- జగన్‌రెడ్డి తరిమేసిన పరిశ్రమలను మళ్లీ తీసుకువస్తాం
- అభివృద్ధి వికేంద్రీకరణకు కట్టుబడి ఉన్నాం
- ఫేక్‌ ప్రచారంపై కఠిన చర్యలు
- జగన్ ప్రజల్లోకి వెళ్తానంటే మేం అడ్డుకోం
- కొలనుకొండలో సింహా కియా షోరూమ్‌ను ప్రారంభించిన మంత్రి లోకేష్‌
మంగళగిరి(చైతన్యరథం): రాష్ట్రానికి టీసీఎస్‌ సంస్థను తానే తీసుకువచ్చానంటున్న జగన్ రెడ్డికి.. బహుశా ఆయన ఆత్మ ఆ విషయం చెప్పిందేమో అని విద్య, ఐటీ శాఖల మంత్రి నారా లోకేష్‌ ఎద్దేవా చేశారు. మంగళగిరి సమీపంలోని కొలనుకొండలో సింహా కియా కార్ల షోరూమ్‌ను శుక్రవారం మంత్రి లోకేష్‌ జ్యోతి ప్రజ్వలన చేసి ప్రారంభించారు. ఈ సందర్భంగా ఏర్పాటు చేసిన విలేకరుల సమావేశంలో మంత్రి మాట్లాడుతూ.. గతంలో కూడా చంద్రబాబునాయుడు కియా మోటార్స్‌ను ఏపీకి తీసుకువస్తే వైఎస్‌ రాజశేఖర్‌ రెడ్డి లేఖ రాయటం వల్లనే ఆ కంపెనీ వచ్చిందన్నట్లుగా వైసీపీ నేతలు మాట్లాడారని గుర్తుచేశారు. ఇప్పుడు ఎంతో శ్రమించి టీసీఎస్‌ సంస్థను విశాఖ తీసుకువస్తుంటే.., తానే తీసుకువచ్చినట్లు జగన్ చెప్పుకుంటున్నారు. ఆత్మలతో మాట్లాడే అలవాటున్న జగన్‌కు.. ఆయనే టీసీఎస్‌ను తీసుకువచ్చాడని బహుశా ఆయన ఆత్మ చెప్పినట్లుందని మంత్రి లోకేష్‌ ఎద్దేవా చేశారు. జగన్ రెడ్డి పాలనలో ఎన్ని కంపెనీలు తీసుకువచ్చారు, ఎన్ని ఉద్యోగాలు కల్పించారో బహిర్గతం చేయాలి. టీడీపీ ప్రభుత్వం 2014-19 మధ్య 44వేల పరిశ్రమల ఏర్పాటుతో పాటు 8 లక్షల ఉద్యోగాలు కల్పించినట్లు స్వయంగా వైసీపీ ప్రభుత్వమే శాసనమండలిలో ఒప్పుకుంది. నేడు చంద్రబాబు వచ్చిన తర్వాతనే ఏపీలో పెద్దఎత్తున పెట్టుబడులు వస్తున్నాయి. ఇందులో భాగంగానే టీసీఎస్‌, లులు వచ్చాయి. ఇంకా అనేక పరిశ్రమలు పెట్టుబడులు పెట్టేందుకు సిద్ధంగా ఉన్నాయి. గతంలో జగన్ రెడ్డి తరిమివేసిన పరిశ్రమలన్నీ తీసుకువస్తామని మంత్రి లోకేష్‌ ఉద్ఘాటించారు.
అభివృద్ధి వికేంద్రీకరణకు కట్టుబడి ఉన్నాం
రాయలసీమకు.. మ్యానుఫ్యాక్చరింగ్‌ యూనిట్లు, ఉత్తరాంధ్రకు.. సేవారంగ సంస్థలు తీసుకువస్తాం. కర్నూలుకు.. విండ్‌, సోలార్‌, పంప్డ్‌ స్టోరేజ్‌ ప్రాజెక్టులు, సిమెంట్‌ ఫ్యాక్టరీలు, కడప, చిత్తూరుకు.. ఎలక్ట్రానిక్‌ మ్యానుఫ్యాక్చరింగ్‌ కంపెనీలు, అనంతపురానికి.. ఆటోమొబైల్స్‌ పరిశ్రమలు, ఉభయగోదావరికి.. ఆక్వా, పెట్రో కెమికల్‌ పరిశ్రమలు తీసుకువస్తాం. కృష్ణా, గుంటూరులో అనేక పెట్టుబడులు తీసుకువస్తాం. పరిపాలన కేంద్రీకరణతో పాటు అభివృద్ధి వికేంద్రీకరణకు మేం కట్టుబడి ఉన్నామని మంత్రి లోకేష్‌ స్పష్టం చేశారు.
