- 16, 17 తేదీల్లో జంటగా ప్రచారం
- విజయనగరం, నెల్లిమర్ల, పెడన, మచిలీపట్నంలో అగ్రనేతల సభలు
- నేడు తాడికొండ, ప్రత్తిపాడులో చంద్రబాబు ప్రజాగళం సభలు
- రేపు పాయకరావుపేట, చోడవరం, గాజువాకలో..
టీడీపీ అధినేత చంద్రబాబు, జనసేనాని పవన్‌ కల్యాణ్‌ ఇటీవల రెండ్రోజులు ఉమ్మడి ప్రచారంలో పాల్గొన్న సంగతి తెలిసిందే. తణుకు, నిడదవోలు, పి.గన్నవరం, అమలాపురంలో వీరిద్దరూ పాల్గొన్న సభలకు విశేష స్పందన లభించింది. అదే ఉత్సాహంతో మరో విడత ఉమ్మడి ప్రచారం చేయాలని చంద్రబాబు, పవన్‌ నిర్ణయించారు. ఈ నెల 16, 17 తేదీల్లో ఇరువురు కలిసి ప్రచారం చేసేందుకు షెడ్యూల్‌ ఖరారైంది. ఈ నెల 16న విజయనగరం, నెల్లిమర్ల నియోజకవర్గాల్లో చంద్రబాబు, పవన్‌ రోడ్‌ షోల్లో పాల్గొంటారు. అనంతరం బహిరంగ సభకు హాజరవుతారు. 17న పెడన, మచిలీపట్నం నియోజకవర్గాల్లో ఉమ్మడి సభలు నిర్వహిస్తారు.
కాగా, చంద్రబాబు శుక్రవారం వేమూరు, రేపల్లె నియోజకవర్గాల్లో ప్రజాగళం యాత్ర చేపట్టారు. శనివారం తాడికొండ, ప్రత్తిపాడు నియోజకవర్గాల్లో ప్రజాగళం కొనసాగిస్తారు. ఈ నెల 14న పాయకరావుపేట, చోడవరం, గాజువాక… 15న రాజాం, పలాస, టెక్కలిలో ప్రజాగళం సభలకు హాజరవుతారు. మరోవైపు పవన్‌ కల్యాణ్‌ 16 వరకు సొంత నియోజకవర్గం పిఠాపురంలో ప్రచారం సాగించే అవకాశాలున్నాయి.
