- అనుగుణంగా ఏపీ ల్యాండ్ గ్రాబింగ్ చట్ట సవరణ
- ఫొటోల పిచ్చితో జనం సొమ్ము జగన్ వృధా
- ప్రజాహిత పాలనకు కలెక్టర్లే సారథులు
- రాష్ట్ర రెవిన్యూ, రిజిస్ట్రేషన్ల శాఖా మంత్రి అనగాని
అమరావతి (చైతన్య రథం): గత ప్రభుత్వహయాంలో జరిగిన ల్యాండ్ గ్రాబింగ్ అంశం పునరావృతం కాకుండా ఉండేందుకై పేదవాడికి న్యాయం జరిగేలా ఏపీ ల్యాండ్ గ్రాబింగ్ చట్టాన్ని సవరించనున్నట్టు రాష్ట్ర రెవిన్యూ, రిజిస్ట్రేషన్లు మరియు స్టాంప్స్ శాఖ మంత్రి అనగాని సత్యప్రసాద్ పేర్కొన్నారు. సోమవారం రాష్ట్ర ముఖ్యమంత్రి నారా చంద్రబాబు అద్యక్షతన రాష్ట్ర సచివాలయంలో జరిగిన జిల్లా కలెక్టర్ల సదస్సులో మంత్రి మాట్లాడుతూ.. 1982 ఏపీ ల్యాండ్ గ్రాబింగ్ యాక్టును అనుసరించి గుజరాత్ రాష్ట్రంలో కఠినమైన నియమ నిబంధనలు, జరిమానాలను రూపొందించడం జరిగిందన్నారు. పేదవాడికి ఎటువంటి అన్యాయం జరుగకుండా ఉండేందుకై వాటికంటే మరింత కఠినమైన నియమ నిబంధనలు, జరిమానాలతో ఏపీ ల్యాండ్ గ్రాబింగ్ యాక్టును సవరించేందుకు ప్రభుత్వం చర్యలు చేపడుతున్నట్టు వెల్లడిరచారు. గత ప్రభుత్వ పాలనలో దాదాపు తొమ్మిది లక్షల ఎకరాల అసైన్డ్ భూములను ఫ్రీహోల్డుగా మార్చడమేకాకుండా, దాదాపు 25 వేల ఎకరాలను రిజిస్ట్రేషన్ కూడా చేయించుకున్నారన్నారు. ఈ అంశంపై జిల్లా కలెక్టర్లు ప్రత్యేక దృష్టిసారించి సామాన్యుడికి న్యాయం జరిగేలా వ్యవస్థను గాడిలోపెట్టాలని మంత్రి కోరారు.
ముఖ్యమంత్రితో పాటు పలువురు మంత్రుల వద్దకు వచ్చే విజ్ఞప్తుల్లో 80శాతంపైగా రెవిన్యూకు సంబంధించినవేనన్నారు. ప్రజల హక్కులను కాపాడేలా రెవిన్యూ శాఖను ప్రక్షాళన చేయాలని, అధికారులంతా చట్టానికి లోబడి పనిచేయాలన్నది సీఎం అభిమతంగా వివరించారు. గత పాలకులు అరాచకాలు బయటపడకుండా మదనపల్లి సబ్ కలెక్టర్ కార్యాలయంలో ఫైళ్లను దగ్ధం ఘట్టాన్ని మంత్రి ప్రస్తావించారు. మదనపల్లి వెళ్లిన రెవెన్యూ శాఖ ప్రత్యేక ప్రధాన కార్యదర్శి ఆర్పీ సిసోడియాకు కుప్పలు తెప్పలుగా విజ్ఞాపనలు రావడమే గత ప్రభుత్వం చేసిన కుంభకోణాలకు నిదర్శనమన్నారు.
