- 2నుంచి 3 శాతానికి పెంచుతూ సర్కారు నిర్ణయం
- ఒలింపిక్‌, ఏషియన్‌ గేమ్స్‌ విజేతలకు భారీ నజరానాలు
- రూ.75 లక్షల నుంచి రూ.7 కోట్లకు పెంపు
- దేశంలోనే ఉత్తమ క్రీడా విధానానికి శ్రీకారం
- నాలుగు అంశాలతో క్రీడా కేంద్రంగా ఏపీ..
- ‘స్పోర్ట్స్‌ ఫర్‌ ఆల్‌’ను ఆమోదించిన సీఎం చంద్రబాబు
అమరావతి (చైతన్య రథం): రాష్ట్ర ప్రభుత్వం కొత్తగా తీసుకొస్తోన్న క్రీడా విధానంపై ముఖ్యమంత్రి చంద్రబాబు సోమవారం సచివాలయంలో సమీక్ష నిర్వహించారు. అన్ని రాష్ట్రాలకంటే మిన్నగా ఏపీ స్టోర్ట్స్‌ నూతన పాలసీ ఉంటుందన్నారు. అందరికీ క్రీడలు అనే విధానంతో తీసుకువచ్చిన పాలసీపై అధికారులతో సీఎం చర్చించారు. రాష్ట్రాన్ని క్రీడా కేంద్రంగా మార్చేందుకు నాలుగు మిషన్‌ ఆబ్జెక్ట్స్‌తో పాలసీని సిద్ధం చేశారు. స్పోర్ట్స్‌ ఫర్‌ ఆల్‌, నర్చర్‌ టాలెంట్‌, స్పోర్ట్స్‌ ఎకో సిస్టం, గ్లోబల్‌ విజిబిలిటీ అనే అంశాల ప్రాతిపదికగా పాలసీ రూపొందించారు. ఈ నాలుగు మిషన్‌ ఆబ్జెక్ట్స్‌లో అందరికీ ఆటలు, టాలెంట్‌ గుర్తింపు, ప్రపంచస్థాయి శిక్షణ, ప్రోత్సాహకాలు, క్రీడాకారులకు మద్దతు, ఉద్యోగ భద్రత, ప్రపంచస్థాయి సౌకర్యాలు, క్రీడా సంఘాలతో సమన్వయం, టెక్నాలజీ వాడకం, ప్రైవేటు రంగంతో కలిసి పనిచేయడం, జాతీయ, అంతర్జాతీయస్థాయి ఈవెంట్స్‌ నిర్వహణ, స్పోర్స్ట్‌ టూరిజంవంటి అంశాలకు ప్రాధాన్యతనిచ్చారు. ఇతర రాష్ట్రాల్లో ఉన్న పాలసీలకంటే మెరుగైన అంశాలను చేర్చారు. గ్రామస్థాయి నుంచీ క్రీడల ప్రోత్సాహకానికి అవసరమైన ప్రణాళికను పొందుపరిచారు. ఇందులో భాగంగా పలు ప్రతిపాదనలకు ముఖ్యమంత్రి ఆమోదం తెలిపారు. ఇప్పటి వరకు ఉద్యోగాల్లో ఉన్న క్రీడా కోటా రిజర్వేషన్‌ను 2 శాతంనుంచి 3 శాతానికి పెంచుతూ నిర్ణయం తీసుకున్నారు. యూనిఫాం సర్వీసెస్‌లో 3శాతం రిజర్వేషన్‌ ఇవ్వాలని పాలసీలో ప్రతిపాదించారు. శాప్‌లో గ్రేడ్‌ 3 కోచ్‌ల కోసం ఇంటర్నేషనల్‌ మెడల్స్‌ సాధించిన వారికి 50 శాతం రిజర్వేషన్‌ కల్పించనున్నారు. ఒలంపిక్స్‌, ఏషియన్‌ గేమ్స్‌, వరల్డ్‌ చాంపియన్స్‌, నేషనల్‌ గేమ్స్‌, ఖేలో ఇండియా గేమ్స్‌, నేషనల్‌ స్కూల్‌ గేమ్స్‌లో పతకాలు పొందినవారికి ఇచ్చే ప్రోత్సాహకాన్ని భారీగా పెంచుతూ నిర్ణయం తీసుకున్నారు. ఇప్పటి వరకు ఈ ప్రోత్సాహకాల్లో హర్యానా ముందుండగా.. ముఖ్యమంత్రి సూచనలతో కొత్త పాలసీలో అన్ని రాష్ట్రాలకంటే ఎక్కువ ప్రోత్సాహలు ప్రతిపాదించారు.
