- రేపటి నుంచి అసెంబ్లీ బడ్జెట్‌ సమావేశాలు
- తొలిరోజు గవర్నర్‌ ప్రసంగం, బీఏసీ సమావేశం
- 25న గవర్నర్‌ ప్రసంగానికి ధన్యవాదాల తీర్మానంపై చర్చ
- 28న బడ్జెట్‌ ప్రవేశపెట్టే అవకాశం
- సమావేశాలకు కట్టుదిట్టమైన ఏర్పాట్లు
అమరావతి (చైతన్యరథం): ఏపీ అసెంబ్లీ బడ్జెట్‌ సమావేశాలు ఈ నెల 24 (సోమవారం) నుంచి ప్రారంభం కానున్నాయి. సోమవారం ఉదయం 10 గంటలకు గవర్నర్‌ ప్రసంగంతో ఉభయసభలు ప్రారంభమవుతాయి. మధ్యాహ్నం 12 గంటలు బీఏసీ సమావేశం జరుగుతుంది. సభ ఎన్ని రోజులు సమావేశం కావాలి, ఏఏ బిల్లులు ప్రవేశపెడతారనే అంశంపై బీఏసీలో చర్చించి నిర్ణయం తీసుకుంటారు. ఈనెల 25న గవర్నర్‌ ప్రసంగానికి ధన్యవాదాలు తెలిపే తీర్మానంపై చర్చ జరుగుతుంది. ఈనెల 28న సభలో బడ్జెట్‌ ప్రవేశపెట్టే అవకాశం ఉంది.
కట్టుదిట్టమైన ఏర్పాట్లు
అసెంబ్లీ బడ్జెట్‌ సమావేశాల నిర్వహణకు కట్టుదిట్టమైన ఏర్పాట్లు చేస్తున్నారు. అసెంబ్లీ ప్రాంగణంలో రాకపోకలు, ప్రవేశాలపై నిబంధనలు కట్టుదిట్టంగా అమలు చేయాలని ప్రభుత్వం నిర్ణయించింది. మంత్రులు, ఎమ్మెల్యేలు, ఎమ్మెల్సీలకు ప్రత్యేక పాస్‌లు జారీ చేస్తారు. మీడియా, విజిటర్లు, పోలీసు సిబ్బందికి మరో రకమైన ప్రత్యేక పాస్‌లు జారీ చేస్తారు. భద్రతా కారణాల రీత్యా పాస్‌లు ఉన్నవారినే అసెంబ్లీ ప్రాంగణంలోకి అనుమతిస్తారు. అసెంబ్లీ, మండలిలో వేర్వేరు ప్రాంతాలకు వెళ్లేలా వివిధ కలర్‌ కోడ్‌లతో పాస్‌ లు జారీ చేస్తారు. అసెంబ్లీ ఒకటో గేట్‌ నుంచి మండలి ఛైైర్మన్‌, స్పీకర్‌, డిప్యూటీ స్పీకర్‌, సీఎం, డిప్యూటీ సీఎంలకు మాత్రమే అనుమతి ఉంటుంది. అసెంబ్లీ గేట్‌ 2 నుంచి మంత్రులను మాత్రమే అనుమతిస్తారు.
అసెంబ్లీ గేట్‌ 4 నుంచి ఎమ్మెల్యేలు, ఎమ్మెల్సీలకు మాత్రమే అనుమతి ఉంటుంది. మండలి ఛైర్మన్‌, స్పీకర్‌, సీఎం వచ్చి వెళ్లే కారిడార్‌లో ఇతరులకు అనుమతి లేదని స్పష్టం చేసింది. నాలుగో గేట్‌ గన్‌ పాయింట్‌ మినహా భద్రతా సిబ్బందిని అనుమతించేది లేదని వెల్లడిరచింది. మంత్రులు, సభ్యుల పీఏలను అవసరం మేరకు మాత్రమే అనుమతిస్తారు. శాసనసభా వ్యవహారాలతో సంబంధం లేని ప్రభుత్వ సిబ్బందికి అనుమతి లేదని స్పష్టం చేసింది. శాసనసభ, మండలిలోకి సభ్యులు ఎవరూ ఆయుధాలతో రాకూడదని ప్రభుత్వం స్పష్టం చేసింది. ఒకవేళ వచ్చినా ఆయుధాలను ప్రాంగణంలో ఉన్న బెల్‌ ఆఫ్‌ ఆర్మ్‌ లో డిపాజిట్‌ చేయాలని సూచించింది.