బుక్‌ల విషయంలో నన్ను చూసి ఇన్‌స్పైర్‌ అయినట్లుంది
బ్లూ బుక్, గుడ్‌ బుక్ అంటున్న వైసీపీ .. నన్ను చూసి ఇన్‌స్పైర్‌ అయినట్లు ఉంది. పాదయాత్రలో వంద బహిరంగ సభల్లో మాట్లాడాను. రెడ్‌బుక్‌ చూపించి.. చట్టాన్ని ఉల్లంఘించి, ప్రజలను ఇబ్బంది పెట్టిన అధికారులు, వైసీపీ నాయకులపై చట్టబద్ధంగా చర్యలు తీసుకుంటామని చెప్పాం. ఇప్పటికే యాక్షన్‌ మొదలైంది. వైసీపీ వేరే పుస్తకాలు పెడితే పెట్టుకోనివ్వండి.. మాకేం భయం లేదని మంత్రి లోకేష్‌ అన్నారు.
ఫేక్‌ న్యూస్‌ ప్రచారంపై కఠిన చర్యలు
వరదసాయంపై వైసీపీ దుష్ప్రచారం చేస్తోంది. దాదాపు 10 రోజులకు పైగా చంద్రబాబునాయుడు, మంత్రివర్గం మొత్తం విజయవాడలో ముంపు ప్రాంతాల్లోనే తిరుగుతూ సహాయ చర్యలను పర్యవేక్షించారు. ఆనాడు వైకాపా ఎక్కడుంది? వరద బాధితులను ఆదుకునేందుకు కోటి రూపాయల సాయం ప్రకటించిన జగన్ రెడ్డి.. ఎక్కడ ఖర్చుపెట్టారో చెప్పాలి. మేం వాస్తవాలన్నీ ప్రజల ముందు పెట్టాం. రీహాబిలిటేషన్‌ యుద్ధప్రాతిపదికన చేపట్టాం. సుమారు రూ.650 కోట్లు ఖర్చుపెట్టాం. ఏవైనా లోటుపాట్లు ఉంటే, సాయం అందకపోతే వివరాలు ఇవ్వాలి. దీనిపై చర్యలు తీసుకుంటాం. తప్పులు సరిదిద్దుకునేందుకు ప్రభుత్వం సిద్ధంగా ఉంది. వైసీపీ మాదిరిగా మేం పరదాలు కట్టుకుని తిరగడం లేదు. వరదలు వస్తే జగన్ కనీసం తాడేపల్లి ప్యాలెస్‌ గేటు కూడా దాటలేదు. వాస్తవాలు ఇప్పుడైనా తెలుసుకోవాలి. ఫేక్‌ న్యూస్‌ ప్రచారం చేస్తే కఠిన చర్యలు తీసుకుంటాం. ప్రజలకు వాస్తవాలు తెలుసు. మేం న్యాయబద్ధంగా వెళ్తామని మంత్రి లోకేష్‌ చెప్పారు.
జగన్ ప్రజల్లోకి వెళ్తానంటే మేం అడ్డుకోం
జగన్ ప్రజల్లోకి వెళ్తానంటే వెళ్లనివ్వండి. ఆయన మాదిరిగా మేం గేట్లకు తాళ్లు కట్టబోం. గతంలో చంద్రబాబు ధర్నా చేయాలంటే అనుమతులు కూడా ఇవ్వలేదు. రాజ్యాంగబద్ధంగా ఎవరైనా ప్రజల్లోకి వెళ్లవచ్చు. శాంతిభద్రతలకు విఘాతం కలిగిస్తే కఠిన చర్యలు తీసుకుంటాం.
గుంటూరులో ఈఎస్‌ఐ ఆసుపత్రి నిర్మాణం త్వరలోనే చేపడతాం. అన్నీ పద్ధతి ప్రకారం చేస్తాం. మంగళగిరిలో ఎయిమ్స్‌కు నీటి సరఫరాతో పాటు వంద పడకల ఆసుపత్రి నిర్మాణం త్వరలోనే చేపడతాం. మూడు నెలల్లో మంగళగిరిలో భూగర్భ డ్రైనేజీ పనులు చేపడతాం. దశాబ్దాలుగా ప్రభుత్వ భూముల్లో నివసిస్తున్న వారికి పట్టాలు ఇస్తాం. పార్టీలో కష్టపడిన వారికి నామినేటెడ్‌ పదవులు ఇస్తాం. సనాతన ధర్మ బోర్డు విషయంలో అందరితో చర్చించి నిర్ణయం తీసుకుంటాం. రోడ్ల నిర్మాణం కూడా త్వరలోనే చేపడతాం. ఐదేళ్లలో రోడ్లను వైసీపీ పట్టించుకోలేదని మంత్రి లోకేష్‌ విమర్శించారు.
