- కులానికి పరిమితం చేయొద్దు
- జాతి ఉనికి కోసం ప్రాణత్యాగం చేసిన మహనీయుడు
- ఆంధ్రప్రదేశ్ సర్వతోముఖాభివృద్ధే ఆయనకు నిజమైన నివాళి
- ఆత్మార్పణ దినం కార్యక్రమంలో ఉప ముఖ్యమంత్రి పవన్‌ కళ్యాణ్‌
విజయవాడ (చైతన్యరథం): ఆంధ్రుల చిరకాల స్వప్నమైన ఆంధ్ర రాష్ట్ర సాధన కోసం ఆమరణ నిరాహార దీక్ష చేసి ఆత్మార్పణగావించిన అమరజీవి పొట్టి శ్రీరాములు మనందరికీ చిరస్మరణీయుడని డిప్యూటీ సీఎం పవన్‌ కళ్యాణ్‌ కొనియాడారు. భాషాప్రయుక్త రాష్ట్రాల ఏర్పాటుకు కారణభూతుడు శ్రీరాములు. ఆయన ఒక కులానికో, జాతికో నాయకుడు కాదు…ఆంధ్ర జాతి మొత్తానికి నాయకుడని స్పష్టం చేశారు. దేశం కోసం బతికిన పొట్టి శ్రీరాములు లాంటి నాయకులను స్మరించుకోవడం మనందరి బాధ్యత అన్నారు. ఆంధ్రప్రదేశ్ రాష్ట్రం అన్ని రంగాల్లో సర్వతోముఖాభివృద్ధి సాధించి 2.2 ట్రిలియన్‌ డాలర్ల ఆర్థిక వ్యవస్థగా పురోగతి సాధించడమే ఆయనకు మనం ఇచ్చే నిజమైన నివాళి అని చెప్పారు. పొట్టి శ్రీరాములు వర్ధంతిని పురస్కరించుకొని ఆదివారం ఉదయం తుమ్మలపల్లి కళాక్షేత్రంలో ఆంధ్రప్రదేశ్ ప్రభుత్వం అమరజీవి పొట్టి శ్రీరాములు ఆత్మార్పణ దినం కార్యక్రమాన్ని ఘనంగా నిర్వహించింది. ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్‌ కల్యాణ్‌ ముందుగా పొట్టి శ్రీరాములు చిత్రపటానికి పూలమాలలు వేసి నివాళులర్పించారు. అదే విధంగా భారత తొలి ఉప ప్రధాని సర్దార్‌ వల్లభ్‌ భాయ్‌ పటేల్‌ వర్ధంతి సందర్భంగా ఆయన చిత్రపటానికి కూడా పూలమాల వేసి నివాళులు అర్పించారు. అనంతరం పొట్టి శ్రీరాములు ఆత్మార్పణపై రూపొందించిన పుస్తకాన్ని విడుదల చేశారు. డాక్యుమెంటరీని ప్రదర్శించారు.
ఈ సందర్భంగా పవన్‌ కళ్యాణ్‌ మాట్లాడుతూ…ఎవరైతే మనకోసం త్యాగాలు చేశారో అటువంటి మహనీయుల త్యాగాలను స్మరించుకోవడం కోసం వర్దంతి, జయంతి కార్యక్రమాలు నిర్వహించుకోవాలన్నారు. ఇలాంటివి చేయడం వల్ల భవిష్యత్తు తరాలకు వారి సేవలను తెలియచెప్పగలం. మనుషులకు మరుపు చాలా సహజం. ఇటువంటి కార్యక్రమాలు ద్వారా మహానీయుల త్యాగాలు గుర్తు చేసుకుంటాం. ప్రత్యేక ఆంధ్ర రాష్ట్రం కోసం పొట్టి శ్రీరాములు ఆమరణ దీక్ష చేసి ప్రాణాలు విడిచారు. ఆమరణ దీక్ష సమయంలో ఎంతో క్షోభ అనుభవించారు. కేవలం సమాజం కోసం, రాష్ట్రం కోసం, దేశం కోసం బతికిన వ్యక్తి పొట్టి శ్రీరాములు. రాష్ట్ర విభజన జరిగిన తరువాతనే ఆయన గొప్పతనం అర్థమైంది. బాధాకరమైన విషయమేమిటంటే అంతటి మహనీయుడిని కూడా కులానికి పరిమితం చేస్తున్నారు. ఆయన విగ్రహం వెతకాలంటే ఆర్య వైశ్య సమాజంలో తప్ప మరెక్కడ దొరకదు. ఆయన ఒక కులానికి, వర్గానికి కాదు… దేశం మొత్తం గర్వించే నాయకుడని పవన్‌ ఉద్ఘాటించారు.
