- అంకుడు, తెల్లపొణికి చెట్లు విస్తారంగా పెంపు
- ఉపాధి హామీ పథకంలో పెంచేందుకు ఏర్పాట్లు
అమరావతి (చైతన్యరథం): ఆంధ్రప్రదేశ్ హస్త కళల విశిష్టతను తెలిపే ఏటికొప్పాక, కొండపల్లి బొమ్మలు రూపొందించే కళాకారులకు ఉప ముఖమంత్రి పవన్‌ కళ్యాణ్‌ శుభవార్త అందించారు. ఏటికొప్పాక బొమ్మల తయారీకి ముడి సరుకుగా ఉపయోగపడే అంకుడు కర్ర, కొండపల్లి బొమ్మలకు అవసరమయ్యే తెల్ల పొణికి చెట్లను విస్తారంగా పెంచాలని అధికారులను పవన్‌ కళ్యాణ్‌ ఆదేశించారు. ప్రస్తుతం ఏటికొప్పాక, కొండపల్లి బొమ్మల తయారీదారులకు వారికి అవసరమయ్యే కర్ర లభ్యత కష్టంగా మారింది. ఆ చెట్ల సంఖ్య క్రమంగా తగ్గుతోంది. ఈ సమస్యను ఏటికొప్పాక, కొండపల్లి బొమ్మల కళాకారులు పవన్‌ కళ్యాణ్‌ దృష్టికి తీసుకువచ్చారు.
దీనిపై స్పందించిన ఉప ముఖ్యమంత్రి.. పంచాయతీరాజ్‌, గ్రామీణాభివృద్ధి శాఖల అధికారులకు దిశానిర్దేశం చేశారు. ఆ కళాకారులకు అందుబాటులో ఉండేలా అంకుడు, తెల్ల పొణికి చెట్లు పెంచడానికి తగిన ప్రణాళికలు సిద్ధం చేయాలని స్పష్టం చేశారు. ఉపాధి హామీ పథకం పనుల్లో భాగంగా అంకుడు, తెల్ల పొణికి చెట్లు పెంచాలన్నారు. అటవీ ప్రాంతాల్లోనూ… ఏటికొప్పాక, కొండపల్లి పరిసరాల్లో ఉన్న ప్రభుత్వ, అటవీ, సామాజిక స్థలాల్లో వీటి పెంపకంపై దృష్టి సారించాలన్నారు.
ఉప ముఖ్యమంత్రి ఆదేశాలకు అనుగుణంగా అంకుడు, తెల్ల పొణికి చెట్లు పెంపకానికి రంగం సిద్ధమైంది. భవిష్యత్తు అవసరాలను పరిగణనలోకి తీసుకొని కనీసం రెండు మూడు తరాలకు సరిపడా చెట్లను పెంచేలా పంచాయతీరాజ్‌, గ్రామీణాభివృద్ధి కమిషనర్‌ కృష్ణ తేజ ఆదేశాలు విడుదల చేశారు. ఆంధ్రప్రదేశ్ హస్త కళలను ప్రోత్సహించే దిశగా ఉప ముఖ్యమంత్రి పవన్‌ కళ్యాణ్‌ పలు చర్యలు తీసుకొంటున్నారు. రాష్ట్ర అతిథులను గౌరవపూర్వకంగా సత్కరించే సందర్భంలో అందించే బహుమతులుగా ఆంధ్రప్రదేశ్ కళాకారులు తీర్చిదిద్దిన కళాకృతులను ఎంపిక చేసి వాటినే ఇస్తున్నారు.
