అమరావతి (చైతన్య రథం): గత ప్రభుత్వ హయాంలో ట్రైబల్‌ వర్సిటీ స్థలం మార్చి ఐదేళ్లు పనులు ముందుకు సాగకుండా జాప్యం చేశారు. రాజకీయంగా మాకు మంచిపేరు వస్తుందని స్థలాన్ని మార్చారు. 2019లో నిర్ణయించిన స్థలంలోనే వచ్చే రెండేళ్లలో సెంట్రల్‌ ట్రైబల్‌ వర్సిటీ పూర్తి చేస్తామని రాష్ట్ర విద్య, ఐటీ, ఎలక్ట్రానిక్స్‌ మంత్రి నారా లోకేష్‌ స్పష్టం చేశారు. విభజనచట్టం ప్రకారం పెండిరగ్‌లో ఉన్న విద్యాసంస్థలపై శాసనసభ్యులు బుచ్చయ్యచౌదరి, బోండా ఉమ అడిగిన ప్రశ్నలకు అసెంబ్లీలో మంత్రి లోకేష్‌ సమాధానమిచ్చారు. 2014-19 మధ్య చంద్రబాబునాయుడు అభివృద్ధి వికేంద్రీకరణకు ప్రాధాన్యతనిచ్చారని, ఉమ్మడి జిల్లాల ప్రాతిపదికన సెక్టార్‌ వైజ్‌ ఫోకస్‌పెట్టి అభివృద్ధి కార్యక్రమాలు చేపట్టారని మంత్రి లోకేష్‌ వివరించారు. అనంతపురం జిల్లాకు కియా తెచ్చారు. చిత్తూరులో ఎలక్ట్రానిక్స్‌, నెల్లూరు విండ్‌ టర్భయిన్‌, కర్నూలు రెన్యూవబుల్‌ ఎనర్జీ, సెల్‌ఫోన్‌, ఉభయగోదావరిలో ఆక్వా, ఉత్తరాంధ్ర ఐటి, మెడికల్‌ డివైస్‌, ఫార్మా పరిశ్రమలను ప్రోత్సహించారు.
విభజన చట్టంలో రాష్ట్రానికి కేటాయించిన విద్యాసంస్థలను కూడా వేర్వేరు ప్రాంతాల్లో ఏర్పాటు చేశారు. ఐఐటి తిరుపతికి, ఐఐఎం విశాఖకి, ఎన్‌ఐటి తాడేపల్లిగూడానికి, ట్రిపుల్‌ ఐటి కర్నూలుకు, సెంట్రల్‌ వర్సిటీ అనంతపురానికి కేటాయించారు. అభివృద్ధి వికేంద్రీకరణ అంటే ఇదీ. రూ.500 కోట్లతో ప్యాలెస్‌ కట్టుకోవడం కాదు. ఐఐటి తిరుపతికి ఆగస్టు 9, 2016లోనే భూములు కేటాయించి పనులు ప్రారంభించారు. ఎన్‌ఐటి తాడేపల్లిగూడెంకు ఏప్రిల్‌ 16, 2016లో 172 ఎకరాలు, విశాఖలో ఐఐఎంకు ఏప్రిల్‌ 16, 2016లో 240 ఎకరాలు భూములు, సెంట్రల్‌ వర్సిటీ అనంతపురానికి ఏప్రిల్‌ 16, 2016లో 491 ఎకరాలు, ఐసర్‌కు 255 ఎకరాలు, ట్రిపుల్‌ ఐటిలకు కూడా భూములు అప్పట్లోనే కేటాయించారు. యుద్ధప్రాతిపదికన భూములు కేటాయించడమేగాక, కేంద్ర ప్రభుత్వంనుంచి వచ్చే నిధులు, పనుల పురోగతిని ఆనాడు ప్రతినెలా ముఖ్యమంత్రి సమీక్షించారు. అభివృద్ధి వికేంద్రీకరణలో భాగంగా విభజన చట్టంలో ఉన్న విద్యా సంస్థలను కూడా రాష్ట్రంలోని వివిధ ప్రాంతాల్లో ఏర్పాటు చేయాలని నిర్ణయించారు. పనులను పూర్తిచేసేందుకు చిత్తశుద్ధితో కృషిచేశారు. ఆయా విద్యాసంస్థలకు పెండిరగ్‌లో ఉన్న రోడ్లు, తాగునీరు, ఇతర మౌలిక సదుపాయాల సమస్యలను వెంటనే పరిష్కరించేందుకు కృషి చేస్తామని మంత్రి లోకేష్‌ సమాధానమిచ్చారు.