తెలుగువారి ఉనికి కోసం ప్రాణత్యాగం
అప్పటికే ఒక వైపు మతప్రాతిపదికన అఖండ భారతం రెండు ముక్కలు కావడంతో భాషా ప్రయుక్త రాష్ట్రాల ఏర్పాటును ప్రధాని నెహ్రూ నేతృత్వంలోని నాటి జాతీయ నాయకత్వం వ్యతిరేకించింది. అయినా తెలుగువారి ఆత్మగౌరవం, ఉనికి కోసం పొట్టి శ్రీరాములు ఆమరణ దీక్ష చేపట్టి ప్రాణత్యాగం చేశారు. ఆయన చేసిన పోరాటం దేశాన్ని కదిలించింది. ఆయన బలిదానంతో రాష్ట్రం ఏర్పడిరది. మన ఉనికి కోసం మద్రాసులో ఆమరణ దీక్ష చేసి ప్రాణ త్యాగం చేసిన పొట్టి శ్రీరాములు పాడె మోయడానికి కూడా ఆనాడు కష్టపడాల్సి వచ్చిందని చదివి నా గుండె కదిలిపోయింది. ఘంటసాల, మరో నలుగురు కలిసి పాడె మోశారు. ఈ రోజు మనం ఆంధ్రులం అని గర్వంగా చెప్పుకుంటున్నాం అంటే అది ఆ మహనీయుడు బలిదానంతో పెట్టిన భిక్షే అని పవన్‌ అన్నారు.
చేయి, చేయి కలిపి..
మన రాష్ట్ర ఏర్పాటు పొట్టి శ్రీరాములు బలిదానం మీద జరిగింది. తెలుగు వారి ఉనికి కోసం ఆయన ప్రాణత్యాగం చేశారు. కుటుంబం, ప్రాంతం వంటి పరిధులను దాటి ఆలోచిస్తేనే ఆయనలా మహానాయకుడిగా ఎదుగుతాం. ఆంధ్రులకు ఒక రాష్ట్రం కావాలని పొట్టి శ్రీరాములు కలలు కంటే… తెలుగువారి ఆత్మగౌరవం కోసం నందమూరి తారకరామారావు పోరాడారు. ఒక రాజకీయ పార్టీని నడపటం చాలా కష్టం, 5 కోట్ల మంది కోసం ప్రభుత్వ విధానాలు రూపొందించడం ఇంకా కష్టం. ముఖ్యమంత్రి చంద్రబాబు నాయుడు పాలనను సమర్థవంతంగా నడిపి ప్రజలకు చేరువ చేయడం గొప్ప విషయం. స్వర్ణాంధ్ర విజన్‌ 2047 డాక్యుమెంట్‌ను రేయింబవళ్లు కష్టపడి, ఎందరో మేధావుల సలహాలు, సూచనలు తీసుకొని రూపొందించారు. విజన్‌ 2047 ద్వారా కుల, మతాలకు అతీతంగా రాష్ట్రం అభివృద్ధి సాధిస్తుంది. సమర్థత ఉన్న ఎవరైనా దానిని అందిపుచ్చుకోవచ్చు. విజన్‌` 2047ను విమర్శిస్తున్నవారు ఒకటే గుర్తుపెట్టుకోవాలి. ఆనాడు ఇలానే విజన్‌` 2020ను విమర్శించారు. హైదరాబాదులో రాళ్లు, రప్పలు ఉన్న ప్రాంతాలు ఇప్పుడు ఎలా ఉన్నాయో చూడాలి. తప్పకుండా ఏపీ అన్ని విధాలా అభివృద్ధి చెందుతుంది. చేయిచేయి కలిపి విజన్‌ `2047 ను ముందుకు తీసుకు వెళ్లేందుకు అందరం కంకణ బద్దులై ఉంటామని డిప్యూటీ సీఎం పవన్‌ స్పష్టం చేశారు. ఈ కార్యక్రమంలో రాష్ట్ర మంత్రులు పొంగూరు నారాయణ, కింజరాపు అచ్చెన్నాయుడు, కొలుసు పార్థసారథి, ఎంపీలు, ఎమ్మెల్యేలు, ఉన్నతాధికారులు పాల్గొన్నారు.
