్తింపును తీసుకువస్తే, దానిని విశ్వవ్యాప్తం చేసింది చంద్రబాబు నాయుడు. తెలుగుజాతి జీవన ప్రమాణాలు పెంచటానికి, విశ్వ వీధుల్లో తెలుగు పతాక సగర్వంగా ఎదిగేందుకు చంద్రబాబు నాయుడు నిర్విరామ కృషి చేశారు. అదేవిధంగా అభివృద్ధి, సంక్షేమాన్ని సమన్వయం చేసుకుంటూ ఉమ్మడి ఆంధ్రప్రదేశ్ రాష్ట్రాన్ని చంద్రబాబు తీర్చిదిద్దిన తీరు దేశంలోనే ఒక నమూనాగా నిలిచింది.

కాలంతో పోటీపడుతూ చంద్రబాబు రూపొందించిన ప్రణాళికల ఫలాలు నేడు ప్రపంచవ్యాప్తంగా వున్న తెలుగువారి అభ్యున్నతికి ఆలంబనగా వున్నాయి. చంద్రబాబు ఆలోచనల నుంచి ఆవిర్భవించిన సైబరాబాద్ నేడు మహానగరం గా మారి లక్షలాది మందికి ఉపాధి కల్పనా కేంద్రంగా, తెలంగాణ రాష్ట్రానికి ప్రధాన ఆదాయవనరుగా మారింది. గతంలో రాళ్ళ గుట్టలు, పిచ్చిమొక్కలు తో నిర్మానుష్యంగా వున్న సైబరాబాద్ ప్రాంతం నేడు దేశ, విదేశీ సంస్థలతో లక్షలాది మంది ఉపాధి పొందుతూ ప్రభుత్వానికి సైతం పెద్ద ఎత్తున ఆదాయం సమకూరుస్తున్నది. దీంతో చంద్రబాబు సంపద సృష్టికర్తగా గుర్తింపు పొందారు. అదే క్రమంలో నవ్యాంధ్ర ప్రదేశ్ రాజధానిగా అమరావతిని తీర్చిదిద్దాలని తపన పడ్డారు.

చంద్రబాబు సామర్థ్యంపై అపార నమ్మకం తో 29 వేలమందికి పైగా రైతులు రాజధాని నిర్మాణం కోసం వారి భూములను స్వచ్ఛందంగా ఇచ్చివేసారు. ఈ భూములు ఇచ్చిన రైతుల్లో ఎకరం లోపు వున్న వారు 20,490 మంది, 2 ఎకరాల లోపు రైతులు 5,227మంది, 5 ఎకరాల కంటే తక్కువ వున్నవారు 3,387 మంది వున్నారు. 5 ఎకరాలకు మించి వున్న రైతులు కేవలం 827 మంది మాత్రమే. రాజధాని కోసం భూములు ఇచ్చిన రైతులలో అత్యధికులు బిసి, ఎస్సీ వర్గాలకు చెందినవారే వున్నారు. అమరావతి నిర్మాణం పూర్తయి వుంటే ప్రపంచంలో నే తొలుత దళిత బహుజన రాజధానిగా చరిత్రలో నిలిచిపోయేది. అయితే క్షుద్ర రాజకీయం ఆ అవకాశాన్ని కాలరాసింది. ప్రస్తుత పరిస్థితుల్లో అమరావతి వంటి సంపద సృష్టి కేంద్రం నిర్మించాల్సిన ఆవశ్యకత ఎంతైనా వుంది. అది కేవలం చంద్రబాబు వల్లనే సాధ్యమవుతుంది అన్న భావన ప్రతి ఒక్కరిలో నెలకొని వున్నది. మహానాడులో అందుకు సంబంధించి ఒక దృఢ సంకల్పం తీసుకునే విధంగా చంద్రబాబు శ్రేణులకు దిశానిర్దేశం చేయనున్నారు.

అదేవిధంగా తెలుగుదేశం పార్టీ జాతీయ ప్రధాన కార్యదర్శి నారా లోకేష్ తెలుగుజాతి కి భావి ఆశాజ్యోతి గా ఆవిర్భవించారు. యువగళం పాదయాత్రతో లోకేష్ టిడిపి శ్రేణులకే కాకుండా సాధారణ ప్రజానీకానికి అత్యంత ఆప్తునిగా గుర్తింపు పొందారు. కుల, మత, వయో భేదాలతో నిమిత్తం లేకుండా అన్నివర్గాల ప్రజలు లోకేష్ ను తమ ఇంటి బిడ్డగా భావిస్తూ ఎనలేని ఆప్యాయత కనబరుస్తుండటం విశేషం. టిడిపి కి లోకేష్ ఇప్పుడు తరగని ఆస్తిగా మారారు. తాత ఎన్టీఆర్ ఆశయాలు, పట్టుదల, తండ్రి చంద్రబాబు లోని చాణక్యం, దార్శనికత కలబోతగా వున్న లోకేష్ రూపంలో తెలుగుజాతికి ఒక భరోసా దక్కింది.

ఇదేం ఖర్మ మన రాష్ట్రానికి అంటూ చంద్రబాబు నిర్విరామంగా పర్యటనలు చేస్తూ ప్రజల్లో చైతన్యం నింపుతున్నారు. అదే సమయంలో అధికార పార్టీ ప్రజావ్యతిరేక విధానాలు, నాయకుల అవినీతిని ఎండగడుతూ బహిరంగ చర్చకు రండంటూ లోకేష్ విసురుతున్న సవాళ్లు వైసీపీ నాయకుల గుండెల్లో గుబులు రేపటమే గాక ప్రజల్లో పోరాట స్ఫూర్తిని రగులుస్తున్నాయి. ఒక వైపు చంద్రబాబు, మరో వైపు లోకేష్ ల దన్నుతో తెలుగుదేశం పార్టీ శ్రేణులు ఇనుమడించిన ఉత్సాహంతో కదం తొక్కుతున్నాయి. అదే స్ఫూర్తిని కొనసాగిస్తూ 27, 28 తేదీలలో రాజమహేంద్రవరంలో నిర్వహించ తలపెట్టిన మహానాడు చరిత్రలో నిలిచిపోయే విధంగా వుండాలన్న పట్టుదల, కసితో టిడిపి శ్రేణులు పనిచేస్తున్నాయి.