ఇది మంచి ప్రభుత్వమే.. మెతక ప్రభుత్వం మాత్రం కాదు

• రాష్ట్రవ్యాప్తంగా దేవాదాయ శాఖ ఆస్తులకు రక్షణ
• దేవాదాయ ఆస్తులను కాపాడేందుకు వక్ఫ్‌ ఆస్తుల రక్షణ తరహాలో కార్యాచరణ
• కబ్జాల చెరలో సుమారు 60 వేల ఎకరాల దేవాదాయ భూములు
• వాటిని గుర్తించి, పరిరక్షణకు చట్ట ప్రకారం చర్యలు తీసుకోవాలి
• అధికారులకు పవన్‌ కల్యాణ్‌ ఆదేశం

ఏలూరు (చైతన్యరథం): ‘దీపం 2.0’ కేవలం వంటింట్లో వెలుగు కోసం మాత్రమే కాదు.. ప్రతి ఒక్కరి జీవితాల్లో వెలుగు తీసుకురావాలని డిప్యూటీ సీఎం పవన్‌ కల్యాణ్‌ ఆకాంక్షించారు. ఏలూరు జిల్లా ఐఎస్‌ జగన్నాథపురంలో శుక్రవారం దీపం `2 పథకం ప్రారంభానికి పవన్‌ కల్యాణ్‌ ముఖ్య అతిథిగా విచ్చేశారు. ఈ సందర్భంగా ఏర్పాటు చేసిన సభలో పవన్‌ మాట్లాడుతూ ప్రజలు తమ ప్రభుత్వంపై ఎంతో భరోసా పెట్టుకున్నారన్నారు. కూటమి ప్రభుత్వం అఖండ మెజారిటీతో అధికారంలోకి వచ్చేలా చేసి మా పై ఎంతో బాధ్యత పెట్టారు. గత ఐదేళ్లలో వైసీపీ చేసిన దోపిడీ కారణంగా ప్రజలు అనేక ఇబ్బందులు పడ్డారు. వైసీపీని ప్రజలు తరిమికొట్టినా, కేవలం 11 సీట్లకే పరిమితం చేసినా వారి నోళుఆగడం లేదు. కూటమి ప్రభుత్వం చిత్తశుద్ధితో పనిచేస్తోంది. అయినా సామాజిక మాధ్యమాల ద్వారా ఏది పడితే అది మాట్లాడుతాం అంటే మాత్రం చూస్తూ ఊరుకోం. మాది మంచి ప్రభుత్వమే కానీ మెతక ప్రభుత్వం కాదని వైసీపీ నేతలు గుర్తు పెట్టుకోవాలి. సోషల్‌ మీడియాలో ఆడబిడ్డలను ఇబ్బంది పెట్టే విధంగా పోస్టులు పెడుతున్నారు. ప్రభుత్వం ప్రతి విషయాన్ని గమనిస్తోంది. ఆడబిడ్డల భద్రత విషయంలో ఏమాత్రం తేడా వచ్చినా తీవ్రమైన నిర్ణయాలు తీసుకుంటామని పవన్‌ హెచ్చరించారు.

షర్మిలకు రక్షణ కల్పిస్తాం..
ఆంధ్రప్రదేశ్‌ కాంగ్రెస్‌ పార్టీ అధ్యక్షురాలు, జగన్‌ సోదరి షర్మిల.. నా ప్రాణాలకు రక్షణ కావాలి. అదనంగా సెక్యూరిటీ కల్పించాలి.. అని అడిగారు. మీ అన్న రక్షణ కల్పించలేకపోయాడేమో కానీ.. మీ ప్రాణాలకు కూటమి ప్రభుత్వం రక్షణగా ఉంటుంది. ఒక బాధ్యతగల నాయకురాలిగా మీరు ఎన్ని విమర్శలైనా చేయొచ్చు. మీరు దరఖాస్తు చేసుకుంటే తానే స్వయంగా సీఎం చంద్రబాబు దృష్టికి తీసుకెళ్లి మీకు రక్షణ కల్పించే తీసుకుంటానని పవన్‌ తెలిపారు.

