ఇక మలివిడత భూ సమీకరణ

16.6వేల ఎకరాల సమీకరణకు నిర్ణయం
7గ్రామాల పరిధిలో చేపట్టేందుకు సీఆర్డీఏకు క్లియరెన్స్‌
అజెండాలోని 26 అంశాలకు కేబినెట్‌ ఓకే
‘రెవిన్యూ’ని ప్రక్షాళన చేయాలన్న సీఎం చంద్రబాబు
విజయవాడ: అమరావతి పరిధిలో రెండో దశ భూసమీకరణకు ఏపీ కేబినెట్‌ ఆమోదం తెలిపింది. ఏడు గ్రామాల పరిధిలో మరో 16,666.57 ఎకరాల భూసమీకరణకు సీఆర్డీఏకు అనుమతించే ప్రతిపాదనకు రాష్ట్ర మంత్రివర్గం ఆమోదముద్ర వేసింది. వైకుంఠపురం, పెదమద్దూరు, ఎండ్రాయి, కర్లపూడి, వడ్లమాను, హరిశ్చంద్రపురం, పెదపరిమి గ్రామాల పరిధిలో సీఆర్డీఏ భూసమీకరణ చేపట్టనుంది. ముఖ్యమంత్రి చంద్రబాబు అధ్యక్షతన దాదాపు 3 గంటలపాటు మంత్రివర్గ సమావేశం జరిగింది. అజెండాలోని 26 అంశాలకు కేబినెట్‌ ఆమోదం తెలిపింది. కేబినెట్‌ సమావేశం ముగిసిన అనంతరం వివిధ అంశాలపై సీఎం చంద్రబాబు నాయుడు మంత్రులతో చర్చించారు. పోలవరం వద్ద ఐకానిక్‌ బ్రిడ్జ్‌ నిర్మించనున్నట్టు ముఖ్యమంత్రి చంద్రబాబు మంత్రులకు తెలిపారు. అలాగే, రాజధాని రైతులు సంతృప్తికరంగా ఉన్నారన్నారు. రాయలసీమను హార్టికల్చర్‌ హబ్‌ చేసేందుకు కేంద్రం సహకరిస్తోందని వివరిస్తూ.. పూర్వోదయ ప్రాజెక్టు ద్వారా వెనుకబడిన ప్రాంతాలను అభివృద్ధి చేయాలని చర్చించారు. 2027 మే నాటికి పోలవరం పూర్తి చేయాలనేది లక్ష్యమని, గోదావరి పుష్కరాలకంటే ముందే పూర్తి చేసేందుకు ప్రయత్నిస్తామన్నారు. రెవెన్యూ వ్యవస్థ ప్రక్షాళన జరగాల్సిన అవసరం ఉందని సీఎం అభిప్రాయపడ్డారు. మార్కాపురం, మదనపల్లె, పులివెందుల, పాడేరు వైద్య కళాశాలలు త్వరగా పూర్తి చేస్తామన్నారు.
మరిన్ని కేబినెట్‌ నిర్ణయాలు..
మార్క్‌ఫెడ్‌ ద్వారా రూ.5వేల కోట్ల రుణానికి కేబినెట్‌ ఆమోదించింది. ఎస్వీ వర్సిటీలో లైవ్‌లోక్‌ రీసెర్చ్‌ కేంద్రం ఏర్పాటు, నూర్‌బాగా, దూదేకుల సహకార ఫైనాన్స్‌ కార్పొరేషన్ల ఏర్పాటుకు గ్రీన్‌ సిగ్నల్‌ ఇచ్చింది. పట్టణ స్థానిక సంస్థల్లో రెగ్యులేషన్‌, కంట్రోల్‌ ఆఫ్‌ డిస్‌ప్లే డివైజెస్‌ ఏర్పాటు, పట్టణాభివృద్ధి శాఖలో పలు చట్టసవరణలు, నాబార్డ్‌ నుంచి ఇంధన శాఖకు రుణం, ఎమెండెడ్‌ భారత్‌ నెట్‌ ప్రోగ్రామ్‌ అమలుకు ఎస్పీవీ ఏర్పాటుకు కేబినెట్‌ అంగీకరించింది. అలాగే, ఫుసెసింగ్‌ సొసైటీలో ఒప్పంద పద్ధతి ద్వారా 16 పోస్టుల భర్తీ, పోలవరం ప్రాజెక్టు పరిధిలో రూ.542.85 కోట్ల పనులు చేపట్టడానికి, వివిధ సంస్థలకు భూకేటాయింపులపై మంత్రిమండలి విస్తృతంగా చర్చించి ఆమోదముద్ర వేసింది.