- కొత్త మెడికల్ కాలేజీలకు వీజీఎఫ్‌పై సానుకూల స్పందన
- ఢిల్లీలో నీతి ఆయోగ్‌ సభ్యుడితో వైద్యమంత్రి చర్చలు
- పాల్‌ను రాష్ట్రానికి ఆహ్వానించిన మంత్రి సత్యకుమార్‌
- కాశినాయన క్షేత్ర అభివృద్ధికి అవరోధాలు తొలగిస్తా
- కేంద్ర అటవీ మంత్రి భూపేంద్ర యాదవ్‌ హామీ
అమరావతి (చైతన్య రథం): రాష్ట్రంలో రెండు, మూడు దశల్లో నిర్మించనున్న ప్రభుత్వ వైద్య కళాశాలలకు వయబిలిటీ గ్యాప్‌ ఫండిరగ్‌ను అవసరాల మేరకు అందించడానికి నీతి అయోగ్‌ సానుకూలంగా స్పందించింది. రాష్ట్ర వైద్య ఆరోగ్య మంత్రి సత్యకుమార్‌ యాదవ్‌ బుధవారం ఢిల్లీలో నీతి అయోగ్‌ సభ్యులు డాక్టర్‌ కె వినోద్‌పాల్‌తో చర్చించినపుడు.. ఆయన సానుకూలంగా స్పందించారు. ఈ విషయంలో రాష్ట్ర ప్రభుత్వం నుంచి వచ్చే ప్రతిపాదనలను సానుకూలంగా పరిశీలిస్తామని పాల్‌ హామీ ఇచ్చారు. రాష్ట్రంలోని జిల్లా ఆసుపత్రులను మరింత పటిష్టం చేయడానికి మంత్రి సాయం కోరగా, నీతి అయోగ్‌ సభ్యుడు సానుకూలమైన హామీ ఇచ్చారు.
రాష్ట్రంలో రెండు, మూడు దశల్లో 12 కొత్త వైద్య విద్యా కళాశాలలు నిర్మించాల్సి ఉండగా, అందులో పాడేరు, పిడుగురాళ్ల కళాశాలల నిర్మాణం కేంద్రం సాయంతో జరుగుతోంది. కొత్త వైద్య కళాశాలలకు ఒక్కోదానికి రూ.500 కోట్ల ఖర్చవుతుంది. నిర్మాణ ఖర్చుతోపాటు ఒక్కో కళాశాల నిర్వహణకు ఏడాదికి దాదాపు రూ.200 కోట్ల అవసరమని అంచనా.
మొత్తం 17 కొత్త వైద్య కళాశాలల ఏర్పాటును 2021లో ఎంతో ఆర్భాటంగా ప్రకటించిన వైసీపీ ప్రభుత్వం.. వాటి నిర్మాణంలో నిర్లక్ష్యం ప్రదర్శించింది. రాష్ట్రవాటాగా ఇవ్వాల్సిన నిధులను విడుదల చేయకపోవడమే కాదు, కేంద్రంతోపాటు నాబార్డు నిధులనూ దారిమళ్లించడంతో.. కళాశాలల నిర్మాణం అగమ్యగోచరమైంది. ఈ నేపథ్యంలో ప్రత్యామ్నాయ మార్గాల ద్వారా కొత్త కళాశాలల నిర్మాణం చేపట్టాలని రాష్ట్రంలోని కూటమి ప్రభుత్వం యోచిస్తోంది. జిల్లాస్థాయిలో కళాశాలల నిర్మాణాన్ని చేపట్టాల్సి ఉన్నందున.. కేంద్రం నుంచి వయబిలిటీ గ్యాప్‌ ఫండిరగ్‌ కోసం మంత్రి సత్యకుమార్‌ యాదవ్‌ నీతి అయోగ్‌తో చర్చించారు.
