మంగళగిరి: దేశంలో ఎక్కడా లేనివిధంగా చెత్తపై పన్ను వేస్తున్న చెత్త ముఖ్యమంత్రి జగన్‌ రెడ్డి. చెత్త పన్ను పేరుతో ప్రజల్ని వేధించడం దుర్మార్గం. చెత్త పన్ను కట్టకపోతే సంక్షేమ కార్యక్రమాలు ఆపేస్తాం, నీటి కనెక్షన్‌ కట్‌ చేస్తామని బ్లాక్‌ మెయిల్‌ చెయ్యడం అన్యాయమని తెలుగుదేశం పార్టీ జాతీయ ప్రధాన కార్యదర్శి, యువనేత నారా లోకేష్ పేర్కొన్నారు. బాదుడే బాదుడు కార్యక్రమంలో భాగంగా తాడేపల్లి పట్టణం ప్రకాష్‌ నగర్‌ లో టిడిపి జాతీయ ప్రధాన కార్యదర్శి, యువనేత నారా లోకేష్ ఇంటింటికీ వెళ్లి సమస్యలు తెలుసుకున్నారు. ఇటీవల మరణించిన టిడిపి కార్యకర్తల ఇంటికి వెళ్ళి కుటుంబ సభ్యులను పరామర్శించారు. అనారోగ్యంతో బాధపడుతున్న కార్యకర్తలను పరామర్శించి త్వరగా కోలుకోవాలని ఆకాంక్షిస్తూ అండగా నిలుస్తామని భరోసా ఇచ్చారు. పన్నుల భారంతో సామాన్యులు బతకలేని పరిస్థితి తెచ్చారు. కుడి చేత్తో పది రూపాయిలు ఇచ్చి ఎడమ చేత్తో వంద రూపాయిలు కొట్టేస్తున్న దొంగ ప్రభుత్వం రాజ్యమేలుతోంది. నిత్యావసర సరుకుల ధరలు ఆకాశాన్ని అంటుతున్నాయి. ఇంటి పన్ను, చెత్త పన్ను, కరెంట్‌ ఛార్జీలు, ఆర్టీసి ఛార్జీలు విపరీతంగా పెంచి ప్రజల్ని దోచుకుంటున్నారని మండిపడ్డారు. అధికారంలోకి వస్తే మద్యపాన నిషేదం అన్న జగన్‌ రెడ్డి ఇప్పుడు మద్యాన్ని ఏరులై పారిస్తున్నారని అన్నారు. జే బ్రాండ్స్‌ తో జగన్‌ మహిళల మెడలో పుస్తెలు తెంపుతున్నారని దుయ్యబట్టారు. మంగళగిరి నియోజకవర్గంలో సమస్యలు గాలికొదిలి ఎమ్మెల్యే ఇళ్లు కూల్చే పనిలో బిజీగా ఉన్నారని లోకేష్ పేర్కొన్నారు.
సమస్యలను ఏకరువుపెట్టిన మహిళలు
లోకేష్ పర్యటన సందర్భంగా పలువురు మహిళలు తమ సమస్యలను ఏకరువు పెట్టారు. కార్పొరేషన్‌ వాటర్‌ అర్థరాత్రి పూట ఇస్తున్నారు.. ఆ సమయంలో నీళ్లు పట్టుకోవడానికి అనేక ఇబ్బందులు పడుతున్నామని ఆవేదన వ్యక్తం చేశారు. గెలిచిన వెంటనే కొండ ప్రాంతాల్లో నివసిస్తున్న వారికి ఇళ్ళ పట్టాలు ఇస్తామని చెప్పి ఎమ్మెల్యే ఆర్కే మోసం చేసారని ఆవేదన వ్యక్తంచేశారు. త్రాగునీరు, డ్రైనేజీ, రోడ్లు సమస్యల గురించి ఎన్ని సార్లు వేడుకున్నా అధికారులు స్పందించడం లేదని స్థానికులు వాపోయారు. ఈ సందర్భంగా లోకేష్ మాట్లాడుతూ… అర్థరాత్రి నీళ్లు ఇవ్వడం వలన మహిళలు అనేక ఇబ్బందులు పడుతున్నారు. పైగా కలుషితమైన నీరు వస్తుందని స్థానికులు చెబుతున్నారు. ఈ సమస్యను అధికారుల దృష్టికి తీసుకెళ్లి సమస్య పరిష్కారానికి కృషి చేస్తానని అన్నారు. మేము గెలిచిన ఏడాదిలోనే ఇళ్ళ పట్టాలు అందిస్తాం. త్రాగునీరు, డ్రైనేజీ, రోడ్ల సమస్య పరిష్కరిస్తామని తెలిపారు.