అన్యాక్రాంతమైన ఆస్తుల జాబితా సిద్ధం చేయాలి
రాష్ట్రవ్యాప్తంగా దేవాలయాలకు, ధర్మ సత్రాలకు ఉన్న ఆస్తులను రక్షించే బాధ్యతలను సమర్థంగా నిర్వర్తించాలని అధికారులకు ఉప ముఖ్యమంత్రి పవన్‌ కల్యాణ్‌ స్పష్టం చేశారు. దేవాదాయశాఖ పరిధిలోకి వచ్చే ప్రతి ఆస్తి రికార్డునీ పరిశీలించి, సదరు ఆస్తుల పరిరక్షణకు తగిన కార్యాచరణ రూపొందించుకోవాలన్నారు. సుమారుగా 60 వేల ఎకరాల మేర ఎండోమెంట్స్‌ ఆస్తులు అన్యాక్రాంతం కావడమో, ఆక్రమణకు గురి కావడమో జరిగిందని తెలుస్తోందన్నారు. అన్యాక్రాంతమైనవీ, ఆక్రమణల్లో ఉన్నవీ గుర్తించి జాబితా సిద్ధం చేసి, చట్టప్రకారం వాటిని కాపాడాలని స్పష్టం చేశారు. వక్ఫ్‌ ఆస్తుల రక్షణ తరహాలోనే దేవాదాయ శాఖ ఆస్తులను కాపాడేందుకు ఒక కార్యాచరణ చేపట్టే యోచనలో రాష్ట్ర ప్రభుత్వం ఉందన్నారు. ఐ.ఎస్‌.జగన్నాథపురంలో దీపం 2 పథకం ప్రారంభానికి ముఖ్య అతిథిగా హాజరైన పవన్‌ కల్యాణ్‌ గ్రామంలో కొలువైన శ్రీ లక్ష్మీ నరసింహస్వామి వారిని దర్శించుకున్నారు. అర్చకులు, అధికారులు, ఆలయ మర్యాదలతో పూర్ణకుంభ స్వాగతం పలికారు. ఆలయంలో జరుగుతున్న సుదర్శన నరసింహ ధన్వంతరి గరుడ ఆంజనేయ సుబ్రహ్మణ్య అనంత హోమంలో ఉప ముఖ్యమంత్రి పాల్గొన్నారు. ఈ సందర్భంగా దేవాదాయశాఖ కమిషనర్‌ సత్యనారాయణ, పంచాయతీరాజ్‌ కమిషనర్‌ కృష్ణ తేజ, ఏలూరు జిల్లా కలెక్టర్‌ వెట్రి సెల్వి, జిల్లా ఎస్పీ కొమ్మి శివప్రతాప్‌, జాయింట్‌ కలెక్టర్‌ ధాత్రి రెడ్డిలతో సమావేశమయ్యారు.

కొండ తవ్వకానికి అనుమతులు ఉన్నాయా?
ఈ సమావేశంలో పవన్‌ కల్యాణ్‌ అధికారులతో మాట్లాడుతూ ఐ.ఎస్‌.జగన్నాథపురంలోని ఆలయానికి 50 ఎకరాల వరకూ భూములు ఉన్నాయి… వాటి రక్షణకు ఏ చర్యలు తీసుకున్నారో తెలియచేయాలని జిల్లా అధికారులను ఆదేశించారు. ఇక్కడ ఉన్న కొండ తవ్వకాలు చేపట్టడంపై వివరణ అడిగారు. ఇక్కడ తవ్వకాలు చేసిన గ్రావెల్‌ ఏ విధంగా వినియోగించారు, తవ్వకానికి అనుమతులు ఉన్నాయా, ఉంటే నిర్దేశించిన ప్రాంతంలోనే తవ్వకాలు చేశారా? పరిధులు దాటి తవ్వారా అనేది విచారించాలని ఆదేశించారు. అటవీ, దేవాదాయ భూముల్లో కూడా ఏమైనా తవ్వకాలు చేపట్టారా అనేది కూడా పరిశీలన చేయాలని… ఇందుకోసం సంబంధిత శాఖలన్నీ కలసి విచారణ చేయాలని స్పష్టం చేశారు. వారం రోజుల్లోగా నివేదిక ఇవ్వాలని జిల్లా కలెక్టర్‌కు స్పష్టం చేశారు. రాష్ట్రవ్యాప్తంగా దేవాదాయ శాఖ పరిధిలో ఉన్న ఆస్తుల రక్షణపై దృష్టిపెట్టాలని, ఆక్రమణలో ఉన్నవెన్ని, అన్యాక్రాంతమైనవి ఎన్ని అనే వివరాలు తెలియచేయాలని దేవాదాయ శాఖ కమిషనర్‌కు దిశానిర్దేశం చేశారు.

సాంఘిక సంక్షేమ హాస్టళ్లలో విద్యార్థినులకు రక్షణ
కూటమి ప్రభుత్వం విద్యార్థినులు, యువతులు, మహిళల రక్షణకు ప్రాధాన్యం ఇస్తుంది. ఆడ బిడ్డలను ఇబ్బందిపెట్టేవారిని ఎట్టి పరిస్థితుల్లోనూ ఉపేక్షించవద్దనీ, సామాజిక మాధ్యమాల్లోనూ, చదువుకొనే చోట, పని ప్రదేశాల్లో వారి రక్షణకు తగిన చర్యలు చేపట్టాలనీ పవన్‌ కల్యాణ్‌ అధికారులకు స్పష్టం చేశారు. సాంఘిక సంక్షేమ వసతి గృహాల్లో ఉంటున్న విద్యార్థినులకు పటిష్టమైన రక్షణ చర్యలు కల్పించాలని, ఈ విషయంలో జిల్లా కలెక్టర్‌, ఎస్పీ బాధ్యత తీసుకొని రక్షణ ఏర్పాట్లపై సమీక్షించాలని స్పష్టం చేశారు. అదే విధంగా హాస్టళ్లలో బాత్రూమ్‌లు లేక ఆడబిడ్డలు ఇబ్బందిపడుతున్నారని, వాటి నిర్మాణంపై దృష్టిపెట్టాలని ఆదేశించారు. ఈ సమావేశంలో రాష్ట్ర పర్యాటక శాఖ మంత్రి కందుల దుర్గేష్‌ , ఏలూరు, పశ్చిమగోదావరి జిల్లాల శాసనసభ్యులు పాల్గొన్నారు.