దీంతోపాటు రాష్ట్రంలోని జిల్లా ఆసుపత్రులలో క్రిటికల్‌ కేర్‌ బ్లాకుల్ని అభివృద్ధి చేయడానికి అవసరమయ్యే సాయంపైనా మంత్రి చర్చించారు. ప్రమాదాలు, ట్రామా కేర్‌ కేసులు ఎక్కువవుతున్నందున ఈ సేవల్ని పటిష్టపర్చాల్సి ఉందని మంత్రి వివరించారు. రాష్ట్రంలో 15 యాస్పిరేషనల్‌ బ్లాకుల్లో వివిధ రంగాల అభివృద్ధికి కేంద్రం సాయం అందిస్తుంది. ఇందులోభాగంగా ఆయా బ్లాకుల్లో వైద్య సేవల అభివృద్ధికి కేంద్రం సాయంపైనా మంత్రి చర్చించారు. అవిభక్త అనంతపురం జిల్లాలో స్థానిక పరిస్థితుల దృష్ట్యా మరికొన్ని అదనపు బ్లాకులను యాస్పిరేషన్‌ బ్లాకులుగా గుర్తించాలని మంత్రి నీతిఅయోగ్‌ను కోరారు. గంటపాటుసాగిన చర్చల సందర్భంలో.. మంత్రి సత్యకుమార్‌ నీతిఅయోగ్‌ సభ్యుడు వినోద్‌పాల్‌ను రాష్ట్ర పర్యటనకు ఆహ్వానించగా, అందుకు ఆయన అంగీకరించారు.
జాతీయ జల్‌ జీవన్‌ మిషన్‌ అమలును అవిభక్త అనంతపురం జిల్లాలోని సాగునీటి పారుదల పథకాల అమలుతో అనుసంధానం చేసి సాగునీటి సమస్య పరిష్కారినికి దోహదం చేయాలని మంత్రి కోరగా, ఈ విషయాన్ని సంబంధిత అధికారులతో చర్చిస్తామని నీతి అయోగ్‌ సభ్యలు హామీ ఇచ్చారు.
రాయలసీమ ప్రాంతంలో ప్రాచుర్యం పొందిన కాశీనాయన ఆశ్రమం మరియు లక్ష్మీ నరసింహస్వామి దేవాలయ అభివృద్ధికి అటవీ శాఖాపరంగా ఎదురవుతున్న సమస్యల్ని మంత్రి సత్యకుమార్‌ యాదవ్‌ కేంద్ర అటవీ మరియు పర్యావరణ మంత్రి భూపేంద్ర యాదవ్‌తో చర్చించి సమస్యలను పరిష్కరించాల్సిందిగా కోరారు. అటవీ పరిరక్షణ అవసరాల్ని దృష్టిలో పెట్టుకుని ఈ క్షేత్ర నిర్వాహకులు అటవీభూమి అవసరాలను మొదట ఆశించిన దానికంటే భారీగా తగ్గించి దాదాపు 6 హెక్టార్ల అటవీ భూమి అవసరమవుతుందని ప్రతిపాదనల్ని పంపారని మంత్రి సత్యకుమార్‌ యాదవ్‌ వివరించారు. దీనిని స్వాగతిస్తూ స్థానిక పర్యావరణ పరిస్థితులకు ఎటువంటి ఆటంకం కలగకుండా మధ్యేమార్గంగా పరిష్కారాన్ని కనుగొనగడానికి తమ శాఖ దోహదపడుతుందని కేంద్ర మంత్రి హామీ ఇచ్చారు.
తాను ప్రాతినిధ్యం వహిస్తున్న ధర్మవరం అసెంబ్లీ సెగ్మెంట్‌లో మైనారిటీ ముస్లింల అభివృద్ధికి సాయం అందించాలని మంత్రి సత్యకుమార్‌ యాదవ్‌ కేంద్ర మైనారిటీల సంక్షేమ మంత్రి జార్జ్‌ కురియన్‌ను బుధవారం కోరారు.
ముస్లిం మైనారిటీల ప్రయోజనం కోసం సద్భావనా భవన్‌లు, ప్రాథమిక ఆరోగ్య కేంద్రాల నిర్మాణం, పశుపాలన, మత్స్యకారులకు కేంద్రం సాయం అందిస్తుంది. ఆయా విషయాలకు సంబంధించి ధర్మవరంతోపాటు ఇతర సమీప ప్రాంతాల మైనారిటీల ప్రయోజనం కోసం తగు కేంద్ర సాయాన్ని అందించాలని మంత్రి కేంద్రాన్ని కోరారు. ఈ విషయంలో రాష్ట్ర ప్రభుత్వ ప్రతిపాదలను పరిశీలించి తగు సాయాన్ని అందించాలని కేంద్ర మంత్రి హామీ ఇచ్చారు. క్షేత్రస్థాయి పరిశీలకు రాష్ట్రానికి రావాల్సిందిగా మంత్రి సత్యకుమార్‌ యాదవ్‌ కోరగా, కేంద్రమంత్రి అంగీకరించారు.
