ఇక అమరావతి పరుగులు

• అభివృద్ధి పనులకు తొలగిన అడ్డంకులు
• పాత టెండర్లకు త్వరలోనే ఫుల్‌స్టాప్‌
• సాంకేతిక కమిటీ నివేదికకు ఆమోదం
• డిశంబరు 31లోపు నూతన టెండర్లు
• హైకోర్టు, అసెంబ్లీ భవనాలకు జనవరి లోపు..
• మూడేళ్లలో అమరావతి అభివృద్ధి పనులు పూర్తి
• రాష్ట్ర పురపాలక మంత్రి పొంగూరు నారాయణ వెల్లడి

అమరావతి, నవంబరు 4: అమరావతి అభివృద్ధి పనులకు అడ్డంకిగావున్న పాత టెండర్లను ముగించే మార్గం సుగమమైందని, త్వరలోనే కొత్త టెండర్లను పిలిచే ప్రక్రియ ప్రారంభించి వచ్చే మూడేళ్లలో అమరావతి అభివృద్ధి పనులన్నింటినీ పూర్తి చేస్తామని రాష్ట్ర పురపాలక మరియు పట్టణాభివృద్ధి మంత్రి పొంగూరు నారాయణ తెలిపారు. ఏపీ సచివాలయంలో సీఎం చంద్రబాబు అధ్యక్షతన సీఆర్డీఏ 39వ అథారిటీ సమావేశం జరిగింది. సమావేశంలో నిలిచిపోయిన అమరావతి రాజధాని నిర్మాణాలపై ఏర్పాటైన టెక్నికల్‌ కమిటీ ఇచ్చిన నివేదికపై చర్చించారు. 2019లో వైకాపా ప్రభుత్వం పనులు నిలిపివేయడంతో వచ్చిన ఇబ్బందులను అధ్యయనం చేసి టెక్నికల్‌ కమిటీ ఈ నివేదిక సమర్పించింది. రాజధాని నిర్మాణానికి టెండర్లు పొందిన సంస్థలతో వివాదాలు పరిష్కరించేందుకు, మళ్లీ పనులు ప్రారంభించేందుకు తీసుకోవాల్సిన చర్యలపై కమిటీ పలు సూచనలు చేసింది. కమిటీ సూచనలు, అదనపు ఆర్థిక భారంవంటి అంశాలపై సీఆర్డీఏ సమావేశంలో చర్చించారు. సమావేశంలో సాగిన చర్చల సారాంశాన్ని సోమవారం రాష్ట్ర సచివాలయంలో నిర్వహించిన మీడియా సమావేశంలో మున్సిపల్‌ మంత్రి నారాయణ వెల్లడిరచారు.

రాజధాని అమరావతి అభివృద్ధి పనులకు సంబంధించి పలు నిర్ణయాలు తీసుకున్నట్టు మంత్రి నారాయణ వెల్లడిరచారు. 2014-19 మధ్యకాలంలో రూ.41 వేల కోట్ల విలువైన టెండర్లను పిలిచి, వాటిలో దాదాపు రూ.35 వేల కోట్ల విలువైన పనులను ప్రారంభించామన్నారు. వీటిలో హైకోర్టు, అసెంబ్లీ భవనాలతోపాటు ప్రధాన రహదారులు, ఇతర రహదారులు, హైకోర్టు జడ్జిలు, మంత్రులు, అధికారుల వసతి గృహాల నిర్మాణాలకు సంబంధించిన పలు పనులను చేపట్టామన్నారు. అయితే గత ప్రభుత్వం మూడు రాజధానులంటూ ఈ పనులన్నింటినీ నిర్లక్ష్యం చేసిందని గుర్తు చేశారు. పనులను ప్రారంభించిన పలు కాంట్రాక్టు ఏజన్సీలు నిర్వహించిన పనులకూ బిల్లులు చెల్లించకుండా పెద్దఎత్తున బకాయిలను పెట్టడం జరిగిందన్నారు.

ఈ పాత టెండర్లకు సంబంధించిన పలు సమస్యలను పరిష్కరించిన తదుపరే కొత్త టెండర్లను పిలవాలనే ఉద్దేశ్యంతో పాత టెండర్లను క్లోజ్‌ చేసేందుకు విధి విధానాలను రూపొందించేందుకు చీఫ్‌ ఇంజనీర్లతో కూడిన సాంకేతిక కమిటీని జూలై 24న ప్రభుత్వం ఏర్పాటు చేయడం జరిగిందన్నారు. దాదాపు 23 పాయింట్లతో అక్టోబరు 29న ఆ కమిటీ ఒక నివేదికను ప్రభుత్వానికి అందచేసినట్టు మంత్రి నారాయణ వివరించారు. నేటి సీఆర్డీఏ సమావేశంలో ఆ నివేదికపై పూర్తిస్థాయిలో చర్చించిన తదుపరి ఆమోదించామన్నారు. కమిటీ సిఫార్సు చేసిన 23 ప్రతిపాదనల ప్రకారం పాత టెండర్లు అన్నింటినీ క్లోజ్‌ చేసిన తదుపరి, కొత్త టెండర్లను పిలవడం జరుగుతుందన్నారు. హైకోర్టు, అసెంబ్లీ వినా మిగతా పనులకు డిశంబరు 31లోపు మరియు హైకోర్టు, అసెంబ్లీ భవన నిర్మాణాలకు జనవరిలోపు కొత్త టెండర్లు పిలుస్తామని మంత్రి వివరించారు. రానున్న మూడేళ్లలో అమరావతి అభివృద్ది పనులన్నీ పూర్తి చేయడం జరుగుతుందని, ఐదేళ్లలో ప్రపంచంలోని ఐదు ఉత్తమ నగరాల్లో అమరావతి ఒకటిగా విరాజిల్లుతుందనే ఆశాభావాన్ని మంత్రి నారాయణ వ్యక్తం చేశారు.

అమరావతి అభివద్ధి పనులకు సంబంధించి ప్రపంచ బ్యాంక్‌ రూ.15 వేల కోట్లు ఇవ్వడానికి అంగీకారం తెలిపిందని, అయితే వరద నివారణ పనులను సాధ్యమైనంత త్వరగా పూర్తిచేయాలని ఆ బ్యాంకు ప్రతినిధులు కోరడం జరిగిందన్నారు. అందుకు తగ్గట్టుగా అమరావతి రాజధాని 217చ.కి. కోర్‌ క్యాపిటల్‌ పరిధిలోను, మరియు బయట పలుచోట్ల రిజర్వాయర్ల నిర్మాణానికి చర్యలు తీసుకుంటున్నట్టు ఆయన తెలిపారు. క్యాపిటల్‌ సిటీ పరిధిలో కొండవీటి, పాలవాగు, గ్రావిటీ కెనాల్‌ రిజర్వాయర్లను మరియు క్యాపిటల్‌ సిటీకి బయట నీరుకొండ, కృష్ణాయపాలెం, శాఖమూరు మరియు ఉండవల్లి ప్రాంతాల్లో స్టోరేజ్‌ రిజర్వాయర్లను నెదర్లాండ్‌ డిజైన్ల ప్రకారం నిర్మించనున్నట్టు ఆయన తెలిపారు. అమరావతి చుట్టూ బైపాస్‌ రహదారులు నిర్మాణం జరుగుతున్నప్పటికీ.. గతంలో నిర్ణయించిన ప్రకారం ఇన్నర్‌ రింగ్‌ రోడ్డు, ఔటర్‌ రింగ్‌రోడ్డు నిర్మాణం చేపడతామని మంత్రి స్పష్టం చేశారు.