ఫొటోల పిచ్చి.. ప్రజాధనం వృధా
గత ముఖ్యమంత్రి ఫొటోల పిచ్చితో ప్రజాధనాన్ని దుర్వినియోగం చేస్తూ పాస్ పుస్తకాలపై ఫొటోలను ముద్రించుకోవడం దారుణమని మంత్రి అనగాని వ్యాఖ్యానించారు. గత ప్రభుత్వం ప్రారంభించిన రీ-సర్వేను కొనసాగించినా, నిలుపుదల చేసినా సమస్యలెన్నో ఎదురవుతున్నాయని, ఈ విషయంలో గ్రామ సదస్సుల నిర్వహించి సమస్యల పరిష్కారానికి కృషి చేయడంపై జిల్లా కలెక్టర్లంతా ప్రత్యేక దృష్టి సారించాలన్నారు. రాష్ట్రంలో 77 లక్షల సరిహద్దు రాళ్లున్నాయని, వాటిని సద్వినియోగం చేసుకునేలా ప్రణాళికా బద్దంగా చర్యలు చేపట్టాలని కలెక్టర్లను కోరారు.
గత ప్రభుత్వం అన్ని వ్యవస్థలను నిర్వీర్యం చేయడమేకాదు, ఒకే ఒకసారి ప్రజావేదిలో జిల్లా కలెక్టర్లతో సమావేశం నిర్వహించి, మరుసటిరోజు వేదికనే కూల్చేసిన ప్రభుత్వ సైకో స్వభావాన్ని ప్రజలు గ్రహించారే గానీ అధికారుల్లో కొందరు గ్రహించలేకపోయారన్నారు. గత ముఖ్యమంత్రి వ్యవస్థను కూల్చేందుకు ప్రయత్నించాడు కాబట్టే ఆ వ్యవస్థలే అతన్ని మింగేశాయన్నాని మంత్రి అనగాని ఎద్దేవా చేశారు.
ప్రజాహిత పాలనకోసమే సదస్సు
‘కూటమి ప్రభుత్వం వచ్చిన తదుపరి తొలిసారిగా జిల్లా కలెక్టర్లతో నిర్వహిస్తున్న సమావేశమిది. గత ప్రభుత్వ హయాంలో జరిగిన తప్పొప్పులను సమీక్షించి రాబోయే రోజుల్లో ప్రజాహిత పరిపాలన ఎలా అందించాలో దిశానిర్దేశం చేయడానికి ఈ సదస్సు అన్నారు. సీఎంగా చంద్రబాబు బాధ్యత చేపట్టిన వెంటనే ఎన్నికల హామీల దస్త్రాలపై సంతకాలు చేశారన్నారు. నిరుద్యోగుల కోసం. మెగా డిఎస్సీ, ల్యాండ్ టైటిలింగ్ చట్టం రద్దు, అన్న క్యాంటీన్ల పునరుద్దరణ, సామాజిక భద్రతా ఫించన్లు పెంపు మరియు స్కిల్ సెన్సెస్ ఫైళ్లపై సంతకాలు చేసి పలువర్గాల ఆశలు, ఆకాంక్షలు నెరెవేర్చేలా చర్యలు చేపడుతున్నారన్నారు. ఫించన్ల పంపిణీ విషయంలో కలెక్టర్లు అద్బుతంగా పనిచేసి ఒకటవ తేదీనే 97 శాతం అందజేయడం అభినందనీయమన్నారు. జిల్లా పరిపాలనా వ్యవహరాల్లో జిల్లా కలెక్టర్లు పట్టుకొమ్మలని, ప్రభుత్వ ఆలోచనా విధానాలను ప్రతిబింబించే విధంగా క్షేతస్థాయిలో కలెక్టర్లు పనితీరు ఉండాలన్నారు.
అపార పరిపాలనా అనుభవమున్న సీఎం చంద్రబాబు, మానవతా దృక్పధమున్న ఉప ముఖ్యమంత్రి కొణిదెల పవన్ కళ్యాణ్ ఆలోచనలతో రాష్ట్రాన్ని పూర్తిస్థాయిలో గాడిపెట్టాలనే కార్యక్రమం చేపట్టామన్నారు. అందుకు అనుగుణంగా జిల్లా కలెక్టర్లు శక్తివంచన లేకుండా కృషిచేస్తూ రాష్ట్ర సమగ్రాభివృద్దికి, నిరుపేదల సంక్షేమానికి, అభ్యున్నతికి కృషిచేయాలని మంత్రి అనగాని కోరారు.