పతకాలు సాధించే క్రీడాకారులకు భారీ ప్రోత్సాహకాలు
పతకాలు సాధించే వారికి మంచి ప్రోత్సాహకాలు అందిస్తే క్రీడలపట్ల అందరికీ ఆసక్తి పెరుగుతుందని సీఎం అభిప్రాయపడ్డారు. ఆటలు ఆడేవాళ్లకు గుర్తింపు, గౌరవం ఇవ్వాలని సీఎం అన్నారు. ఒలంపిక్స్‌లో బంగారు పతకం సాధించిన వారికి ఇప్పటి వరకు రూ.75 లక్షలు ఇస్తుండగా… దీన్ని ఇకపై రూ.7 కోట్లు ఇవ్వాలని నిర్ణయించారు. అలాగే రజత పతకం సాధించిన వారికి రూ.50 లక్షలు ఇస్తుండగా….. ఇకపై రూ.5 కోట్లు, కాంస్య పతకం సాధించిన వారికి ఇప్పటి వరకు రూ.30 లక్షలు ఇస్తుండగా ఇకపై రూ.3 కోట్లు ఇవ్వాలని ముఖ్యమంత్రి సూచించారు. అలాగే ఒలంపిక్స్‌లో పాల్గొన్న వారికి రూ.50 లక్షల చొప్పున ప్రోత్సాహకం ఇవ్వాలని సీఎం సూచించారు. అదేవిధంగా ఏషియన్‌ గేమ్స్‌లో బంగారు పతకం సాధించిన వారికి రూ.4 కోట్లు, రజత పతకం సాధించిన వారికి రూ.2 కోట్లు, కాంస్య పతకం సాధించిన వారికి రూ.1 కోటి చొప్పున ప్రోత్సాహకం ఇవ్వాలని అభిప్రాయపడ్డారు. ఏషియన్స్‌ గేమ్స్‌లో పాల్గొన్న వారికి రూ.10 లక్షలు ఇవ్వాలని సూచించారు. వరల్డ్‌ ఛాంపియన్‌షిప్‌, వరల్డ్‌ కప్‌ పోటీల్లో బంగారు పతకం సాధించిన వారికి రూ.50 లక్షలు, రజతం సాధించిన వారికి రూ.35 లక్షలు, కాంస్యం సాధించిన వారికి రూ.25 లక్షలు ఇవ్వనున్నారు. నేషనల్‌ గేమ్స్‌లో బంగారు పథకం సాధించిన వారికి రూ.10 లక్షలు, రజతం సాధించిన వారికి రూ.5 లక్షలు, కాంస్య పథకం సాధించిన వారికి రూ.3 లక్షల ప్రోత్సాహం ఇవ్వాలని ప్రతిపాదనలు చేశారు.
ఖేలో ఇండియా గేమ్స్‌, నేషనల్‌ స్కూల్‌ గేమ్స్‌లో బంగారు పతకం సాధించిన వారికి రూ.2.50 లక్షలు, రజత పతకం సాధించిన వారికి రూ.2 లక్షలు, కాంస్యం సాధించిన వారికి రూ.లక్ష చొప్పున ప్రోత్సాహం ఇవ్వాలని ముఖ్యమంత్రి అధికారులకు సూచించారు. ఒలింపిక్‌, ఏషియన్‌ గేమ్స్‌లో పతకాలు సాధించిన వారికి గ్రూప్‌-1 ఉద్యోగులుగా నియమిస్తామని తెలిపారు. అదేవిధంగా స్పోర్ట్స్‌ సిటీగా అమరావతిని రూపొందించడంతో పాటు తిరుపతి, వైజాగ్‌, అమరావతిలో ఇంటిగ్రేటెడ్‌ స్పోర్ట్స్‌ కాంప్లెక్స్‌లు ఏర్పాటు చేయాలన్నారు. కడప, విజయవాడ, విజయనగరం క్రీడా పాఠశాలలు ఏర్పాటు చేయాలన్నారు. ఇందులో విజయనగరం క్రీడా పాఠశాల గిరిజనుల కోసం ప్రత్యేకంగా ఏర్పాటు చేయాలన్నారు. మండల, నియోజకవర్గ స్థాయిలో క్రీడా వికాస కేంద్రాలు, గ్రామ పంచాయతీల్లో క్రీడా మైదానాలు ఏర్పాటు చేయాలన్నారు. గ్రామాల్లో సాంప్రదాయ క్రీడలను ప్రోత్సహించాలన్నారు. ప్రస్తుతం దేశంలో అత్యంత పాపులర్‌ అయిన స్పోర్ట్స్‌ లీగ్స్‌లో ఏపీనుండి జట్లు ప్రాతినిధ్యం వహించేలా చూడాలన్నారు.
ఏపీకి వరంగా సముద్ర తీరం, కొండలు, అడవులు ఉన్నాయని… మౌంటెయిన్‌ బైకింగ్‌, వాటర్‌ స్ప్రోర్ట్‌, నేచర్‌ ఫోటోగ్రఫీ, ట్రెక్కింగ్‌వంటి వాటిని ఏర్పాటు చేయాలన్నారు. ఆటలు అంటే క్రికెట్‌ ఒక్కటే కాదని… అన్ని ఆటలను ప్రోత్సహించాలని సీఎం సూచించారు. ఆటలను తమ గోల్‌గా ఎంచుకునేవారికి ఉద్యోగ భద్రత కల్పిస్తే మంచి ఫలితాలు వస్తాయని… ఎక్కువమంది ఆవైపు ప్రయాణం చేస్తారని సీఎం అన్నారు. ఉమ్మడి రాష్ట్రంలో తీసుకువచ్చిన విధానాలతో అనేకమంది క్రీడాకారులు తయారయ్యారని… వారు ఒలింపిక్స్‌లో సత్తా చాటారని సీఎం గుర్తు చేశారు. పీపీపీ విధానంతోపాటు…. స్వచ్చంధంగా ఆసక్తి చూపే వ్యక్తులు, సంస్థల ద్వారా మౌలిక సదుపాయాల కల్పనకు కృషి చేయాలన్నారు. ఈ సూచనల ప్రకారం మార్పులు చేసి కేబినెట్‌లో నూతన పాలసీ తీసుకురావాలని సీఎం అధికారులను ఆదేశించారు. సమీక్షలో మంత్రి మండిపల్లి రాంప్రసాద్‌ రెడ్డి, శాప్‌ ఛైర్మన్‌ అనిమిని రవినాయుడు, అధికారులు, తదితరులు పాల్గొన్నారు.
