- 16,800 స్థానిక సంస్థల పదవులను రద్దు చేసి కొద్దిమందికి సీట్లు ఇవ్వడం ఉద్దరించడమా?
- కూటమి ప్రకటించిన బీసీ డిక్లరేషన్తో బీసీల్లో భరోసా
- ‘ప్రజాగళం’ విజయంతో జగన్‌ వణుకు మొదలైందన్న కొల్లు రవీంద్ర
అమరావతి, చైతన్యరథం: బీసీలకు ఎక్కువ సీట్లు ఇచ్చి అండగా నిలిచామని చెప్పుకునే జగన్‌రెడ్డి.. స్థానిక సంస్థల రిజర్వేషన్లు కుదింపుపై సమాధానం చెప్పాలని టీడీపీ పొలిట్‌బ్యూరో సభ్యులు, మాజీ మంత్రి కొల్లు రవీంద్ర డిమాండ్‌ చేశారు. స్థానిక సంస్థల్లో రిజర్వేషన్ల కోతతో 16,800 పదవులు రద్దు చేసి కొద్దిమందికి సీట్లు ఇవ్వడం ఉద్దరించడమా అని ప్రశ్నించారు. ఓడిపోయే స్థానాలు బీసీలకు కేటాయించి ఎక్కువ సీట్లు ఇచ్చాననడానికి సిగ్గుపడాలన్నారు. రాయలసీమలో బీసీలకు ఎన్ని సీట్లిచ్చావో చెప్పగలవా అని ప్రశ్నించారు. అక్కడి బీసీలపై జగన్‌ సామాజిక వర్డీయులు పెత్తనం చెలాయిస్తున్నారన్నారు. పదవుల గురించి మాట్లాడే జగన్‌ రెడ్డి టీటీడీ, ఏపీఐఐసీ లాంటి సంస్థల్లో బీసీలకు ఏం ఇచ్చారో సమాధానం చెప్పాలని డిమాండ్‌ చేశారు. బీసీలు ఆ పదవులకు పనికిరారా? అన్నీ రెడ్లకేనా? ఇదేనా సామాజిక న్యాయం అని ప్రశ్నించారు. తన అవినీతి పత్రికలో బీసీల గురించి చెత్త రాతలు రాయడం హేయమన్నారు. బీసీ పథకాలు రద్దు చేశారని, రూ.75 వేల కోట్ల సబ్‌ ప్లాన్‌ నిధులు దారి మళ్లించారని, కార్పొరేషన్లు నాశనం చేశారని విమర్శించారు. వందలాది మంది బీసీల పీకలు కోసి హత్య చేశారని, వేలాది మందిపై అక్రమ కేసులు, దాడులు, దౌర్జన్యాలకు పాల్పడ్డారని గుర్తుం చేశారు. సోమవారం మంగళగిరిలోని టీడీపీ కేంద్ర కార్యాల యంలో ఆయన విలేకరులతో మాట్లాడుతూ తెలుగు దేశం బీజేపీ జనసేన కూటమి తాజాగా బీసీ డిక్లరేషన్ ప్రకటించిందని, అధికారంలోకి వస్తే ఏం చేస్తామో చెబుతూ డిక్లరేషన్ విడుదల చేశామని, అది చూసినప్పటి నుండి జగన్‌రెడ్డికి నిద్ర లేకుండా పోయిందని అన్నారు. ఆ డిక్లరేషన్తో తమ బతుకులు మారతాయనే భరోసా బీసీ వర్గాల్లో కలిగిందన్నారు. బీసీలకు మేలు చేసేది, చేయగలిగేది తెలుగుదేశం మాత్రమేనని ప్రజలు తెలుసుకున్నారన్నారు. కూటమి అధికారంలోకి వచ్చాక కోల్పోయిన రిజర్వేషన్లను పునరుద్దరించుకుంటామని, అన్ని నామినేటెడ్‌ పదవుల్లో 34 శాతం రిజర్వేషన్లు కల్పిస్తామన్నారు. ప్రతి సామాజిక వర్గానికి న్యాయం చేసి తీరుతామన్నారు. ఆగిపోయిన ప్రతి పథకాన్ని పునరుద్దరించుతామన్నారు. ఆర్ధికంగా సామాజికంగా రాజకీయంగా బీసీలను ఉన్నత స్థానంలో నిలిపితీరే బాధ్యత కూటమి తీసుకుంటుందన్నారు. జగన్‌ రెడ్డి ఎన్ని నీతి మాలిన రాతలు రాసినా.. నమ్మేందుకు ప్రజలు సిద్ధంగా లేరన్నారు.
ప్రజాగళం విజయంతో జగన్‌ వెన్నులో వణుకు
కొల్లు రవీంద్ర మాట్లాడుతూ…ఒకవైపు ప్రజాగళం బహిరంగ సభ గ్రాండ్‌ సక్సెస్‌, మరోవైపు కూటమి బీసీ డిక్లరేషన్‌పై ప్రజల్లో హర్షం వ్యక్తమవుతుండడంతో జగన్‌ రెడ్డికి వెన్నులో వణుకు మొదలైంది. ప్రజలు లక్షలాదిగా తరలి వచ్చారు. టీడీపీ బీజేపీ జనసేన కూటమితోనే రాష్ట్రాభివృద్ధి సాధ్యమని నమ్మారు. అందుకు నిదర్శనం.. చిలకలూరిపేటలోని ప్రజాగళం సభ. జాతీయ రహదారిపై సుమారు 20 కిలోమీటర్లకు పైగా వాహనాలు స్తంభించిపోయాయి. సభకు పది లక్షల మందికి పైగా ప్రజలు హాజరయ్యారు. ఇంత భారీగా జరుగుతున్న సభ విషయంలో పోలీసుల వైఖరి, పోలీసుల వైఫల్యం స్పష్టంగా కనిపించింది. ప్రధాన మంత్రి హాజరయ్యే సభను, అక్కడి భద్రత ఏర్పాట్లను పర్యవేక్షించాల్సిన బాధ్యత డీజీపీకి లేదా? ట్రాఫిక్‌ నియంత్రించాల్సిన పోలీసులు, బారికేడ్లు పెట్టి ఆపేయడమేంటి? వాహనాలు కదలనీయకుండా నిలువరించడం వెనుక జగన్‌ రెడ్డి హస్తం ఉంది. మరోవైపు సౌండ్‌ సిస్టం వద్ద రక్షణగా ఉండాల్సిన పోలీసులు ఏమైపోయారు? చంద్రబాబు, పవన్‌ కల్యాణ్‌ మాట్లాడినపుడు అడ్డంకులు సృష్టించారు. చివరికి ప్రధాన మంత్రి మాట్లాడినపుడు కూడా మైక్‌ సమస్య సృష్టించడం జగన్‌ నీతిమాలిన తనానికి నిదర్శనం. ఎన్ని కుట్రలు చేసినా, ఎన్ని కుతంత్రాలకు పాల్పడి సభను అడ్డుకోవాలని ప్రయత్నించినా.. వారి తరం కాదు. ఎస్పీజీ, జెడ్‌ ప్లస్‌, జడ్‌, వై ప్లస్‌, వై క్లాస్‌ సెక్యూరిటీ కలిగిన ప్రముఖులు హాజరైన సభలో భద్రత ఏర్పాట్లు ఇలాగేనా చూసేది అని ప్రశ్నించారు.
