ఐదేళ్లలో పేదరిక నిర్మూలన లక్ష్యం

• సంపన్నులు-పేదల మధ్య వారధి
• సమాజానికి తిరిగి ఇచ్చే సమయం
• రాష్ట్రంలో 20 లక్షల బంగారు కుటుంబాలకు కొత్త ఆశ

అమరావతి (చైతన్యరథం): ఆంధ్రప్రదేశ్‌ ప్రభుత్వం ఉగాది పర్వదినం రోజున.. జీరో పావర్టీ-పీ 4.. కార్యక్రమాన్ని ప్రారంభించింది. ఆంధ్రప్రదేశ్‌ రాష్ట్రాన్ని 2.4 ట్రిలియన్ల డాలర్ల ఆర్థిక వ్యవస్థగా మార్చాలనే దార్శనికతతో స్వర్ణాంధ్ర`2047 విజన్‌ డాక్యుమెంట్‌ను రాష్ట్ర ప్రభుత్వం రూపొందించింది. ఇది పదిసూత్రాలు లేదా 10 మార్గదర్శక సూత్రాల ద్వారా సాధ్యపడుతుంది. వాటిలో ముఖ్యమైనది రాబోయే 5 సంవత్సరాలలో జీరో పావర్టీని సాధించడం. బలహీన వర్గాల జనాభాకు మద్దతు ఇవ్వడానికి ప్రభుత్వం బలమైన సంక్షేమ కార్యక్రమాలను ఏర్పాటు చేసింది. అయితే, జీరో పావర్టీని సాధించడానికి సమాజం నుండి అంకితభావంతో కూడిన కృషి కూడా అవసరం.

గత కొన్ని దశాబ్దాలుగా ఆంధ్రప్రదేశ్‌లో తలసరి జీడీపీలో స్థిరమైన పెరుగుదల ప్రైవేట్‌ సంపదను సృష్టించింది, కొన్ని కుటుంబాలు అవకాశాలను అందిపుచ్చుకుని విజయాన్ని సాధించడానికి వీలు కల్పించింది. విజయం సాధించిన వారు సామాజిక మద్దతుగా సమాజానికి తిరిగి ఇవ్వడానికి బలమైన సంకల్పం కలిగి ఉన్నప్పటికీ వెనుకబడిన వర్గాల వారికి తోడ్పాటు ఇవ్వడానికి నిర్మాణాత్మక మార్గాలు లేవు. ఈ దాన స్ఫూర్తిని ఉపయోగించుకోవడానికి, ప్రభుత్వం జీరో పావర్టీ-పీ 4 (ప్రజా ప్రైవేట్‌ వ్యక్తుల భాగస్వామ్యం)ను ప్రవేశపెడుతోంది, ఇది రాబోయే 5 సంవత్సరాలలో పేదరికాన్ని నిర్మూలించే లక్ష్యంలో ప్రజలను కీలక భాగస్వాములుగా చేస్తుంది.

జీరో పావర్టీ-పీ 4 కింద, ఆర్థికంగా సంపన్న కుటుంబాలు (మార్గదర్శి).. నిస్సహాయ (బంగారు కుటుంబం) కుటుంబాలను దత్తత తీసుకోవచ్చు. దత్తత తీసుకోవడం వల్ల వారి మధ్య దీర్ఘకాలిక, లోతైన ఒడంబడిక ఏర్పడుతుంది. బంగారు కుటుంబానికి సాధికారత కల్పించడానికి మార్గదర్శి కుటుంబం.. మార్గదర్శకత్వం, ఆర్థిక సహాయం అందిస్తుంది.

జీరో పావర్టీ- పీ 4 ప్లాట్‌ఫామ్‌…
ఉగాది పర్వ దినాన్ని పురస్కరించుకుని ప్రారంభిస్తున్న జీరో పావర్టీ-పీ 4 ప్లాట్‌ఫామ్‌, రాష్ట్రంలోని మార్గదర్శి కుటుంబాలు… 20 లక్షలకు పైగా బంగారు కుటుంబాలను ఎంచుకోవడానికి, దత్తత తీసుకోవడానికి వీలు కల్పించే డిజిటల్‌ ప్లాట్‌ఫామ్‌. ప్లాట్‌ఫామ్‌ లింక్‌:https://zeropovertyp4.ap.gov.in/
మార్గదర్శి కుటుంబాలు వారి భౌగోళిక స్థానం లేదా కుటుంబ కూర్పు వంటి ఇతర జనాభా సమాచారం ఆధారంగా కుటుంబాలను గుర్తించవచ్చు. షార్ట్‌లిస్ట్‌ చేసుకోవచ్చు. ఈ ప్లాట్‌ఫామ్‌ ద్వారా, కుటుంబాలు తమను తాము బంగారు కుటుంబం అని కూడా నమోదు చేసుకోగలుగుతారు. దీని ద్వారా ఆశావహ కుటుంబాలు మద్దతు పొందేందుకు వీలు కల్పిస్తుంది. ఈ ప్లాట్‌ఫామ్‌ ‘భాషిణి’ భాషా సేవలను ఉపయోగించుకుంటోంది. భారత ప్రభుత్వ ఎలక్ట్రానిక్స్‌, ఐటీ మంత్రిత్వ శాఖ భాషా అనువాదాల కోసం రూపొందించినది.

రాష్ట్ర ముఖ్యమంత్రి పిలుపు…
అన్ని సంపన్న కుటుంబాలు ఈ జీరో పావర్టీ- పీ 4 ప్లాట్‌ఫామ్‌లోకి లాగిన్‌ అయి కనీసం 1 బంగారు కుటుంబాన్ని దత్తత తీసుకుని మార్గదర్శి కుటుంబంగా మారాలని రాష్ట్ర ముఖ్యమంత్రి చంద్రబాబు నాయుడు పిలుపు ఇచ్చారు. అన్ని సంపన్న కుటుంబాలు తమ నెట్‌వర్క్‌లోని కనీసం 5 ఇతర కుటుంబాలను ఈ వేదిక ద్వారా దత్తత తీసుకునేందుకు ముందుకు రావాలని ఆయన కోరారు.